آخر تحديث : 01-12-2017 الساعة 02:49 م
برطمانات التخليل لها مشاكل ومش كل مرة بينجح التخليل فيها – المشكلة الاساسية ان الهواء بيدخل فيها ودة بيسبب فساد الطبقة العليا من المخلل بغزو بكتيريا ضارة تبدأ تنتشر فى باقى البرطمان – نجاح التخليل بيعتمد على اننا نعزل الطبقة العليا من المخلل عن الهواء
لذلك انا ابتكرت طريقة ناجحة اكثر من البرطمانات : التخليل فى حلة – حتلاقوها اسهل بكتير من التخليل فى البرطمانات – بشرط اتباع شروط نجاحها
عشان التخليل فى حلة ينفع ويدينا مخلل ناجح محتاجين الاتى :
- حلة غويطة (عميقة) – تكون ستنلس ستيل او زجاج – او حلة ضغط
- محتاجين 2 غطاء – الغطاء الخاص بالحلة وغطاء آخر او طبق ستانلس مسلطح اصغر بضع ملليمترات من فتحة الحلة بحيث ينفع ينزل جوة الحلة ولا يترك فجوة كبيرة بينه وبين الجدار الداخلى للحلة
- برطمانات زجاجية بغطاء محكم – او علبة بلاستيك بغطاء
- فوطة (فى حالة استخدام حلة ضغط لن نحتاج للفوطة)
لو قدرنا نوفق حلة مع غطاء او طبق يادوبك ينفع يدخل وينزل فيها بدون ما يسيب فجوة كبيرة حواليه يبقى احنا كدة جاهزين لتخليل ناجح فى كل مرة باذن الله
الطريقة
- نعقم الحلة والغطاء والبرطمان بالبخار – وذلك بوضع الغطاء الاصغر والبرطمان الزجاجى داخل الحلة مع قليل من الماء ثم وضع الحلة وعليها غطاءها على النار ليغلى الماء 5 دقائق
- نعقم ايضا طبق بلاستيك كبير من الداخل وذلك باننا نعرضه للبخار الخارج من الحلة بعد رفع غطاءها
- نصفى الماء ونضع كل منهم مقلوبين فى صفاية حتى يبردوا ويجفوا
- نقطع ما نريد تخليله فى الطبق البلاستيك ثم نرش عليه ملح بالكمية المناسبة لوزنه (1.5% او 2%) ونتركه ساعة حنلاقيه جاب ماء فى قعر الطبق – نقلب من تحت لفوق ونتركه ساعة اخرى
- نصب المخلل وماؤه – اللى خرج منه – فى الحلة
- نجهز علبة او برطمان او اكثر بملؤهم بالماء ونحكم غلقهم ونتأكد انهم لا يتسرب منهم أى نقط ماء لو قلبناهم
- ندخل الغطاء جوة الحلة بحيث يغطى المخلل ونضغط عليه بايدنا حنلاقى ماء المخلل بدأ يطلع لفوق
- نحط برطمانات الماء فوق الغطاء الداخلى كثقل يضغط على الغطاء فيضغط بدوره على المخلل ليضمن ان ماء التخليل يبقى دائما فوق المخلل لعزله عن الهواء
- نغطى الحلة بفوطة مبلولة ومعصورة ثم بغطاء الحلة الخارجى فوق الفوطة – وكل يوم لما تنشف نبلها ونعصرها ونحطها تانى بين الحلة وغطاءها (اذا كنا حنستخدم حلة ضغط لن نحتاج الفوطة – فقط نحكم غلق حلة الضغط)
- فى حالة تخليل اللفت نترك الحلة بدون الغطاء الخارجى لأن اللفت يكون به غاز كبريتيد الهيدروجين ذو الرائحة النفاذة (أشبة برائحة البيض الفاسد) – لذا علينا أن نسمح لهذا الغاز بأن يخرج ويتبدد فى الهواء خلال يومين