نسبة اللحم الصافى الى العظم والجلد فى الفراخ

الفرارجية بيبيعوا صدور البانيه والشيش طاووق باسعار عالية – لذلك قررت اعمل تجربة عشان اعرف نسبة اللحم الصافى اللى ممكن يطلع من الفرخة بعد فصل العظم والجلد – فأحضرت فرخة اوكرانى مجمدة من فاميلى ماركت وزنها 1300جم – وقمت بفصل اللحم عن العظم والجلد ثم وزنت العظم والجلد اللى طلع وخصمته من وزن الفرخة

والنتيجة كانت مفاجأة بالنسبة لى – فقد اكتشفت ان العظم والجلد وزنهم يساوى 21.5% فقط من وزن الفرخة – يعنى اللحم الصافى للفرخة وزنه 78.5% من وزن الفرخة المجمدة

وبما ان الفراخ البرازيلى والاوكرانى بتتباع حاليا بسعر الكيلو 25ج – فبحسبة بسيطة اتضح ان كيلو لحم الفراخ الصافى تكلفته 32ج – فى حين ان الفرارجية بيبيعوا كيلو صدور البانيه ب65ج والشيش طاووق ب60ج – اما فى السوبرماركتات فاغلى من كدة بكتير

الخلاصة ان احنا بنتسرق طول الوقت من الفرارجية والسوبرماركتات – ودة بيثبت للمرة الالف ان أى حاجة تتعمل فى البيت اوفر بكتير جدا جدا من الجاهز – العيش فى البيت – الفول والطعمية – الكباب – كفتة الحاتى – البسكوت – البقسماط – المنين – البيتزا – كل حاجة لما تحسبها تلاقيها اوفر من 4 الى 6 مرات من الجاهز – ودة طبيعى لان المحلات دى عليها مصاريف كتير جدا من اجرة عمال وفواتير ايجار وكهرباء ومياة وضرايب وتأمينات – كل دة حضرتك بتدفع ثمنه بشياكة من خلال ما تشتريه منهم

يعنى باختصار .. اللى عاوز يوفر وياكل حاجة نظيفة مضمونة وصحية ياكل من صنع ايديه – نقطة ومن اول السطر

ملحوظة : كل ما سبق حتلاقوا وصفاته السهلة موجودة هنا فى قسم بالهنا والشفا و قسم مخبوزات و قسم LCHF

شارك هذا الموضوع
error

4 تعليقات

  1. الفراخ الصغير يختلف من الفراخ اللاحم
    الفراخ اللاحم نسبة
    عظم الظهر 16٪
    عظم الصدر 4٪
    عظم الارجل 6٪
    الجلد 4٪
    الجناح 8.5٪
    الصدور 34٪
    الافخاذ مشفا خالي جلد وعظم 22٪
    ماتبقى ماء وكيس
    اما فراخ مشفى كامل نسبة
    الفرخة خالي عظم 72٪
    العظم 18٪
    الجناح 8٪
    .
    .
    .
    شكرا

  2. اولا يجب التفريق بين الدجاج الابيض المذبوح طازج وبين المجمد البرازيلي وخلافه
    اذا تمت التجربة علي دجاجة صغيرة فان النتائج ستكون سلبية
    لا يوجد دجاجة بعد الذبح والخلي والتشفية وازالة الجلد والاحشاء والاجنحة والرقبة العظم والكبد والقانصة تعطي 70 % هذا حلم
    الناتج من عملية التصافي هو 55% الي 60 % لحم دجاج
    والباقي خارج المعادلة

    • تمام. هو الاختلاف جاى من ان طريقة حضرتك مش بتحسب غبر لحم الصدر والوراك فقط بدون لحم الاجنحة والرقبة والكبد والقوانص. مع ان الفرارجية بيستفيدوا من كل اجزاء الدجاجة بما فيه ايضا بيع الهياكل والراس والارجل. وفي البيت نقدر بعد استخراج اللحم نستفيد منهم في عمل شوربة مغذية جدا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.