اسهل طريقة لتصفية زيت التحمير واعادة استخدامه

طبعا الطريقة المثالية هى اننا نستخدم زيت جديد فى كل مرة نحمر فيها – لكن دة كان زمان – دلوقتى اسعار الزيت بقت نار – عشان كدة اغلب الناس بتستخدم زيت التحمير مرات عديدة ولا تتخلص منه بل فقط تزوده لما يقل فى الطاسة وخصوصا زيت تحمير البطاطس – المهم اننا لانسمح للزيت ان يصل لدرجة الغليان ويطلع دخان لانه في الحالة دي بيتحول لمادة ضارة ويجب التخلص منه – لكن المشكلة ان الزيت مع اعادة الاستخدام  لونه بيغمق ودة بسبب فتافيت الاكل اللى بتتحرق كل مرة لما نقلى فيه وبالتالى تخلى لونه غامق وريحته مش حلوة – انا كنت باستخدم مصفى سلك لتنقية الزيت لكن التفافيت السوداء اللى زى النقط فى الزيت كانت بتعدى من المصفى لانها شوائب دقيقة جدا

الى ان توصلت لطريقة بسيطة وهايلة ابتكرتها لتنقية الزيت من كل بقايا الطعام مهما كانت دقيقة – بتحافظ على الزيت فاتح وريحته تبقى كويسة مهما تعددت مرات استخدام نفس الزيت

الطريقة

  • نحتفظ بزجاجة زيت فاضية منرميهاش
  • نضع فى فوهتها قمع مبطن بشبكة سلك دقيقة الفتحات – او نبطنه بقطعة من منديل ورق
  • بعد ما ننتهى من التحمير نترك الزيت حتى يبرد تماما ثم نصبه ببطء فى القمع المبطن بالمنديل الورق ونحتفظ بالزيت المصفى فى الزجاجة للمرة القادمة بعد ان اصبح خالى من أى شوائب
  • قبل التحمير القادم نرفع القمع من على زجاجة الزيت ونتخلص من قطعة المنديل بعد ان تجمعت فيه كل البقايا
  • لا ننسى ان نغسل طاسة التحمير ونتركها تجف قبل صب الزيت المصفى فيها

الطريقة دى مفيهاش غلبة ولا حاجات تتغسل – فقط زجاجة زيت فاضية وقمع صغير نتركه على الزجاجة – مش محتاجين نغسله – فقط نرمى قطعة المنديل الورق بكل الشوائب العالقة فيه وخلاص كدة

عشان احمى زجاجة الزيت متندلقش وتوسخ الدنيا انا باستخدم علبة كرتون ناشفة وجنابها عالية بتاخد 4 زجاجات – باحط فيها زجاجات الزيت والخل فى مكان ثابت جنب البوتاجاز

انا باسيب القمع بالمنديل مغطى الزجاجة – الشوائب اللى فيه حتمنع دخول اى اتربة فمش محتاجين نغطى الزجاجة وبالطريقة دى مش محتاجين نغسل القمع كل مرة

لو الموضوع نال اعجابك اضغط هنا لدعم الكاتب (جزاكم الله خيراً)

2 تعليقان

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *