علاج ارتجاع المرئ بدون ادوية – المرحلة الثانية

آخر تحديث : 03-01-2019 الساعة 08:11 ص

أعزائى مرضى ارتجاع المرئ (سابقاً) :
اذا كنتم قد انتهيتم بفضل الله من المرحلة الاولى من برنامج علاج ارتجاع المرئ بدون ادوية – ومدتها اسبوعين – فقد جاء وقت المرحلة الثانية

فى المرحلة الاولى ساعدنا جسمنا على التخلص من الاثار المتراكمة طوال سنين نتيجة تناول النشويات والسكريات – فمرض ارتجاع المرئ يصيب اساساً من لديهم carbohydrate intolerance او عدم قدرة على تحمل الكربوهيدرات (نشويات وسكريات) – وليس كما هو سائد فى الوسط الطبى ان سببه الدهون والاكل الدسم – اطلاقاً – وقد جربتم بانفسكم مدى التحسن الذى شعرتم به بمجرد التوقف عن تناول النشويات والسكريات وأن الدهون الطبيعية والاكل الدسم وحده بدون نشويات لا يسبب لكم أى مشاكل – اذن دعنا نتفق أن النشويات والسكريات هم سبب كل المتاعب الصحية التى كنتم تعانون منها طوال سنوات وسنوات

السؤال الذى يتكرر دائما هو ماذا بعد اول أسبوعين ؟ هل سنعود نأكل نشويات وسكريات عادى زى الاول ؟

الاجابة : لا ونعم فى نفس الوقت – كيف ؟

الكربوهيدرات يختلف تركيزها بين الاطعمة – فعلينا ان نختار الاطعمة الاقل فى نسبة الكربوهيدرات – ومن ناحية اخرى فهناك كربوهيدرات بسيطة وأخرى مركبة – البسيطة تتحول بسرعة الى جلوكوز صافى فى اجسامنا – فهى الخطر الاكبر – اما المركبة فهى أبطأ فى الهضم كما انها تحتوى على نسبة كبيرة من الالياف والفيتامينات والمعادن

المرحلة الثانية تقدروا تعتبروها مرحلة تجارب. حتكتشف فيها ايه من النشويات يناسبك وايه اللي بيتعبك

عشان كدة لازم تكتب عندك قائمة بالمسموحات الخاصة بك : اى حاجة كلتها ومتعبتش منها ضيفها فيها – وقائمة اخرى للممنوعات : اى حاجة جربتها وتعبت منها ضيفها وماتاكلهاش تاني

لذلك ففى المرحلة الثانية من برنامجنا سنبدأ بتناول تدريجى للنشويات بشرط ان نراعى فى اختيار المأكولات النشوية النقاط التالية:

  • الا تكون كربوهيدرات صافية بنسبة 100% – بل كلما كانت نسبة الكربوهيدرات أقل من غيرها كان افضل
  • ان تكون كربوهيدرات مركبة بطيئة الامتصاص غنية بالالياف والفيتامينات والمعادن
  • لا نخلط اكثر من صنف كربوهيدرات فى نفس الوجبة
  • نبدأ بالتدريج – نجرب صنف واحد لمدة يومين او ثلاثة فاذا لم يسبب لنا أى متاعب نضمه لقائمة المسموحات. واذا تعبنا منه نضمه لقائمة الممنوعات ومناكلوش تاني
  • لا نتناول أى كربوهيدرات او فواكه فى فترة المساء بل مسموحة نهاراً فقط

اذا طبقنا النقاط السابقة نستطيع بسهولة اختيار النشويات والسكريات المناسبة لنا الان :

نبدأ بالفاكهة والشعير والبقوليات :

  • الفاكهة : صنف واحد نتناوله بالنهار فقط ولمدة 3 ايام كاختبار قبل الانتقال للصنف الذى يليه – عشان نعرف ايه اللى مش بيتعبنا – وبنفس الترتيب التالى :
    • بطيخ او كنتالوب او شهد
    • فراولة
    • مشمش او خوخ
  • الشعير: نجربه لوحده لمدة 3 ايام – فاذا لم يتعبنا نستمر عليه: اشتري شعير حب بقشره من العطار – ممكن ناكله باكثر من طريقة:
  • البقوليات : صنف واحد نتناوله بالنهار فقط ولمدة 3 ايام قبل الانتقال للصنف الذى يليه – وبنفس الترتيب التالى :
    • بسلة / فول حراتى اخضر
    • طعمية / فلافل
    • عدس
    • فول مدمس
    • لوبيا
    • فاصوليا بيضاء
  • بعد مرور اسبوعين من بدء المرحلة الثانية – أى بعد 4 اسابيع من بداية العلاج بهذا البرنامج – نبدأ تدريجياً فى تناول اكلات نشوية من نوع الكربوهيدرات المركبة – وايضاً صنف واحد نتناوله بالنهار فقط ولمدة 3 ايام قبل الانتقال للصنف الذى يليه – وبنفس الترتيب التالى :
    • ذرة مشوية او مطهية على البخار
    • فشار (عادى بالزيت والملح – بدون كراميل او اضافات بالسكر)
    • بطاطا مشوية نغسلها جيدا ثم نشويها فى الفرن وناكلها بقشرها (ممنوع نقشرها)
    • بطاطس بيوريه او بانيه او سوتيه بايتة ونعيد تسخينها
    • أرز بايت ونعيد تسخينه

بالاضافة لذلك فكل الاطعمة الاخرى مسموحة :

  • لحوم بالدهن وبدون – ضانى كندوز بتلو – محمر مشوى مقلى مسلوق اللى تحبوه
  • دواجن بكل طرق طهيها
  • اسماك بكل طرق طهيها
  • سمن بلدى وزبدة فلاحى وزيوت نباتية وخصوصا زيت الزيتون وزيت بذر الكتان (زيت حار) فان لم تجد فزيت دوار شمس او ذرة
  • خضروات طازجة ومطهية – اكثروا من الطازجة بالذات
  • مخللات بطريقة البروبيوتيك
  • مكسرات وتسالى

ماذا عن دقيق القمح والسكر ؟

لا والف لا – نصيحتى لكم بكل امانة واخلاص هى ان تلغوا من حياتكم نهائياً كل ما هو مصنوع من الدقيق الابيض (طحين القمح) والسكر – انسوا تماما الخبز والمخبوزات والمكرونات والسكر وكل ما هو مضاف اليه سكر من حلويات ومشروبات وعصائر – ليس فقط من اجل عدم الرجوع لمتاعب ارتجاع المرئ – لكن لحماية انفسكم من امراض مزمنة فتاكة كالسمنة والكوليسترول والضغط العالى والسكر والجلطات وتصلب الشرايين وامراض القلب والاورام الخبيثة – الدقيق والسكر هم المدخل السريع لكل هذه الامراض وأكثر – فأرجوكم أرجوكم الغوها من حياتكم ابوس ايديكم

عندكم بديل هايل احسن منه الف مرة : الشعير – سواءاً صحيح بقشره او مطحون دقيق الحبة الكاملة بقشرها

لنكن صرحاء : اصابتكم بارتجاع المرئ دليل على ان لديكم صعوبة فى هضم الكربوهيدرات CI – مما يجعل باب الخطر مفتوحاً على مصراعيه لدخول تلك الامراض الفتاكة لاجسامكم لا قدر الله – فقولوا لها لا والف لا من فضلكم

ولا تنسوا الحقيقة العلمية التى تقول ان جميع الفيروسات والميكروبات التى تغزو اجسمنا تحتاج الى نشويات وسكريات للتغذى وتتكاثر بداخلنا – وان الامتناع عن تناولهم يؤدى بالضرورة الى عدم قدرة الميكروبات على التكائر مما ينتج عنه موتها – بما فى ذلك الفيروسات التى عجز الانسان عن اكتشاف اى علاج للقضاء عليها حتى الان – مثل الاورام السرطانية وفيروسات الانفلونزا القاتلة وفيروسات الكبد – وحتى سوس الاسنان يموت ويختفى بمجرد ان نحرمه من غذاؤه الوحيد الذى يبقيه على قيد الحياة : النشويات والسكريات – فمجرد الامتناع عن تناولهم سنلاحظ اختفاء كل متاعب الاسنان واللثة – وهذا مجرد مثال بسيط لكم الفوائد الهائلة التى تحصل عليها اجسامنا بمجرد الامتناع عن النشويات والسكريات

اما المناعة الطبيعية فحدث ولا حرج – سنجد ان طاقة الشباب قد عادت الينا بقدرة قادر – واننا لم نعد نصاب بالعدوى كما كان يحدث من قبل اذا جالسنا شخص مريض بمرض معدى كالانفلونزا والكحة والبرد – كل ذلك بفضل الله لاننا بامتناعنا عن النشويات والسكريات مناعتنا الطبيعية اصبحت أقوى – حتى النوم سنلاحط اننا اصبحنا نحتاج ساعات أقل نصحو بعدها فى قمة النشاط وقد اختفى شعور الوخم والنعاس والتعب من اقل مجهود

من لم يصب من قبل بارتجاع المرئ غالبا لا يكون لديه CI ومعظمنا لم يكن يعانى من هضم النشويات فى طفولته وشبابه – اما بعد الاربعين عندما يبدأ جهازنا الهضمى فى التعبير على استحياء عن تعبه وانه خلاص مش قادر يهضم اكتر من كدة اطنان العيش والمكرونات والمخبوزات والحلويات اللى عمالين بنحشرها فيه ليل ونهار طول السنين اللى فاتت – لو استمعنا لشكواه وريحناه حينبسط جدا ويواصل خدمتنا باخلاص – اما لو اديناله الطرشة واستمرينا فى تعذيبه بما لم يعد يطيق تحمله – فساعتها لا نستطيع ان نلوم الا انفسنا عما هو قادم فى الطريق

متعكم الله جميعاً بالصحة والعافية يارب

وتحت امركم فى اى استفسارات..

86 تعليق

  1. كنت مدمن كعب الغزال و ًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًًجميع أنواع التمر و البلح فهل التمر و البلح و العجوة ممنوعان في بداية المرحلة الثانية
    و كنت متعود علي بعض التمرات بعد الصحيان قبل الفطار كما في حديث سيدنا محمد رسول الله صلي الله عليه وسلم
    و لحضرتك جزيل الشكر

    • كعب الغزال ممنوع نهائيا لانه مخبوزات – مثله مثل العيش واى حاجة بدقيق
      اما التمر فياريت تأجله اسبوعين لاننا اتفقنا نبدأ بالفواكه الخفيفة بينما التمر والبلح والعجوة سكرهم عالى جدا
      بعد اسبوعين تقدر تاخد الصبح تمر او بلح – 3 حبات بالكتير

          • الله يبارك فيك ولوالديك في الدنيا و الآخرة
            بإذن الله حأتسحر بكرة لصيام الأيام القمرية يا تري البرنامج في الصيام إزاي ?
            المهم السحور ! كنت بأحب أتسحر فول بيصبرني طول اليوم التالي لكن مش حأقدر علشان لسه مرحلته ما جاتش !
            يا تري إيه أنسب سحور يقوم مقامه ( الفول ) في صيام الثلاثة أيام القمرية ? الجمعة و السبت و الأحد ..?
            و يا تري العسل النحل حاليا ممنوع زي المرحلة الأولي ?
            ثالث نقطة : في المنطقة بتاعتي مفيش بطيخ و كنتالوب و شهد علشان أبتدي بيهم الفواكه هل ممكن أبتدي بالفراولة أو البرتقال أو الجوافة ( موجودين عندنا فعلا ) ?
            دايما بأصحح تعليقي لحضرتك لو فيه أخطاء في ساعتها لكن إمبارح بعد ساعة و ربع بأعمل تشك لاقيت فيه غلطة في كتابة الصلاة علي سيدنا رسول الله فإضطريت أصححها في تعليق جديد ..
            معلش الأسئلة كتيرة المرة دي في تعليق واحد ..
            و لحضرتك جزيل الشكر و العرفان

          • الله يبارك فيك
            1- فى برنامجنا مفيش فرق بين الوجبات الثلاث ممكن تاكل اكل غدا فى الفطار او العشا او السحور ومش حتلاقيه تقيل فى الهضم ولا حاجة – بس الافضل ساعتين قبل النوم
            لو عايز سحور خفيف توجد افكار كتير – مثلاً :
            – جبنة قريش بالطماطم والبيض المسلوق
            – جزر مبشور شعر ارفع حاجة غمسه فى سلطة لبن رايب
            – بيضتين اومليت بالزبدة محشيين جبنة مبشورة (رومى/شيدر/فلمنك) مع سلطة خضراء
            – طماطم متقطعة جوانح ومتقلبة فى سلطة طحينة
            2- بلاش عسل نحل او فاكهة فى السحور او بالليل عموما – ممكن معلقة واحدة عسل نحل على العصيدة او الزبادى صباحاً
            3- الفراولة و البرتقال و الجوافة مناسبين جداً – بس نوع واحد فى المرة وبالنهار بس – ولاحظ مع الجوافة انك تشرب ماء معاها لتفادى الامساك
            – كثرة الاسئلة تسعدنى اكثر!

          • متشكرين و بارك الله فيك علي سرعة الرد
            الحمد لله رب العالمين خلاص فهمت موضوع الفواكه
            الحمد لله رب العالمين إبني فضل يلف لغاية لما جاب بطيخة حأبتدي بيها بإذن الله علشان أبقي ملتزم بالبرنامج
            و فهمت من كلام حضرتك إني ممكن العسل النحل معلقة فقط مع الزبادي صباحا
            و العصيدة كنت فاكر إن معادها ما جاش لكن الحمد لله حأعملها للفطار في أي يوم و لا في الصيام الثلاث أيام القمرية فقط
            فعلا إشتقت للفاكهة و البطيخ و الكانتالوب و الشهد من أكلاتي المفضلة
            الحمد لله رب العالمين علي نعمه الكثيرة التي لا تعد و لا تحصي و إللي ما كانش الواحد واخد باله منها و ما كانش بيشكر ربنا عليها
            ربنا يبارك فيك

          • أعتذر لحضرتك حصل لخبطة معايا شوية في نشر تعليق
            و للأسف لاتوجد خاصية حذف يوجد تعديل فقط
            مع الشكر و التقدير

          • في المرحله الاولي فيها خضروات ورقيه مطبوخه مع السلطات ولا لاءوالبسله

          • بسم الله الرحمن الرحيم
            السلام عليكم و رحمة الله يا حاج محمد
            سألني أحد أفراد عائلتي سؤالا إعتراضا علي تركي السكريات و النشويات أكثر من أسبوعين و لم أستطيع الرد علي سؤاله و سؤاله هو :
            ألا يحتاج المخ (الدماغ ) إلي سكريات كثيرة ليعمل بكفائة عالية !!! فأنت بتركك السكريات تحرمه من أهم شئ يحتاج إليه ???
            لم أستطع الرد علي سؤاله !
            فهل كلامه صحيح ?
            أم ماذا ?
            و ما هو الصحيح ? وما هو ما يعوض نقص السكريات للدماغ ???
            برجاء الرد مع وافر شكري و إحترامي لحضرتك

          • بالفعل المخ يحتاج للجلوكوز ولكن بنسبة 5% فقط من طعامنا – والنظام دة يمد الجسم ب10% اى ضعف ما يحتاجه المخ (لان كل الخضروات والالبان ومنتجاتها بها نسبة من الكربوهيدرات – هذه النسبة هى ما يحتاجه المخ فقط – احنا فقط بنمنع الاكلات اللى نشوياتها 100% مثل الدقيق والسكر)
            كما ان الكبد اذا لم يجد جلوكوز كافى للمخ يقوم بتحويل نسبة من البروتينات فى طعامنا الى جلوكوز – فان لم يجد يحول جزء من الدهون الى جلوكوز – هذه عملية ربانية خلقنا الله وغرسها فى اجسامنا لمواجهة كل الاحتمالات فلا تقلق من هذا الامر
            ثم ان حضرتك تجاوزت بالفعل المرحلة الاولى بفضل الله بصحة وعافية وتستمتع الان بالمرحلة الثانية الاكثر تسامحاً
            اما مرضى السكر مثلى فيضطرون الى الاستمرار على المرحلة الاولى مدى الحياة وليس فقط لاسبوعين كمرضى الارتجاع – والحمد لله على كل شئ

          • متشكرين علي التوضيح الجميل شفانا الله و شفاك و عافاك اللهم آمين يا رب العالمين
            فعلا حضرتك المرحلة الثانية أكثر تسامحا بكثير م المرحلة الأولي
            الحمد لله رب العالمين مر أول يوم صيام من الأيام القمرية بسلام
            عملت العصيدة بطريقة حضرتك
            شوية قمح مغسولين كويس علي ماء بيغلي و أول ما تبتدأ في الغليان مرة أخري طفيت عليها و غطيتها و بإذن الله حآكل منها و أجربها باكر علي الفطار بعد الصيام
            بملح أو شوربة أو فواكه
            السؤال الآن
            طالما العيش و جميع أنواع الخبز من الدقيق القمح
            فبكده لما نستخدم القمح في العصيدة يبقي كإننا بناكل عيش !
            فإيه الفرق بين الخبز و العصيدة ?
            والحمد لله رب العالمين أنا مبسوط إني لاقيت بديل للعيش و مغذي و مشبع
            و لحضرتك جزيل الشكرو التقدير

          • فى العصيدة بناكل حبوب القمح كاملة بكل عناصرها الغذائية – اما العيش فبيتعمل من الدقيق فقط اللى هو القلب النشوى فقط من حبة القمح
            ومع ذلك جرب العصيدة ولو لقيتها تعبتك بلاش منها – المرحلة دى بتجرب فيها – واللى تلاقيه مبيعملش مشاكل استمر عليه وغير كدة بلاش منه
            ايضا ممكن عمل عيش توست صحى فى البيت لو حضرتك عايز تجربه اقول لك طريقته – بس بعد مرور اسبوعين من المرحلة الثانية

          • مشكرين علي سرعة الرد
            بإذن الله حنعمل العيش التوست بعد المرحلة الثانية ..
            بالنسبة للعصيدة بإذن الله موش حأتعب منها
            هي فكرتني بالبليلة إللي أنا كنت بحبها جدا و بإستمرار بنعملها عندنا في البيت بس الفرق السكر إللي في البليلة موش موجود ممكن أستعوضه باللبن فقط و بعض الفواكه زي ما حضرتك قلت ..
            و منذ حواي سنتين كانت العصيدة موصوفة لي فإشتروا لي عصيدة جاهزة من السوبر ماركت مطحونة في كيس داخل علبة ورق مثيلة لعلبة التايد الصغيرة و خلصت علبتين و توقفت بس كنت بأحط عليها سكر ..
            أرسلت لشرائها لم أجدها فإشتروا القمح العادي و عملت منه العصيدة كما في التعليق السابق ..
            فتحت منذ قليل علبة الكرنب المخلل بطريقة البروبيوتيك بعد ٨ أيام من التخليل
            وجدت الآتي :
            – كمية كبيرة من العصير ما أعرفش من التخليل و لا من كيس الميه إللي فوقه ..
            – الكرنب إتخلل و حدقه حلو بالنسبة للضغط العالي ..
            – فيه مادة لزجة شوية علي بعض الكرنب إللي علي وش العلبة ..
            – إبنتي قالت لي إن رحته موش حلوة يعني موش طبيعية ..
            – أكلت منه شوية موش عارف المخلل باظ و لا ما باظش أعمل غيره .. ؟
            ربنا يبارك لك و يبارك فيك

          • بالنسبة للعصيدة بلاش تشترى اى حاجة خارجة من مصنع بصفة عامة لانك متقدرش تضمن ان معليهاش مواد حافظة وكيماويات
            القمح متوفر واضمن
            بالنسبة للكرنب المخلل هو بيخرج منه عصير كثير – دة طبيعى
            اما الرائحة لو كريهة يبقى تلوث ببكتيريا ضارة ومعنى كدة ان المخلل دخله هواء – يجوز كيس الماء مكنش محكم ومغطى كل السطح
            تخلص من الطبقة العلوية اللزجة من الكرنب وصفيه من ماؤه – يجوز تلاقى بقيته كويس
            انا حاكتب قريب موضوع اشرح فيه طريقة للتخليل افضل من كيس الماء
            وبالمناسبة دى انا بابحث عن معلومة ياريت لو تقدر حضرتك او حد من معارفك يساعدنى فيها
            بابحث فى مدى توافر وعاء فخار خاص بالتخليل فى مصر – الوعاء دة بيستخدم فى المانيا وامريكا واوروبا بنجاح كبير – فانا باقول يمكن يكون موجد عندنا فى مصر وخصوصا ان صناعة الفخار صناعة مصرية قديمة وعريقة والفلاحين منتشر عندهم جدا التخليل – فلو حضرتك تعرف اذا كان وعاء التخليل الفخار دة بيتستخدم فى مصر او شفته قبل كدة او سمعت عنه ياريت تقول لى ونحاول ندور عليه ونشتريه
            فى الغرب بيسموه fermentation crock وهو مصنوع من الفخار باحجام مختلفة ويشبه الزير بس صغير – واللى بيميزه عن اى وعاء فخارى آخر ان شفته العلوية مزدوجة – وبين الشفتين مجرى كما لو كانت ترعة او قناية – والغطاء بينزل بين الشفتين دول – وبعدين المجرى بيتملى بالماء – وبكدة الماء بيمنع تماما دخول أى هواء الى الداخل وفى نفس الوقت ثانى اكسيد الكربون المتولد من عملية التخليل حيلاقى منفذ فيخرج من خلال ماء المجرى على شكل فقاعات ودى الطريقة المثلى للتخليل – عندى احساس انه ربما يكون معروف فى القرى المصرية سواءا فى بحرى او فى الصعيد – لكن حتى الان لم اصل لشئ بسبب عدم وجود جذور ريفية لدى للأسف الشديد
            دة فيديو بيوضح شكله وطريقة استخدامه :
            https://www.youtube.com/watch?v=PK5wZba5jv4
            وبيستخدموا معاه حجر على شكل نصفى قرص بيتحط كتُقِّيلَة فوق المخلل عشان يفضل تحت السائل :

          • السلام عليكم ورحمة الله
            أخيرا حأقدر أقوم بخدمة لحضرتك
            يا رب أقدر علشان أرد خدماتك الجليلة
            شاهدت ٣ فيديوهات من الرابط
            وعاء التخليل فيها ما هو إلا برام مصنوع بطريقة معينة و له غطاء من نفس الفخار
            فكرني الموضوع ده من حوالي ١٠ سنين كنت عند أخويا الكبير و كان مريض وهو بيحب ياكل البامية باللحمة في برام في الفرن ووصاني أجيب له واحد حتي كان ناسي إسمه سألت الحاجة عنه قالت لي بيتباع في المحمل رحت سوبر ماركت المحمل في الهرم لاقيت فيه ركن مخصوص للبرامات بس كلها برامات عادية بأشكال مختلفة يعني مدور أو مربع أو مستطيل إشتريت له واحد مدور حجمه متوسط و وديته له وفرح بيه قوي وعمل فيه الأكله إللي بيحبها لإنه غاوي مطبخ
            أعتقد إن البرامات موجودة في السوبر ماركات الكبيرة بأشكال مختلفة
            و بتتعمل في مصر عند الناس بتوع الفخار
            يعني حضرتك ممكن تنزل صور البرام إللي في الفيديو علي فلاشة و تطبعا صور و تسأل عن أي حد جنب بيتك بيعمل الفخار و تديله الصور و هو حيعمل لك نفس البرام بغطاه و ممكن كمان يعمل لحضرتك القرص المقصوم اللي هو التقيلة من نفس المادة بإذن الله لأن الناس دي شاطره قوي لإنها حرفة متوارثة أًجيال و أجيال
            و بيتهيألي موش حيكلف كتير و لو حتتفق معاه إنه يعمل عدد كبير حيكون أرخص بكتير و حضرتك تقوم بتوزيعها للي عايز يشتريها تبقي عملت خير في المحبين للبرو بيوتيك و لو البرام ده موش موجود في مصر فعلا يبقي حضرتك أول من يقوم بتصنيعه و عرضه في السوق المصري بس حاسس إنك حتلاقيه في المولات الكبيرة بعون الله رب العالمين
            و حأسأل معارفي عليه جايز يكون حد عنده خلفية غير إللي قلته لحضرتك

            سؤال بعد إذن حضرتك
            شاب عنده ٢٠ سنة طالع له بقع بنيه في جسمه و راح لدكاتره كتير و مستشفيات كتير و ما راحتش عارف إن ده موش تخصصك لكن بأقول جايز تكون عارف وصفة ربنا يشفيه عن طريقها
            و لحضرتك كثير الشكر و تقدير

          • الف شكر على المساعدة – ياريت كان فيه برام بشفتين – لكن كلهم عاديين
            الظاهر فعلا مفيش غير طلب انه يتعمل عمولة عند بتوع الفخار
            خليه يجرب يدهن البقع الغامقة بواحد من التالى او خليط منهم ويسيبهم على الجلد 20 دقيقة على الاقل :
            – عصير ليمون مع لبن رايب
            – عصارة ورق الصبار (الو فيرا)
            – عصير بصل
            – لحم فاكهة البابايا
            – مكعب سكر
            – عصير طماطم
            – زيت الخروع

          • السلام عليكم و رحمة الله و بركاته
            الحمد لله رب العالمين عدي تاني يوم من صيام الأيام القمرية بسلام بفضل الله رب العالمين
            أشكرك شكرا جزيلا علي المعلومات الخاصة بالشاب وربنا يكرمك و يذيدك علما
            إفتكرت لما إشتريت البرام بتاع طاجن البامية لأخويا من ( سوبر ماركت المحمل ) كان فيه حلل من الفخار يعني برام بغطاء من نفس الفخار و بيلمعوا كما في الفيديو لكن موش فاكر حاجة بشفتين
            عموما دي كانت من سنين كتير و جايز تطوروا شوية في الصناعة دي و لو أي حد يمر علي المولات الكبيرة و السوبر ماركات الكبيرة جايز يلاقيه أو يلاقي حاجة شبيهه له
            و ممكن أعتقد بتوع الفخار أو بتوع الخزف يعملوه الناس إللي عندهم أفران لصناعة الفخار أو الخزف و ربنا حيسهل إن شاء الله
            الحاجة عندنا شمت المخلل قالت لي موش بايظ و أكلت منه حته وقالت لي دلع قوي علشان هي مدمنة طرشى حادق و حراق
            النهارده مع الفطار أكلت القمح مملح بديلا عن العيش و كان طعمه كويس حوالي ملعقة فقط بس كان محصون شوية هل ممكن يتغلي جامد زي البليلة علشان يبقي طري و لا ده حيبوظ مكوناته ?
            آسف علي الإطالة
            و لحضرتك جزيل الشكر و العرفان

          • نصيحتى لحضرتك لا تزود الملح عن 1.5% للكرنب – و2% للفت والخيار عشان الضغط وعشان الملح الاقل يجعل البكتيريا اللبنية المفيدة للامعاء وللمخ تتكاثر اكتر فى المخلل من لو كان الملح كثير
            مفهمتش معنى كلمة “محصون” هل تقصد ان القمح بيمضغ شوية مش دايب؟
            كدة افيد للحفاظ على قيمته الغذائية – وكمان عشان متاكلش منه كتير (:

          • موضوع الملح دة نسبى حسب تعود كل شخص – اصلا احنا بنتولد نستطعم الاكل طبيعى كما هو بدون اضافة ملح ولا سكر – لكن لما يبدأوا يحطولنا ملح او سكر فى الاكل والشرب بنتعود عليه فلما ناكل حاجة بدونهم نقول دلع او ماسخ – وانا قمت بتجربة على نفسى وامتنعت عن الملح فى الاكل تماما لمدة اسبوع لم احتاج فيه الى دواء الضغط – وبعد اسبوع مجرد ذرة ملح فى اى اكل يشعرنى انه حادق جدا صير سبحان الله (نفس الشئ ينطبق على السكر ايضاً) – والملح من السموم البيضاء الثلاثة المعروفة طبياً : الدقيق – السكر – الملح
            فكلما قللنا من الملح كان افضل – وللعلم الكمية المفروض يستهلكها البالغون من الصوديوم 2.3جم يوميا او ما يعادل معلقة صغيرة من الملح لا أكثر – مع ملاحظة ان كل الخضروات والفواكه واللحوم بها نسبة صوديوم ودول مفروض يتخصموا من المعلقة دى

          • بارك الله في حضرتك عل المعلومات القيمة الجديدة بالنسبة لي
            محصون زي ما حضرتك قلت يعني عند مضغه تحس إن فيه حصا في الفم يعني ما إستواش كويس
            الملح و أي حاجة حادقة من مسببات الضغط العالي عندي هو و المرئ الإرتجاعي إتحجزت في المستشفي من ٢٠ سنة إنعاش بألم شديد جدا في الصدر عملوا قسطرة قلب و مع أدوية القلب و الضغط مدة طويلة إستمر الألم موجود فحولوني جهاز هضمي و أول منظار أثبت قرح المعدة و المرئ الإرتجاعي لإن آلام المرئ الإرتجاعي شبيهة تماما بالذبحة الصدرية و عرفنا السبب و العلاج حتي الآن و ربنا يشفينا و يشفي كل مريض يا رب
            بالنسبة للبرام أو وعاء التخليل ممكن تعمله في مصر عند بتوع الخزف أو الفخار و ممكن الأسرع و الأتقن تطلبه ديليفري من موقع أون لاين إسمه ( أمازون ) غالبا بيبقي الرابط بتاعه موجود في أي متصفح ضمن المواقع الهامة و الشهيرة
            إعرف إسم وعاء التخليل الصحيح و إبحث عنه في أمازون بيبيعوا كل حاجة دليفري زي موقع سوق أو جوميا في مصر و لو موجود حيبعتوه لك لغاية البيت و كده حيكون أحسن من صناعته في مصر لأنها قد تكون غير متقنة شوية
            فاضل ٩ أيام بعون الله و المرحلة الثانية تخلص و نعمل عيش التوست بإذن الله رب العالمين
            و لحضرتك جزيل الشكر و العرفان

          • الحمد لله لا تقلق من القرحة طالما مش بتاكل نشويات وسكريات الا القليل ومداوم على اطعمة البروبيوتيك مثل مخللات البروبيوتيك – جبنة قريش فلاحى – رايب فلاحى
            سبب القرحة والارتجاع هو كثرة افراز انزيم اسمه اميليز amylase اللى بيفرزه الفم والبنكرياس لهضم الكربوهيدرات اللى بناكلها – الادوية بتحاول توقف افرازه ودة ضد الطبيعة البشرية – زى مثلا لو حد عنده ضغط عالى فنديله دوا يوقف ضغط قلبه – تفكير عجيب!
            الحل الامثل هو وقف السبب – اللى هو كثرة تناول الكربوهيدرات
            عشان كدة فى اول مرحلة من العلاج بنوقف تقريبا الكربوهيدرات عشان المريض يشفى من الاثار المتراكمة والتهابات معدته وامعاؤه تاخد فرصة تلتئم – وفى المرحلة الثانية بيبتدى ياخد كميات قليلة من الكربوهيدرات المركبة – ويبدأ بعد اسبوعين ياخد كميات اكتر عشان بقى قادر على التعامل معاها – لكن طبعاً مش بالكميات اللى سببت المشاكل من الاصل وابدا مش من نوع الكربوهيدرات البسيطة
            باذن الله بعد 9 ايام تقدر تاكل عيش خاص وتوست – لكن بشرط انه يتعمل فى البيت بمواصفات خاصة جدا – فحضرتك محتاج تحضر له من الان المقادير المذكورة هنا

          • السلام عليكم و رحمة الله و بركاته
            آسف عل التأخير في الرد لمشاغل عائلية شديدة
            في تعليق مني لحضرتك و إستفسارات في صفحة طريقة عمل الخميرة
            حأحاول إيجاد وقت لعمل الخميرة في البيت طمحوله فقط
            موش عارف ما هو ال starter و كيفية الحصول عليه
            كيف ممكن أن نزن ١٠ جرام دقيق لإن الميزان عندي مش حساس و يوزن بالكيلو و حتي عشرة كيلو فقط مقسم إلي شرط مئتين جرام علي التوالي
            أعرف أن الملعقة الصغيرة ٥ جرام و الملعقة الكبيرة ١٥ جرام و لكني لا أعرف هل وضع الدقيق مساح يعني حتي حواف الملعقة فقط و نمسح أي نزيل الزيادة بالمعلقة و لا معورم يعني علي شكل هرمي فوق الملعقة
            و لحضرتك جزيل الشكر و العرفان

          • انا قلقت على حضرتك اليومين دول – الحمد لله انك بخير ويارب تكون المشاغل العائلية اتقضت على خير
            starter مقصود بيه الخليط السابق – عموما انا عدلت الصفحة ورديت على حضرتك هناك

          • السلام عليكم و رحمة الله و بركاته
            متشكرين جدا يا حاج محمد علي الإهتمام بي و القلق عليا
            إبني بينقل في شقته الجديدة مع أسرته و كنامعاه و حتي الآن في متطلبات له فمجهود شوية جامد و كمان الحاجة تعبت و ديتها دكنور إستشاري قلب غير إللي هي متابعة معاه فطلب عملية أسترا ثانية لتركيب دعامات تانية مع إللي مركباها علشان عندها شرايين في القلب مسدودة محتاجة توسيع شرايين أو تركيب دعامات جديدة مع إنها لسه عاملة الدعامة من حوالي سنة واحدة فالحمد لله رب العالمين
            فهل يوجد شراب أو فاكهة أو مخلوط طبيعي لتوسيع الشرايين دون الضرر باللي عنده سكر ?
            تركت لحضرتك رقم الواتس آب بتاعي في صفحة الحصول علي الخميرة البرية و يسرني جدا التواصل مع أستاذي الذي علمني كثيرا من المعلومات التي لم لم أكن أعرفها من قبل و أفادتني كثيرا
            و لحضرتك جزيل الشكر و العرفان بالجميل

          • السلام عليكم ورحمة الله و بركاته
            كتبت لحضرتك رقم الواتس آب بتاعي في صفحة الخميرة البرية و طريقة عمل عيش صحي و توست صحي علشان طالب خميرة برية و لكن حضرتك ما رديتش عسي المانع يكون خير بإذن الله

  2. السلام عليكم و رحمة الله و بركاته
    برجاء المعذرة
    نسيت أشكر حضرتك علي مساعدتي بعد الله سبحانه و تعالي علي إجتياز المرحلة الأولي بفضل الله رب العالمين بسلام
    اللهم صل و سلم و زد و بارك عليك يا سيدي يا رسول الله يا سيدنا محمد يا نبي الله و علي آلك و أصحابك و تابعينك بإحسان إلي يوم الدين

  3. ممكن لو سمحت الثلاث وجبات في المرحله الاولي يبقوا ايه لو بانواع الاكل والبروتين لوسمحت علي شان الواحد في لبس في الانواع شويه ارجو التوضيح بالنسبه لمصادرالببروتين وهل العدس والفول من البروتين

  4. السلام عليكم
    أنا ولله الحمد فى بداية المرحله التانيه وكنت عايزاعرف بالنسبه مثلا للفواكه المفروض انى اجرب كل مجموعه لمدة يومين او 3 ولكن انت ما قولتش الكميه اللى المفروض ابدأ أكلها من الفاكهه ونفس الكلام للبقوليات وهل فيه كمية كربوهيدرات فى الاكل ما ينفعش اتخطاها يوميا لانى أكيل ولو سيبت نفسى هاكل كميات كبيره

    • المرحلة الثانية بتختبر فيها نفسك – ابدأ بثمرة او ثمرتين فى اليوم واذا لم يسببوا لك مشاكل زود العدد بالتدريج – نفس الشئ للبقوليات ثم الارز ثم البطاطس اختبر قدرتك الان على تحمل كل منهم لوحده – لكن ابتعد نهائيا عن العيش وكل ما يصنع من دقيق وكذلك الحلويات

        • كل صنف لوحده افضل لمدة يومين ثلاثة لكل صنف – ابدأ بالفواكه ثم البقول ثم الارز ثم البطاطس – ودائما بالنهار وبعيد عن فترات نومك – اما بالليل فاقتصر على الدهون الطبيعية والبروتينات والخضروات فقط كما فى المرحلة الاولى

          • السلام عليكم
            بالنسبه لباقى اصناف الفاكهه (موز-تفاح-عنب-مانجه-…..) لازم اختبرهم برضه ولا اكلهمبدايه من المرحله التانيه عادى

          • اعتقد كدة بقالك 10 ايام فى المرحلة الثانية – تقدر تاكل اصناف الفاكهة عادى لكن بالنهار بلاش بالليل ولا قبل النوم
            اخبارنا ايه دلوقتى؟ هل اختفت متاعب الارتجاع تماما؟ وللا لسة فيه اى اعراض؟
            وهل وجدت حاجة اكلها حاليا بيتعبك؟

          • فعلا و لله الحمد بقالى اكتر من 10 أيام و لله الحمد والفضل لربنا ثم لحضرتك و جزاك الله خيرا
            والمتاعب اختفت بنسبه كبيره و لله الحمد
            لما بزودمن أكل حاجه معينه بحس بالم بسيطجدا فى منطقة الصدر وانا حاليا باختبر البقوليات.

          • الحمد لله وربنا يتم شفاك التام على خير باذن الله
            اكتب عندك 3 قوائم بالحاجات اللى بتسبب لك أى الم ولو بسيط عشان تبقى عارف :
            – ايه تتجنبه خالص
            – وايه اللى تقلل منه
            – وايه اللى مبيتعبكش وتاكله عادى
            فترة الاختبار دى مهمة جدا لك عشان باذن الله تفهم جسمك وتتعامل معاه صح دائما

          • السلام عليكم
            بالنسبه للنشويات أبدأ بكم جرام منها فى اليوم الاول وكم فى التانى وكم فى اليوم الثالث

            انا حاسس ان وزنى بيقل وانا مش محتاج للتخسيس فى الفتره الحاليه وكمان كتلتى العضليه أصبحت ضعيفه جدا جدا ايه رأيك ايه الحل لتثبيت الوزن وبناء الكتله العضليه من جديد مع العلم باننى حاولت اتمرن أثقال على خفيف منذ أكثر من شهر (قبل بداية النظام الخاص بيك) ولكن أعراض الارتجاع كانت بتزيد جدا والدكتور وقتها منعنى من أى تمارين نهائيا وقالى المسموح فقط هوالمشى المعتدل

          • يبدو انك مش بتهتم بالدهون والبروتينات مع ان دة ضرورى فى نظامنا بدلا من النشويات – بالذات البروتينات محتاج تهتم بيها لبناء عضلاتك
            ابدأ تمارين رفع الاثقال الان وباذن الله مش حتلاقى اعراض ارتجاع خلاص
            تجنب النشويات الصافية وتناول بدلا منها النشويات المركبة مثل العدس والفاصوليا واللوبيا والفول والطعمية – وممكن ارز لو جربته ولم يتعبك – بس كل دة يكون بعيد عن اوقات نومك
            جرب مثلا تاكل كشرى اسكندرانى تعمله فى البيت

          • هل فيه نظام غذائى معين تنصحنى بيه
            مع العلم انى باكل بروتينات

          • لأ بس انصحك تكثر من تناول البيض والفراخ واللبن الرايب الفلاحى (وليس المعلب) والجبنة القريش الفلاحى وشرش اللبن الفلاحى ملئ بالبروتينات – وحاول تتعرض لشمس الشروق والغروب لاكتساب فيتامين دال

          • السلام عليكم
            أنا بدأت من اليوم فى تناول حبة تمر واحده يوميا على أن أزود واحده يوميا كل أسبوع يعنى الأسبوع الثانى ان شاء الله يكون حبتين فى اليوم والثالث 3 حبات يوميا حتى الوصول الى 7 حبات يوميا كما فى حديث الرسول صلى الله عليه و سلم.
            ايه رأى حضرتك

  5. السلام عليكم وشكرا لمجهودكم الكبير والمفيد للجميع
    أنا أعاني من كحّة مزمنة وجربت كتير علاجات ربو وحساسية لعدة سنوات إلى أن تبين معي أنني من جماعة الإرتجاع المريئي بالصدفة وبعمل منظار . وتناولت الأمبيرازول لأكثر من سنة ولكن الإرتجاع
    تضاعف وأصبح أكثر إزعاجا إلى أن توقّفت عن تناوله من نفسي ولجأت إلى الطب البديل والأعشاب والحمد لله ولاحظت تحسّن خفيف وان شاء الله أجرب نصائحكم وأزودكم بالنتائج قريبا ولكم الشكلر .

    • يعنى كل المكتوب دة مش عاجب حضرتك ومش معترف بيه كنظام غذائى؟ – مش عارف اعمل ايه اكتر من كدة الصراحة
      ثم ان حضرتك خلصت المرحلة الاولى بدون ما تقول لى حرف واحد عن عملت ايه والنتيجة كانت ايه معاك – يصح كدة يا جلال باشا؟

          • حضرتك انا وزنى ٦٥وطولى ١٧٠ وعندى ٣٩سنه والارتجاع مبهدلنى خصوصا حرقه الحلق والتهابات الفم والارتجاع ده من اكتر من ١٠سنوات وزهقت من الدكاتره والعلاجات دون جدوى انا بشتغل علىى اتوبيس سواق هل الحميه دى ممكن تمشى معايه

          • ان شاء الله النظام هنا حتنتهي معاه كل متاعبك
            اهم حاجة الالتزام بكل التعليمات واهمها الابتعاد تماما عن العيش والرز والمكرونة والبطاطس والبقوليات كالفول والطعمية بالذات اول اسبوعين
            بس انت هنا في المرحلة الثانية
            ابدأ باتباع المرحلة الاولي اولا هنا:
            https://my2cents.gawaher.com/7748
            وبعد ما تبدأ باذن الله اكتب لي اول باول تطورات حالتك وانا اتابع معاك لغاية ماتبقى زى الفل ان شاء الله
            كل اللى طالبه منك انك تواصل ابلاغي بتطورات حالتك حتى الشفاء التام باذن الله – ومتقطعش التواصل زى ما عملت ام عمار وغيرها كتير ممن ساعدتهم بفضل الله على الشفاء

          • حج محمد انا انتهيت من المرحله الاولى والحمد لله بطنى خفت بنسبه 50% باقى بس الحرقان الفم والحلق دلوقتى انا مش فاهم ايه الكربوهيدرات دى الى اخفض منها ممكن اعرف افطر ايه واتغدى ايه واتعشا ايه زياده عن المرحله الاولى يعنى اكل فول وطعميه وفاكهه وايه نوع الفاكهه الى اقولها وكان قطعه فى اليوم اكلها واكل قشطه مع تقالى وطبيخ عادى ولا يتعارضو مع بعض واسف على الاطاله

          • الحمد لله مبروك اكمالك المرحلة الاولى
            بالنسبة لحرقان الفم والحلق انت كان عندك ارتجاع بلعومي حنجري (الارتجاع الصامت) ودة للاسف اسوأ من ارتجاع المرئ اللي عصارة المعدة فيه بتطلع للمرئ فقط وتتوقف. اما انت فكانت العصارة بتكمل طلوع وتوصل للبلعوم والحنجرة وممكن تدخل في صدرك وتعمل تٱكل في الشعب الهوائية
            الحمد لله انك جت لي ولحقتك بفضل الله
            بس اصبر التهاباتك حتاخد وقت شوية عشان حالتك من سنين والادوية بهدلتك
            شهر كمان وباذن الله الالتهابات تلتئم والحرقان يختفي تماما بشرط الالتزام بنظامنا ومقاومة اى رغبة في العيش والسكر
            الكربوهيدرات هى النشويات والسكريات
            في المرحلة الثانية تاكل زى الاولى لكن يزيد عليها انك تجرب مثلا صنف واحد فاكهة لمدة 3 ايام عشان تشوف اذا كانت بتتعبك وللا تستمر عليها
            وبعدين تجرب صنف تاني برضه لوحده 3 ايام وهكذا
            دي مرحلة تجارب بتكتشف فيها بنفسك جسمك بيتعب من ايه عشان تتجنبه – لان كل جسم بيختلف عن التاني – واللى مش بيتعبك تضمه لقائمة المسموحات وهكذا
            وبعدين تجرب البقول مثل الفول والطعمية والفاصوليا البيضا واللوبيا – جرب حاجة منهم لوحدها 3 ايام بنفس طريقة الفاكهة
            وبعدين تجرب الشعير 3 ايام وتشوف بيتعبك وللا تستمر عليه
            في النظام دة مفيش فطار وغدا وعشا محددين – كل اللى يعجبك في اى وقت – المهم تتعشي بدري ومتاكلش قبل النوم
            القشطة كلها في اى وقت مفيش مشكلة

          • حج محمد انا اكلت أمس ٥فراولات وبسله اليوم كمان اكلت ٥فرولات كمان بس الحمض زايد جدا فى حلقى ممكن يكون من الفراوله؟

          • كدة غلط – لو قريت التعليمات كويس حتلاقي انك لابد تجرب اضافة حاجة حاجة – يعني مينفعش تجرب اضافة فاكهة وبقول لطعامك في نفس اليوم – كدة انت معرفتش مين فيهم اللي تعبك
            اعتقد ممكن تكون البسلة
            استمر على الفراولة 3 ايام عشان تقدر تعرف اذا كانت تناسبك فتضمها لقائمة مسموحاتك
            ومتاكلش بقوليات دلوقتي (بسلة – فول – طعمية – فاصوليا بيضا – لوبيا)
            ابدأ بالفواكه الاول – صنف واحد لمدة 3 ايام وبعدين صنف تاني وهكذا

  6. حج محمد انا جبت جبنه شيدر بس الدمياطىى دى ياترا فيها ضرر مكتوب معجون جبنه شيدر مطبوخ بالفلفل يحتوى على دهون نباتيه وطبيغيه فلفل زبد حليب زيوت نخيل املاح استحلاب ،se لبن فرز ٣٪ لون طبيعى e160bسروربات بوتاسيوم ١٪. د/م .ص ٤٥٪ كامله الدسم م . ق م. ٢٠١٣/١١٣٢ نسبه الاكتوز لاتزيد ٧٪ الحفظ والتداول ٤م اكل منها ولا لاء لان التانيه سعرها غالى

    • لأ اوعى تاكل منها
      دهون نباتية دى الكلمة اللطيفة للمعنى الحقيقي اللى مش عاوزين الناس تعرفه عشان تتباع: زيوت مهدرجة – ودي مصيبة صحية
      أى اجبان رخيصة نباتية الدهن ابعد عنها تماما – اشتري جبنة قريش فلاحي احسن او جبنة رومي – حتى القريش بتاع السوبرماركت بيغشوها بدهون نباتية – اشتريها فقط من فلاحة
      او اشتري جبنة رومي لانهم لحسن الحظ مبيعرفوش يغشوها.. حتى الآن

  7. حج محمد اكل قرنبيط ولا لاء ولو اه اكله مقلى ولا فى صانيه بطماطم وبهارات واشرب لبن مع تمر ولا لا انا كده بقالى ٢٥يوم بدون سكريات ورز وخبز وفى مشكله بنواجهنى فى التعليق بيفضل يفتح اعلانات لما اجى انشر مفيش فيس نتواصل عليه أو. واتس شكرا انا فى نسبه تحسن عن الاول الحمد لله بس نشفت من قله الاكل

    • كل قرنبيط مقلي صينية زى ما تحب
      جرب التمر بس بلاش يالليل – ولو مش بيتعبك اكتبه ضمن المسموحات المناسبة ليك
      جرب تاكل رز لو متعبتش منه اكتبه برضه في قائمة المسموحات
      ولا تنسى: متجربش حاجتين في نفس الوقت – أى حاجة جديدة جربها 3 ايام لوحدها عشان تقدر تحكم
      الاعلانات بتحقق لى دخل بسيط وبتساعد في تكاليف الموقع فمعلش استحملها

  8. حج محمد انا كده خلصت الشهرين اكل كل الاكل ولا اكلات معينه ما اكلتش السكريات ولا حلويات خلال شهرين ولا مكرونه وطبعا حسيت بتحسن الحمد لله بنسبه حلوه موجود حموضه بس مش الحلق زى ماكانت الاول أو على الأقل مرتاح نفسيا بس طبعا محروم من الخبز والأكل كله

    • الشعير حبوب تشبه القمح اشتريها من العطار صحيحة بقشرها واسلقها ساعتين وكلها مع الاكل بدل العيش والرز
      البسكوت ممنوع لان فيه دقيق وسكر.
      اى دقيق او سكر مضر ليك العدس جرب تاكله وشوف
      لسان العصفور مكرونة برضه ممنوعة

  9. بصراحه بعد أكل الرز ٣ايام طلعلى فطريات كتير فى الفم وحاسس انها فى معدتى كمان وتعب وثقل زى الاول معنى كده انى مش عامل رز ولا مكرونه ولا عيش ولا بسله ولا بطاطس ولا ايه الحل حاج محمد

    • الظاهر ان. حساسيتك ضد النشويات عالية
      طبعا وقف الرز مش حينفع تاكله
      استمر يومين على المرحلة الاولى عشان تعالج اللي حصل
      وبعدين جرب البطاطس وشوف
      انت في مرحلة تجارب بتكتشف فيها ايه اللي يناسبك وايه اللي يتعبك
      ومتقلقش. حتى لو كل النشويات بتتعبك انت ممكن تعيش من غيرهم عادي
      ناس كتير انا منهم عايشين من غيرهم والحمد لله صحتنا زى الفل وبناكل اكلات لذيذة ومشبعة وآخر جمال
      جربت تاكل كول سلو ؟ اعمله من غير سكر وكله مع وجباتك مشبع ولذيذ وصحي
      الطريقة هنا:
      https://my2cents.gawaher.com/22234
      وكمان جرب بديل المكرونة – طبق لذيذ ومناسب ليك – الوصفة هنا :
      https://my2cents.gawaher.com/22244

  10. حج محمد انا من ساعت ما اكلت الرز وعندى حموضه هل هاتستمر كتير يمكن علشان باكل باليل بحكم شغلى طبيخ ومسبك وبنام واليوم دخلت السوبر ماركت اشترى شي اكله ماعرفتش هل الفطير والشيكولاته والعصير والنايتى كله ممنوع طيب اكل ايه غير البيض والجبن والفراخ والسمك

    • طبعا مانت عارف الفطير والشيكولاته والعصير والنايتى كلهم ممنوعين
      تاكل كل حاجة في الدنيا ما عدا الممنوعات فقط
      وقلنا عشان صحتك ما تاكلش اى اكل معمول في مصنع
      انت شكلك زهقت من طريقتي صح؟
      متنساش انك الارتجاع عندك مزمن من 10 سنين ولو عايز تخف خالص وميرجعلكش لازم تضحيات وتغيير اسلوب اكلك
      تاكل ايه اقرا الصفحة دي:
      https://my2cents.gawaher.com/9545

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.