آخر تحديث : 19-11-2020 الساعة 07:47 م

عندى لكم طريقة سهلة لحفظ الخضرة (بقدونس – شبت – كزبرة – كرات) طازجة بدون تجميد

كلنا عارفين ان الخضرة لما نحفظها فى الفريزر بتمهمط وتفقد نكهتها – عشان كدة انا دايما باتبع الطريقة التالية :

نجيب وعاء شبك سلك كما فى الصورة (بيتباع عن محلات كل حاجة ب2.5) – وبعد ما نغسل الخضرة كويس جدا نفردها لغاية ما تنشف – وبعدين نخرطها رفيع بالسكينة ونفردها فى الوعاء السلك – ونحطها فى الرف السفلى للثلاجة لو ثلاجتك تبريد هوا (يعنى نو فروست) – حنلاقى الخضرة تظل محتفظة بنضارتها ايام كتير حوالى اسبوع – بعد كدة برضه مش حتبوظ لكن حتبدأ تنشف – حتى لو سبناها شهور مش حيجرالها اى حاجة – حتنشف بس – واول ما تتحط فى شوية مية حترجع تانى طرية زى الاول

لو الثلاجة مش نوفروست ممكن نترك الطبق السلك فى المطبخ عدة ايام لغاية الخضرة ما تنشف – زى ما بنشف النعناع

بكدة حتبقى عندنا دايما خضرة مشكلة جاهزة ونظيفة فى أى وقت لعمل السلطات او للطبيخ او لعمل عجينة طعمية بيتى تحفة