جبنة روكفور بيتى

الجبنة الريكفورد او الروكفور طعمها رائع – فاذا كنت مثلى من عشاقها فأكيد بتصدمك اسعارها الحالية التى تخطت ال150ج للكيلو

لكنى وجدت طريقة سهلة لعمل جبنة ركفور فى البيت من خلال كنز الفيديو التالى :

انا لسة مجربتش الطريقة دى لكن باذن الله ناوى اجربها خلال يومين وباذن الله انقل لكم النتيجة هنا

دى صورة الجبنة الركفور بعد شهر فى الثلاجة

تحديث 19-7-2017

عملت الجبنة الركفور من شهر – والنتيجة تحفة بجد – دى باذن الله حتبقى الجبنة اللى حاواظب على عملها فى البيت – دل الجبنة البيضاء لسببين – اولا لانى باعشق طعمها – ثانيا لان ثمنها بقى غالى جدا جدا 150ج الكيلو – بينما الجبنة البيضاء بربع الثمن  والتكلفة واحدة للاثنين لما يتعملوا فى البيت

طريقتى لعمل جبنة ركفور فى البيت

المقادير لعمل كيلو روكفور

  • 3 كيلو حليب بلدى جاموسى طازح
  • 50جم جبنة ركفور
  • 2 معلقة صغيرة ملح ناعم

الطريقة

  • نضع الحليب فى حلة كما هو بدون تسخين ولا غلى
  • نذيب الجبنة الركفور فى طبق صغير مع معلقة صغيرة ماء – وندعكها بظهر معلقة لغاية ما تبقى عجينة طرية وناعمة – ممكن نزود شوية ماء حتى تذوب خالص وتبقى مثل الكريمة
  • نضيفها للحليب ونقلب كويس
  • نغطى الحليب على رخامة المطبخ
  • بعد ٢٤ ساعة حنلاقيها بقت جبنة وتحتها شرش – نصفيها فى صفاية نبطنها بقطعة قماش نظيفة وتحت المصفاة نضع حلة لاستقبال الشرش
  • نصب الشرش في زجاجات ونحفظه في الثلاجة فهو مشروب صحي ومضاد للاكسدة يقوي مناعتك ويساعد علي الهضم ومفيد لمن يريد تقوية عضلاته وعمل فورمة
  • بعد نصف ساعة نأخد القماشة بالصفاية لحلة ثانية – ونرش الملح على الجبنة ونقلبها بمعلقة
  • نربط القماشة ونعلقها فى اى مكان فى المطبخ بحيث تكون الحلة الثانية تحتها عشان تنقط فيها لمدة 24 ساعة
  • نضع الجبنة فى علبة ونوزنها – لو الحليب جاموسى وبخيره حنلاقى وزن الجبنة كيلو – لو وزنها أقل نشترى الحليب من بائع آخر موثوق فيه –  فمعنى ذلك ان الحليب ليس بخيره او مغشوش
  • بعد ١٢ ساعة نضعها فى علبة فى الثلاجة بدون غطاء
  • بعد يومين او ثلاثة حنلاقيها نشفت ونقدر نفتتها قطع صغيرة داخل العلبة وبعدين نغطيها
  • ممكن نجرب ناكل منها بعد اسبوع لكن طعامتها الحقيقية بتظهر بعد شهر – بتبقى احلى من الركفور الجاهز واطعم
  • لا ننسى نخلى 50 جرام من الجبنة اللى عملناها عشان نعمل بيها تانى وهكذا كل مرة حتى لا نضطر لشراء جبنة ركفور تانى. انا المرة الجاية حاجرب استخدم كوب من الشرش بدلا من الجبنة واقول لكم النتيجة

جربوها وحتدعولى – وعلى فكرة الجبنة الركفور مفيدة وصحية جدا وبسببها الشعب الفرنسى هو الاطول عمراً بين كل دول اوروبا واقلهم اصابة بامراض القلب والشرايين

وبالف هنا وشفا

لو الموضوع نال اعجابك اضغط هنا لدعم الكاتب (جزاكم الله خيراً)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *