تجربتى مع تشغيل ديب فريزر كثلاجة بعشر تكلفة الكهرباء

Posted by on

آخر تحديث : 17-09-2018 الساعة 04:41 م

مشكلة أى ثلاجة انك بمجرد فتح بابها كل الهواء البارد يتسرب للخارج ويحل محله هواء الغرفة – مما يشكل اجهاد للكومبرسور واهدار لتكاليف الكهرباء

(على فكرة انا صممت لكم آلة حاسبة تستطيع ان تعرف منها الان قيمة فاتورة الكهرباء الخاصة باستهلاكك الشهرى: اضغط هنا)

اما الديب فريزر الافقى chest freezer فيستفيد من خاصية معروفة وهى ان الهواء البارد يكون اكثر كثافة أى اثقل من الهواء الساخن وبالتالى يكون البارد دائما فى قاع الديب فريزر فلا يتسرب لأعلى عندما نفتح بابه العلوى – ولذلك تلاحظ ان فى السوبرماركت هناك فريزرات عرض بلا باب علوى ومع ذلك تظل المعروضات مجمدة كما هى

لهذا السبب اتجه كثير من الاجانب فى امريكا واوروبا الى تحويل الديب فريزر الى ثلاجة بتغيير الثرموستات وتثبيت دائرة اليكترونية صغيرة عند مدخل التيار الكهربى – ولطالما استهوتنى تلك الفكرة لكن كان من الصعب تنفيذها

لكنى فوجئت وانا اتصفح موقع جوميا للبيع اونلاين بديب فريزر مصرى من انتاج يونيون اير تتوفر فيه – بحسب المذكور فى الموقع – خاصية التشغيل كثلاجة بدون حاجة لعمل اى تعديلات حيث انه مجهز للعمل كثلاجة او ديب فريزر

فرحت جداً اننى اخيرا ساستطيع تنفيذ الفكرة بدون عمل اى تعديلات – لكنى ترددت لربما يكون مجرد كلام – فتواصلت اكثر من مرة مع شركة يونيون اير الا ان المسئول قال لى بالحرف الواحد “الديب فريز لا يمكن استخدامه كتلاجه”

ومع ذلك قررت شراء الديب فريزر UC-210 وقلت يمكن اللى ردوا عليا مش على علم بالمنتج الجديد – وقلت مش معقول فى موقع جوميا يكتبوا كلام غير حقيقى – دة اللى مكتوب بالظبط عن الديب فريزر على موقع جوميا :

“Multi function, can be extremely cool, freezing mode, or can be refrigerating only.”

واليكم نتيجة تجربتى بالتفصيل حتى تستفيدوا منها وخصوصا اذا كنتم مثلى تريدون التوفير فى فاتورة الكهرباء الشهرية اللى عمالة تزيد كل شوية – وانا باذن الله حاواصل متابعة التجربة معكم لمدة سنة عشان تشمل فصول السنة كلها – وتحت امركم فى اى استفسار

وعلى فكرة لو بتفكر تشترى ثلاجة وديب فريزر رأسى نصيحتى بلاش – اشترى 2 ديب فريزر افقى احسن واوفر – واحد تشغله ديب فريزر والثانى تشغله ثلاجة – توجد فى الاسواق الان ديب فريزرات افقية مجهزة للعمل كفريزر او ثلاجة حسب ضبطك لدرجة الحرارة من خلال لوحة تحكم وشاشة ديجيتال – الفريزرات الافقية ارخص بكتييير من الثلاجات وموفرة جدا فى الكهرباء – تقريبا عشر استهلاك الثلاجة العادية – 2 فريزر الواحد 210 لتر مقاس ممتاز – لو عيلة كبيرة هاتوا اكبر – فرق السعر بسيط جدا بعكس الثلاجات – ولو مساحة المطبخ لا تكفى حطوا اللى حيشتغل ثلاجة فى المطبخ والفريزر برة المطبخ

يوم الاستلام

  • ذهلت من سرعة التوصيل – فبحسب الموقع التسليم يكون خلال من 6 الى 10 ايام – الا ان الفريزر وصل فى اليوم التالى لطلبه !
  • التوصيل والتطليع كان مجانى
  • سعر فريزر UC-210 فى جوميا 3350 جنيه والدفع عند الاستلام
  • صورة الفريزر على موقع جوميا تبخسه حقه كثيرا – ففى الصورة يبدو كالصندوق – بينما فى الحقيقة شكله شيك جدا وانسيابى – ولونه رمادى وبيلمع كالمرايا
  • يتميز هذا الفريزر بانك لما تفتح بابه علوى تجد تحته باب زجاجى منزلق مما يعنى ان العزل مزدوج

  • الباب العلوى به لمبة اضاءة تنير لك كل الفريزر
  • تحت على اليمين توجد لوحة التحكم – بها شاشة اليكترونية تظهر لك درجة الحرارة داخل الفريزر – الشاشة بتقيس بدقة جزء على عشرة من الدرجة المئوية – بالنسبة لى (عشان انا ضبطت الترموستات على أقل وضع لتشغيله ثلاجة) فالقراءة على الشاشة بتتراوح بين 1.0 و 2.6 درجة مئوية
  • حسب تعليمات التشغيل وضعت الفريزر فى مكانه ثم تركته بدون توصيل الفيشة مدة ساعتين
  • وضعت مؤشر التبريد على أقل وضع له – وهو الوضع السفلى مثل وضع عقرب الساعة 6 – وهو وضع بلا رقم حيث تبدأ الارقام بعده وتتدرج من 1 الى 7 وهى درجة التبريد القصوى

ضبط مؤشر التبريد على الوضع السفلى (السهم متجه للأرض) قبل رقم 1 يجعل الفريزر يعمل كثلاجة

  • وضعت زجاجات مياة ليلا وتركتها للصباح – لأرى اذا كانت ستتجمد فهذا يعنى ان الفريزر لا يمكن ان يعمل مثلاجة

ب 12 ساعة

  • الحمد لله نجحت التجربة ولم تتجمد المياه – وان كانت برودة الماء شديدة – ربما 2 درجة مئوية – الثلاجات العادية مفروض ان تكون درجة حرارتها ما بين 2 و 6 – وكمان عشان الفريزر لسة فاضى – اكيد بعد ما يتملى درجة الحرارة حتعلى شوية
  • الفريزر يعمل بلا صوت تقريبا – صوته هادى جدا لا تسمعه الا فى جوف الليل والكل نايم – ومش بيسخن ودة مؤشر كويس لان الاجهزة اللى بتسخن بيبقى عمرها قصير
  • الفريزر به فاصل شبك ما بين الجزء اللى فوق الكومبرسور وباقى الفريزر – وايضا له رف معلق علوى – الرف كان راكب على نفس مجرى احد البابين النزلقين فأنا ضغطت عليه شوية عشان اقصر طوله واصبح حجمه مناسب للمجرى الخاص به – فالفريزر به من فوق 3 شفات – الشفاتين العلوين للبابين الزجاج المنزلقين – والشفة السفلية المفروض انها مخصصة للرف الشبك بس كان مفروض يعملوها كنزة شوية فى الطول عشان تبات فى الشفة السفلية بدل ماهى فى الشفة الوسطى ولو فضلت كدة بتمنع الباب المنزلق من الحركة – دى ملاحظة بسيطة ارجو ان يونيون اير يتداركوها
  • كالعادة أى ست بيت بتبقى ضد التغيير او تجربة حاجة مش متعودين عليها – فالموضوع حيلاقى رفض فى الاول على ما ست البيت تتعود عليه

بعد 10 ايام

  • التبريد كثلاجة رائع – درجة الحرارة بتتراوح ما بين 1.0 و 2.6 مئوية – ودى درجة مثالية لانها لا تسمح بنمو البكتيريا وفى نفس الوقت لا  تجعل الاطعمة تتجمد
  • احنا دايما بنشترى جبنة قريش من الفلاحة – فى الثلاجة القديمة كانت الجبنة بعد كام يوم يبدأ لونها يتغير وتتكون عليه طبقة بمبى وطعمها يبدأ يبوظ – دلوقتى الجبنة لما باحطها فى الفريزر الجديد بتفضل لونها ابيض كالحليب حتى بعد مرور اسبوعين وطعمها يظل طازج – طبعا دة عشان درجة 2 مئوية لا تسمح لنمو البكتيريا كما فى الثلاجات العادية
  • محتاج اشترى رفوف وعلب بلاستيك عشان اقدر انظم الفريزر وياخد حاجات اكتر – حاليا انا حاطط علب بلاستيك فوق بعض ولو عايز حاجة تحت لازم اشيل اللى فوقها الاول
  • المشروبات الغازية بتسقع جدا وتبقى طعمها تحفة عن الثلاجات العادية
  • الماء بيبرد زيادة عن اللزوم فاحنا بقينا منملاش الزجاجات لاخرها – بنترك حوالى ربعها فاضى عشان قبل ما نشرب نزودها ماء غير مبرد

بعد 6 شهور

  • الجانب الايمن خصصناه لزجاجات المياة وللحلل – بنحط 3 حلل نفس المقاس (4 لتر) فوق بعض بدون غطاء – كل حلة بتغطى اللى تحتها – وطبق بنغطى بيه الحلة العلوية ونقدر نحط فيه حاجات بسيطة مثل اكياس بلاستيك مثلا
  • الجنب الشمال وهو الاكبر بنحط فيه الاطعمة فى علب والعيش والخضروات فى اكياس
  • التشغيل كثلاجة بيكون طبقة خفيفة جدا من الثلج على الجدران الداخلية وبتسيح لوحدها فتتكون طبقة خفيفة من الماء فى قعر الفريزر تحت – لكن يوجد عيب فى تصميم الطبة اللى فى القعر وهو انها مرتفعة قليلا عن الارضية وبالتالى لما نفتحها لتسريب الماء المتكون فى القعر الماء بيفضل متجمع ولا ينزل – فنضطر الى استخدام فوظة لتمتص الماء يدوياً ونعصرها للتخلص من الماء المتجمع تقريباً مرة كل شهر او شهرين – مع ضرورة وضع شبكة فى القعر بحيث لا تلامس الماكولات قعر الفريزر حتى لا تبتل بالماء المتجمع تحت – عيب مزعج شوية لكنه محتمل – لكن بصراحة التبريد القوى للثلاجة بيحفظ الاكل اضعاف المدة اللى بتحفظها الثلاجات العادية ودى ميزة هايلة – تقريبا مفيش اكل بيفسد الا لو قعد شهورناسيينه !

بعد سنة

  • الحمد لله الفريزر مازال يعمل بكفاءة كثلاجة لكن:
    • كنت اتمنى لو كنت اشتريت الاكبر حجماً – فبعد ان استغنينا تماما عن الثلاجة القديمة (حاليا بنستخدمها كدولاب مطبخ) – بقت مكربسة ولو كانت اكبر شوية كان يبقى احسن
    • مشكلة الماء المتجمع في قعر الفريزر موجودة باستمرار وبنضطر ننشف القعر كل شهر والا يعمل ريحة مش ظريفة – وضروري يتحط رف في القعر يرفع الاطعمة بعيد عن الماء المتكون في القعر
    • الاكل بيفضل سليم لمدة طويلة تصل الى شهر
    • دجة الحرارة بقت ثابتة عند 3 وشوية

37 Comments

    • الله يسلم حضرتك
      السبب بسيط – وتفسيره بقوانين الفيزياء – فالمعروف ان الهوا البارد اكثر كثافة من الهوا السخن – لذلك الهوا البارد دايما يكون تحت والسخن فوق – وبالتالى عشان الديب فريزر افقى وبابه من فوق فلما بتفتحه الهوا البارد مش بيهرب لانه تحت والهوا الساخن بتاع المطبخ ميعرفش يدخل لانه اخف من البارد – ودة سبب ان حضرتك بتلاقى فى السوبرماركتات فريزرات افقية بدون باب علوى اصلاً
      اما الثلاجة فمجرد فتح بابها ثانية واحدة كدة كل الهوا البارد اللى تحت هرب فيرجع الكومبرسور يشتغل تانى عشان يسقع الخوا السخن اللى دخل كل ما تفتح الباب
      اما الفريزر فالكومبرسور بتاعه ما بيشتغلش الا كل فين وفين لانه محتفظ بالهوا البارد مش بيخرج من بابه العلوى
      انا حاليا استهلاكى الشهرى بقى فى المتوسط 280 كيلوات فى الشهر بعد ما كان بين 400 و 500 – يعنى دخلت فى شريحة ارخص مكنتش باتعامل بيها قبل كدة – لمجرد استخدام الديب فريزر بدلا من الثلاجة
      بس لاحظ حضرتك انك لابد يكون عندك ديب فريزر عشان المجمدات – او تشترى اتنين ديب – واحد تشغله ثلاجة والتانى فريزر
      وثمن الاثنين برده حيبقى ارخص من ثمن ثلاجة جديدة – دة غير الوفر الكبير فى الكهربا على المدى الطويل

      رد على هذا التعليق << to this comment

    • معلش مفهمتش السؤال – حاحاول اجاوب على قدر فهمى
      الرأسى والافقى زى بعض من ناحية تجميد الاطعمة لا فرق بينهم
      لكن الرأسى بمجرد فتح الباب يخرج الهواء البارد ويحل محله هواء الغرفة – اما الافقى فلا يخرج الهواء البارد لانه اتقل وبالتالى بيظل تحت
      بخصوص يونيون اير دة الحقيقة اللى انا جربته – لكن فى جوميا لاحظت انه توجد ماركات اخرى من الفريزرات يمكنها العمل كتبريد او تجميد ايضاً لكنى لا استطيع تأكيد الا ما جربته فقط
      اما اذا كنت حضرتك تقصد تسأل اذا كان الرأسى ينفع يشتغل ثلاجة فلا اعتقد – وحتى لو ينفع فلن تكون هناك ميزة – فالهواء سيهرب بمجرد فتح الباب مثله مثل الثلاجة العادية

      رد على هذا التعليق << to this comment

  4. اولا شكرا علي المقال ثانيا انا اشتريت ديب فريزر يونيون 175 لتر ولكن ليس به باب زجاج منزلق فهل تم سرقته قبل الشراء ام ان الباب الزجاج موجود في حجم 210 لتر فقط ارجو الرد ومع الشكر لحضرتك

    رد على هذا التعليق << to this comment

      • انا متشكره اوى على سرعه الرد هجيب ان شاء الله يونيون 210 لتر هو من جوه مش ناعم وفى فرع يونيون وفى كارفور قالو دا مش املس علشان ميكونش تلج وهو نو فروست فحبيت اتاكد من حضرتك طيب لو بيكون تلج بيكون كتير بحيث الحاجه بتلزق فى بعضها

        رد على هذا التعليق << to this comment

        • في حدود علمي يونيون اير لا تنتج ديب فريزرات نو فروست – موديل UC-210 اللى انا اشتريته مش نوفروست
          وبصراحة انا ندمت اني مجبتش الموديل الاكبر UC-320 – لان 210 بيتملي بسرعة وبيبقى مكربس
          هو عدد افراد اسرة حضرتك كام واحد؟
          وهل حتستخدميه كثلاجة وللا ديب فريزر؟
          لو ثلاجة بيكون ثلج خفيف جدا على الجدران فقط وبيسيح لوحده – بس حتحتاجي بشرشوبة او فوطة تمتصي الماء المتكون فى قعره كل شهرين ثلاثة – ومفيش أى حاجة بتلزق في بعض – والتبريد ممتاز ومفيش حاجة بتفسد لان درجة حرارته كثلاجة بتكون 2 او 3 مئوية
          وبالنسبة للسعر لقيتيه بكام فى كارفور ويونيون؟
          انا ممكن اقول لك على مكان سعره ارخص والتوصيل مجاني والدفع عند الاستلام

          رد على هذا التعليق << to this comment

          • كارفور ٣٧٥٠ وفى توكيل يونيون ٤٠٠٠ واولاد رجب ٤٠٠٠ برده فى بى تك ٣٧٥٠ وسمعت التوصيل مجانا فا ممكن اطلبه منهم

          • متشكره لاهتمام حضرتك كنت عايزه اجيب بوتجاز رويال ٤ شعله لو عند حضرتك فكره عن الاجهزه الكهربائيه هو كويس ولا لا

          • مجربتوش الحقيقة – لكن اللى اعرفه هو تكنوجاز معمر وعندي من اكتر من 20 سنة شغال زى الفل – بس برضه معرفش الانتاج الجديد منه اخباره ايه

          • كل سنه وحضرتك طيب كنت عايز اشترى ديب فريزر الكتروستار ٢٤٠ لتر افقى ايه رأيك فى ؟

          • وانت طيب ربنا يبارك لك
            الكتروستار تصميماتهم سيئة جدا – الرأسي ادراجه بتهدر جزء كبير من المساحة – لكن مجربتش الافقي

  6. الماء يا استاذنا الفاضل بيبدأ تتجمد عند درجة حرارة 4 درجات مئوية .. انت لما بتترك فراغ في زجاجة الماء مش عشان تزود الزجاجة مياه وتشرب بالهنا.. لأ ..ده عشان الماء لما يتمدد قبل ما يتجمد يلقي فراغ يتمدد فيه وإلا …فالزجاجة ستنفجر لأنه ببساطة الماء بيتمدد وحجمه بيزيد وتصبح الزجاجة حيز اقل في الحجم من الماء فتنفجر..فكويس جدا انك كنت بتسيب فراغ في الزجاجة.

    رد على هذا التعليق << to this comment

  8. إشتريت ديب فريزر يونيون إير 175 لتر
    تقريباً منذ عامين ونصف . وفوجئت بأنّه لايجمد ولا يبرد أيضاً مهما رفعت من المؤشر لأعلي درجاته انتظر بعض الوقت وجدت أن الموتور درجة حرارته مرتفعه جدا وكاد أن يحترق ففصلته ولا أعرف الحل والعمل في ذلك .

    رد على هذا التعليق << to this comment

  9. السلام عليكم و رحمة الله و بركاته
    ارجو ان تكون حضرتك بخير حال
    و جزاك الله كل خير علي هذا التقرير
    الذي شاء لي القدر ان اطلع عليه الان صدفة
    و انا ابحث عن اسعار الثلاجات نظرا لسوء حالة الثلاجة لدي بحيث اصبحت الحاجة ملحة جدا لشراء اخري
    و عليه
    ارجو من حضرتك شجيعي علي القيام بخطوة شراء هذا النوع من الفريزر بدلا عن الثلاجة و ذلك اذا كنت ما زلت عند رائيك فيها خاصتا بعد مرور عامين تقريبا علي الشراء و التجربة … بارك الله لك فيه و زادك من فضله
    و يا ريت لو حضرتك لديك اضافة عن ماركات اخري ظهرت خلال هذه الفترة لمثل هذا النوع من الفريزرات .. تفيدني بما لديك
    تقبل وافر شكري و احترامي

    رد على هذا التعليق << to this comment

  10. أعتقد أن فكرة الحاج محمد معقولة للشباب ولكنها ليست عملية لنا ……إذ لو حسبنا توفير الكهرباء لا يتساوي مع المجهود البدني لتنضيف الديب فريزر من المياه هذا غير اللخبطة لوضع المأكولات ورحلة البحث عنها ففي الثلاجة يسهل كل شئ من وضع المأكولات والخضار والفاكلة في الإدراج حيث قلة التبريد واستعمال باب الثلاجة لأغراض كثيرة كما أن تبريد الديب فريزر عالي جدا لدرجة أن بعض الخضروات وخاصة الورقيات سوف تصاب بما نسميه حروق التبريد وذلك مما يتلفها….. وحروق التبريد هي كأنك مثلا تركت كيس لحمة مقطوع في الفريزر فالتبريد بيحرق الجزء المكشوف ولونه يصبح اسود وهكذا ….وأنصح بشراء الثلاجة لغرضها وهو التبريد والديب فريزر لغرضه وهو التجميد.ولو حسبنا فرق السعر بينهم وتقسيمه علي متوسط مدة استعمال الثلاجة هيطلع أن ثمن التلاجة مع فاتورة استهلاك الكهرباء لن يتجاوز جنيه مصري يوميا ….فهل هذا الجنيه الواحد يعوض كل متاعب الديب فريزر .وشكرا لكم جميعا

    رد على هذا التعليق << to this comment

  12. تجربة جميلة تستحق الإشادة وبحيي حضرتك ع الشرح الوافي للتجربة
    طيب سؤال ممكن نحول الثلاجة الرأسية لديب فريزر بمعني نفتح فتحة ف الفريزر من فوق للثلاجة من تحت بحكم ان دايرة التبريد للفريزر بتبقي ف الواجهة وبالتالي يقدر يثلج باقي الثلاجة من تحت ونستفاد انو مش بنفتح ديما باب الثلاجة ع اساس ان اتحولت فريز

    رد على هذا التعليق << to this comment

  14. معلومة مهمة لايوضع زجاجات ماء ابدا بالديب فريزر وممنوع كليا ولو وصعت لايكتمل تجميدها وتضر بالمتور وستبقى اللمضة الحمرا مضيءه لغاية مايتم التخلص من زجاجات الماء……ولازم يملى الديب فريزر حتى الثلث كى يعمل جيدا…لانه مصنوع للمكولات بس…ولكن ممكن وضع علبة مكعبات الثلج فقط

    رد على هذا التعليق << to this comment

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.