خبز صحى لمرضى ارتجاع المرئ

اليكم طريقتين لعمل خبز صحى مناسب لمرضى ارتجاع المرئ

اضغط هنا
  • ارغفة عيش رفيع وزن 23جم
  • عيش توست

أرغفة العيش

اليكم أسرع وأسهل طريقة شفتها فى حياتى لخبزعيش فى البيت – حنعمل مع بعض عيش صحى أسمر فى البيت على البوتاجاز – بدون حاجة للفرن – وهى نفس طريقة خبز فى الهند يسمونه phulka فولكا او شباتى او روتى – يحتوى على دقيق اسمر وماء وملح فقط – لكن احنا هنا حنعمله بطريقة معدلة عشان يبقى خبز صحى مناسب لمرضى ارتجاع المرئ يستخدموه بعد اسبوعين من المرحلة الثانية من العلاج – كما انه مناسب للباحثين عن الرشاقة والصحة بصفة عامة

يتميز هذا الخبز بانه رقيق جدا – الرغيف وزنه 23جم فقط (الرغيف العادى من الفرن بيبقى وزنه من 85 الى 130جم) وبكدة حنقدر ناكل عيش اقل عشان محبى الرشاقة واللى عايز يحافظ على وزنه – وهو مناسب جدا للى بيعمل ريجيم لان سعراته اقل من سعرات العيش السن – وكمان ميزته انه سريع جدا فى خبزه – كمان من مزاياه انه عيش صحى جدا لانه مصنوع من دقيق حبة القمح الكاملة بكل ما تحتويه من عناصر غذائية مفيدة (ولو ملقيناش دقيق حبة القمح الكاملة ممكن نخلط 15جم ردة ناعمة مع 85جم دقيق ابيض لنحصل على 100جم دقيق اسمر)

العجينة اللى حنستخدمها نقدر نسميها “عجينة الثلاجة”

تتميز عجينة الثلاجة بأنها تحتوى على نسبة من الكربوهيدرات أقل من أى عجينة أخرى عادية – وذلك بفعل الخميرة البرية ووقت التخمير الطويل (3 ايام) – عاملان معاً يؤديان الى ان يتكاثر فى العجينة حمض اللبنيك lactic acid الذى بدوره يتغذى على النشويات فيخدمنا خدمة جليلة – فتصبح العجينة مهضومة حتى قبل ان تدخل معدتنا – مما يفيد مريض ارتجاع المرئ ويجنبه مشاكل كثرة تناول الكربوهيدرات :

اولا: تحضير عجينة الاولية preferment

  • 100جم خميرة برية (طريقة عملها هنا – او يمكنك الحصول عليها طازجة وجاهزة للاستخدام من هنا)
  • 100جم دقيق حبة القمح الكاملة whole wheat flour
  • 100جم ماء

الطريقة

  • نخرج برطمان الخميرة من الثلاجة
  • تكون الخميرة جاهزة للاستخدام اذا كانت قد ارتفعت ثم هبطت فى الثلاجة (نعرف من علامات تتركها العجينة على جدران البرطمان الزجاجى اثناء هبوطها) – اما اذا اخرجناها من الثلاجة ولم نلاحظ علامات هبوط العجينة فمعنى ذلك انها لم تعلو اثناء وجودها فى الثلاجة – فى هذه الحالة نتركها على رخامة المطبخ حتى تعلو لاقصى ارتفاع ثم تبدا فى الهبوط – وقتها نصبح جاهزين للخطوة التالية
  • نضيف بعض الماء لبرطمان الخميرة ونرجهم كويس جدا حتى يختلطوا تماماً
  • نصب الخليط على الدقيق – ثم نصب مقدار آخر من الماء فى البرطمان ونرجه مرة أخرى ونصبه مع باقى الماء على الدقيق  ونقلبهم مع بعض كويس
  • نعيد 100جم من الخليط الى برطمان الخميرة ونحفظه مغطى فى الثلاجة للاستخدام القادم
  • مهم جداً الا ننسى الخطوة السابقة والا سنفقد الخميرة البرية التى باذن الله تستطيع ان تخدمنا طول العمر
  • نغطى العجينة على رخامة المطبخ حتى يتضاعف حجمها ويصبح سطحها ملئ بالفقاقيع (من 6 الى 12 ساعة – او ليلة)

ثانياً عجينة الثلاجة cold-fermented dough

  • 100جم ماء
  • 100جم دقيق حبة القمح الكاملة whole wheat flour
  • 50جم ردة ناعمة
  • 50جم بذر كتان مطحون
  • 20جم زيت
  • 5جم ملح

الطريقة

  • نضيف كل المكونات للعجينة ونقلبها ثم نعجنها بضع دقائق
  • نحفظ العجينة فى الثلاجة لمدة 3 ايام مغطاه فى حلة او نضعها فى كيس بلاستيك ندهنه بنقطتين زيت حتى لا تلتصق به العجينة

ثالثاُ خبز العيش

  • بعد قضائها 3 ايام فى الثلاجة نخرج العجينة ونقطعها 16 جزء ونشكلهم كور
  • نغمر كل كرة فى طبق واسع به ردة ناعمة ونفردها بالنشابة مع غمسها فى طبق الردة كل شوية عشان ماتلزقش
  • نفرد لغاية مايبقى القرص قطره حوالى 15سم
  • نرص الاقراص فوق بعض على صينية ونرش على كل قرص شوية ردة قبل ما نحط القرص التالى فوقه عشان ميلزقوش فى بعض
  • نضع شواية او طاسة على نار متوسطة
  • بعد ان تصبح الطاسة ساخنة سخونة متوسطة نضع فيها قرص
  • بعد 5 ثوانى نقلبه على وجهه الثانى ونسيبه لغاية ما نلاقى بقع بنى – حوالى نصف دقيقة
  • نضعه على وجهه الاول على نار مباشرة ضعيفة ثوانى حتى تعلو
  • نقلبه على الوجة الثانى ثوانى ايضا
  • لو عايزين العيش طرى للسندوتشات او الغموس ناخد كل رغيف من على النار ونحطهم على طول فوق بعض فى حلة او طبق غويط ونغطيهم عشان يطروا
  • اما لو بنحبه مقرمش نتركه فى الهواء وبعد مايبرد خالص نغطيه بفوطة – ودة مش محتاج يتشال فى الثلاجة
kneading roti dough

نعجن الدقيق والملح والماء ونغطيهم ربع ساعة

 

dough balls for making rotis or phulkas

نقسم العجينة ونسكل كور بحجم البيضة

 

rolling rotis

نفرد الكرة بالنشابة

 

rolling dough for making rotis or dough

حتى نحصل على قرص مستدير قطره حوالى 15سم

 

making rotis or phulkas

نضع القرص فى طاسة سابقة التسخين على نار متوسطة

 

making rotis or phulkas

بعد 5 ثوانى نقلب القرص على الوجه الثانى ونتركه حوالى نصف دقيقة حتى تظهر فى القعر بقع بنى صغيرة

 

puffed rotis or phulkas

نأخذ الرغيف من الطاسة ونضعه على نار متوسطة مباشرة على وجهه الاول – فى ثوانى الرغيف حيتنفخ – نقلبه على وشه الثانى ثوانى اخرى مش اكتر عشان مايتحرقش

شوفوا الفيديو دة لطريقة عمايله ب3 طرق مختلفة مع الفرق انها بتعفر العيش بدقيق لكن احنا حنستخدم ردة أفيد :

التوست
نقدر نستخدم نفس العجينة – وبنفس الخطوتين الاولى والثانية السابقتين – فى عمل عيش توست
الفرق فقط فى الخبز – فهنا الخبز اسهل
نحضر قالب كيك مستطيل وندهنه بفرشة زيت ثم نخرج عجينة الثلاجة ونصبها فى القالب – ونغطيه بورقة فويل ونتركها حتى ترتفع للضعف ثم نضعها مغطاه كما هى فى الفرن – الرف الاوسط – على حرارة 180 درجة مئوية لمدة 30 دقيقة ثم نرفع الغطاء الفويل ونعيدها للفرن 20 دقيقة اضافية

عزيزى القارئ ارجوك لا تنسى اذا كنت تعانى من متاعب ارتجاع المرئ ان تتبع أولاً نظام علاج ارتجاع المرئ بدون ادوية بمرحلتيه الاولى لمدة اسبوعين ثم الثانية لمدة اسبوعين آخرين قبل ان تبدأ فى تتناول هذا الخبز

وبالف صحة وعافية يارب باذن الله

لو الموضوع نال اعجابك اضغط هنا لدعم الكاتب (جزاكم الله خيراً)

أضف تعليق

كن أوّل من يعلّق

avatar
‫wpDiscuz