الطريقة دى نستخدم فيها وراك الفراخ عشان نعمل نفس شكل وطعامة الحمام المحشى – مش حتصدقوا جماله .. روعة
احنا ممكن نشترى وراك من الفرارجى ونطلب منه يخليها – لكن ساعات بتبقى فيه عروض وراك مجمدة فى السوبرماركت باسعار ارخص بكتير من الفرارجى – عشان كدة حنتعلم مع بعض ازاى نخلى الوراك من العظم بطريقة سهلة جدا من خلال الفيديو التالى :
المقادير
- وراك فراخ بعدد افراد العزومة
- لتتبيل الوراك: فلفل اسود – ملح – بهارات – بابريكا – خل
- ارز
- تتبيلة الارز: زيت – كارى – كركم – فلفل – ملح
- بسلة وجزر
- تتبيلة ماء السلق : بصل – حبهان – ورق لورا – بهارات
- سمن او زبدة
الطريقة
- نتبل الوراك المخلية ونضعها فى الثلاجة ليلة او 4 ساعات على الاقل
- نشوح الارز فى الزيت حتى يصبح لونه ابيض ثم نضيف التوابل والبسلة والجزر
- نضع اكواب ماء مغلى مساوية لعدد اكواب الارز ونغطيه على نار هادية شمعة لمدة 20 دقيقة فقط
- نحشى الوراك المخلية بخلطة الارز ثم نلفهم ونربطهم بخيط كما فى الفيديو
- نختار حلة بمقاس مناسب بحيث نرص الوراك مزنوقين فى بعض فى قعر الحلة
- نغطى الوراك بقليل من الماء يادوب يغطى الوراك مش اكتر ونضع فيه التوابل
- عند بدء الغليان نغطى الحلة على نار هادية شمعة نصف ساعة
- نخرج الحمام الكداب من الحلة ونحمره فى السمن او الزبدة – او نضعه فى صينية وندهنه بفرشة سمن ثم نشعل الشواية العلوية ونضع الصينية فى الرف السفلى للفرن 10 دقائق ثم نقلب الحمام على ظهره 10 دقائق كمان
- يقدم مع باقى الارز
- الشوربة ممكن نعمل بيها شوربة كريمة الدجاج
الطريقة بالفيديو من الاء الجبالى (مع الفرق ان الفيديو بيستخدم بلاستيك وورق فويل للف الوراك وبالتالى الشوربة لن نستفيد منها لتلوثها بورق الفويل المعدنى – اما طريقتى فبدون فويل حتى يمكننا الاستفادة من شوربتها اللذيذة – والفرق الثانى انى باخلى الدبوس من العظمة عشان ياخذ حشو اكثر) :
وبالف هنا وشفا