آخر تحديث : 17-11-2017 الساعة 06:57 م

(من وصفات الاء الجبالى – مع تعديلات طفيفة)

مش قادر استوعب كمية الاستغلال والجشع اللى باكتشفهم فى كل مرة أجرب اعمل فى البيت حاجة جديدة بدلا من شراءها جاهزة – لأفاجأ بالهوة السحيقة بين سعر الجاهز وبين التكلفة الحقيقية

فمثلا صوابع زينب – الحلوى اللذبذة اللى كلما بنحبها – وصل سعرها ل50ج الكيلو – ابنى طلب نشتريها من هايبر شهير لما كنا هناك من يومين – فاقنعته انى اعملها له فى البيت احسن – وفعلا وجدت طريقة سهلة جدا للرائعة الاء الجبالى – عملتها باللاغم من ان مكنش عندى دقيق سميد – ومع ذلك طلعت تحفة بجد عجبت كل البيت – والمفاجأة ان الكيلو منها كلفنى 5ج فقط – بدلا من 50ج – أى عشر الثمن! ليه بيعملوا فينا كدة ؟ وايه كم الجشع الرهيب دة ؟ عرفتوا بقى ليه بأدعوكم دايما اننا نعمل اكلنا فى البيت ؟ مش بس موفر بالهبل – لأ وكمان حاجة نظيفة وطازجة وعارفين مكوناتها بدون اى غش تجارى او ميكروبات او تلوث او مواد ضارة كثيرا ما توجد فى الاكل الجاهز

مقادير العجينة

• 300ج دقيق
• م ص خميرة
• ربع م ص ملح
• م ك سكر
• 70ج زيت دوار شمس
• 100جم ماء دافئ

مقادير الشربات

• ثلاثة ارباع كوب ماء
• كوب سكر
• نقطتين ليمون

الطريقة

• اول شئ نسخن الماء والسكر ونقطتين ليمون على النار وبعد 3 دقائق من بدء غليانهم نطفى النار ونتركهم يبردوا
• بعد ذلك نبدأ نخلط مكونات الناشفة للعجينة مع بعض ونقلب كويس
• نضيف الماء والزيت ونقلب كويس
• نعجنها دقيقتين بايدينا
• العجينة دى بتعمل 48 صباع زينب – فلو مش محتاجين كل دة يا اما نعمل نصف المقادير – او انا باقسم العجينة واعمل بالنصف كورة اشيلها فى كيس فى الثلاجة لبكرة – والنصف التانى من العجينة نغطيها حتى تصل لضعف حجمها (حوالى ساعة)
• نقسم العجينة نصفين – وكل نصف ربعين – وكل ربع ثمنين – وكل ثمن نعمل منه 3 كور – يبقى المجموع عندنا 24 كورة
• بعد ماكورنا كل قطعة بحجم عين الجمل نحطها على مصفاة بلاستيك او مبشرة ونلفها واحنا بنضغط بصوابعنا عليها عشان تاخد الشكل المحبب لصوابع زينب

• نرصها فى صينية ونغطيها نصف ساعة
• نحمرها فى زيت متوسط الحرارة على الوشين حتى يصبح لونها ذهبى فاتح خفيف – وليس ذهبى غامق (فى الشربات لونها حيبقى ذهبى غامق)
• نصفيها من الزيت بسرعة ثم نضعها فى الشربات البارد – ونقلبها  فيه بمعلقة لتكتسى بالشربات من كل الجوانب وعلى طول ننتشلها من الشربات الى طبق التقديم (لا نتركها فى الشربات اكثر من دقيقة عشان ما تبردش ولا تشرب شربات بزيادة)
• تقدم ساخنة او باردة
• كدة حيبقى عندنا عجينة فى الثلاجة ليوم تانى – نبقى نخرجها ونسيبها تهدى نصف ساعة وبعدين نقسمها كور ونشكلها ونغطيها نص ساعة تمام زى اول يوم وبعدين نحمرها ونحطها فى باقى الشربات المتبقى

وبالف هنا وشفا
(بس متنسوش نفسكوا وتخلصوها كلها – هو طلب انا عارف صعب – نظرا لطعامتها المذهلة – لكن برضه حاولوا !