فول مدمس بيتي دايب زي الزبدة

آخر تحديث : 14-11-2018 الساعة 01:27 م

تحديث

بعد تجارب كثيرة توصلت للطريقة المثالية – وتم تعديل الوصفة بناءا على ذلك


اخيرا اكتشفت اسرار تدميس الفول عشان يبقي دايب زي الزبدة تمام مثل عربيات الفول

  • السر الأول: تدميس الفول بعد نقعه من 6 الى 12 ساعة مع استخدام نفس ماء النقع في طهى الفول – كدة يبقى أطعم بكتير – التخلص من ماء النقع بيفقد الفول نسبة كبيرة من طعامته
  • السر الثانى : اضافة الملح لماء تدميس الفول
    الطريقة دى تخلينا نحتاج ملح أقل لان الفول حيتشرب الملح داخله اثناء طهيه – اما لو اضفنا الفول بعد طهيه حنحتاج ضعف كمية الملح
  • السر الثالث : اضافة نصف كوب خل فور انتهاء التدميس – الخل حيمنع الفول من انه يبقى اسود ويخلى لونه يفتح ويبقى طعمه خطير فى الاكل

المقادير

  • 600جم فول تدميس
  • 2.6 لتر ماء لو الفول بلدى – اما لو مستورد يبقى 2.2 لتر كفاية
  • 30جم ملح ناعم (3 معالق صغيرين هرم)
  • نصف كوب خل (100جم)

الطريقة :

  • نغسل الفول كويس 3 مرات
  • نصفى الفول ونضعه فى حلة ونضيف له الماء 4 اضعاف حجمه
  • بعد 6-12 ساعة نضع الحلة كما هى وفيها الفول وماء النقع على النار – مع اضافة الملح
  • نضعه على نار عالية حتى يبدأ فى الغليان ثم نغطيه ونهدى النار شمعة اقل حاجة لعدة 4 ساعات للفول المستورد حتى يستوى :
    • الفول البلدى يحتاج 8-10 ساعات عشان يبقى طرى وناعم زى الزبدة
    • الفول المستورد يحتاج نصف هذا الوقت او اقل
  • كمية الماء فى الوصفة تكفى لتسوية الفول – لكن بعض الانواع بتشرب ماء اكثر من غيرها – فانصحكم بعد مرور نصف الوقت نبص على الفول لو كان مفيهوش ماء مغطيه نغلى – فى براد اوكنكة – كوب ماء او كوبين ونصبه فى الحلة على الفول
  • حنعرف ان الفول استوى لما نلاقى – من غير تقليب – ان جزء على الوش من ماء الفول لم يعد شفاف وانما اصبح تقيل والفول انفصل عن قشره
  • بعد تمام الاستواء نطفى النار وعلى طول نصب على وش الفول نصف كوب خل حتى لا يسود

بعد تدميس الفول لما نغرف طبق نحط عليه زيت كتير – الزيت الكتير بيخلى طعم الفول يجنن – ونقلب الفول بسرعة وقوة لغاية ما يختفى فى الفول ولا يظهر لمعانه – وياسلام كمان لو نحط عليه شوية طحينة وشوية كمون ونقطع طماطماية فتافيت عليه حتاكلوا احلي وانظف طبق فول

وعشان تبقى وجبة صحيحة تمام ياريت يقدم مع شعير مسلوق او كرنب او خيار او لفت مخلل بطريقة البروبيوتيك – مش عايز اقولكم – حتتحولوا الى سوبرمان او سوبر وومن – حسب نوعك – بس ما تنسوش تدعولى الله يخليكم

وبالف هنا وشفا


المراجع :

http://www.seriouseats.com/2014/09/soaking-black-beans-faq.html

http://www.epicurious.com/expert-advice/soaking-salting-dried-bean-myths-article

http://www.latimes.com/food/dailydish/la-dd-dont-soak-dried-beans-20140911-story.html

http://www.latimes.com/food/la-fo-calcook-20141018-story.html

شارك هذا الموضوع
error

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.