ملحوظة : هذه الوصفة مازالت تحت التجربة – باذن الله عند التأكد ان نتائجها كويسة حامسح السطر دة

كتير بيكون عندنا لحمة مكعبات ومفيش مفروم – وطبعا فرم اللحمة فى البيت حاجة مش سهلة – غانا ابتكرت طريقة سهلة جدا للحصول على لحمة مفرومة – هى الحقيقة احسن من اللحمة المفرومة واطعم بكتير – لحمة نِسَل shredded – نستخدمها بدل اللحمة المفرومة فى كل حاجة – مع المكرونات – شاورما – حواوشى – بيتزا – معجنات – محاشى وكل حاجة بنحتاج فيها اللحمة المفرومة

الطريقة سهلة جدا:

• حنعمل مكعبات لحمة بالبصل – بس الاول حنقطع اللحمة شرائح رفيعة – مش رفيعة قوى – يعنى مثلا مكعب اللحمة نقطعه 4 شرائح او 5 على قد ما نقدر – كل ما قطعناه ارفع كل ما اللحمة تستوى اسرع
• نخرط بصلة وفلفلاية رومى وطماطماية على اللحمة ونحط الحلة على نار هادية شمعة ونغطيها
• لما اللحمة تستوى وهى لسة تماسكة ما اتهرتش نصفيها من البهريز فى طبق
• لما اللحمة تهدى شوية نحطها فى الكبة ونضربها نبضات قصيرة لغاية ما تبقى نسل فتافيت shredded

بكدة تقدر نستغنى عن شراء اللحمة المفرومة ومشاكلها – الجزار مفرمته مش نضيفة – اللحمة مدهننة – ريحتها مش حلوة – لونها متغير – نقدر نقول الوداع لكل المشاكل دة ونعمل دايما لحمة نسل من مكعبات اللحمة بالبصل – انظف واطعم بكتير – جربوها وان شاء الله حتدعولى

وبالف هنا وشفا