اسرار تدميس فول دايب زي الزبدة

تحديث

بعد تجارب كثيرة توصلت للطريقة المثالية – وتم تعديل الوصفة بناءا على ذلك


اخيرا اكتشفت اسرار تدميس الفول عشان يبقي دايب زي الزبدة تمام مثل عربيات الفول

  • السر الأول: تدميس الفول فى نفس ماء النقع – كدة يبقى أطعم بكتير – اما التخلص من ماء النقع بيفقد الفول نسبة كبيرة من طعامته
    في المستوقد بيدمسوا الفول بدون نقعه قبلها . بيغلوا الماء ثم يضيفوا الفول الناشف على طول
  • السر الثانى : اضافة الملح لماء تدميس الفول
    الطريقة دى تخلينا نحتاج ملح أقل لان الفول حيتشرب الملح داخله اثناء طهيه – اما لو اضفنا الفول بعد طهيه حنحتاج ضعف كمية الملح
  • السر الثالث : اضافة نصف كوب خل فور انتهاء التدميس لكل نصف كيلو فول – الخل حيمنع الفول من انه يبقى اسود ويخلى لونه يفتح ويبقى طعمه خطير فى الاكل
  • السر الرابع : اضافة نصف معلقة صغيرة بيكربونات صوديوم لنصف كيلو الفول – وذلك فى الساعة الاخيرة
    البيكربونات بتخلى الفول يستوى اكثر ويتهري والقشرة تبقي ناعمة جدا ولما نيجي نهرسه يدوب مثل الزبدة وكمان ميته بتتقل جدا نتيجة لذوبان الفول عند هرسه

وعلي فكرة نقع الفول بيخلى لونه فاتح جميل – لكن يجب الا يزيد النقع عن 4-6 ساعات فقط – والا سيبدأ ينبت ويتغير طعمه الى طعم الفول النابت – ومن الاخطاء الشائعة التخلص من ماء النقع – ماء النقع مفيد جدا صحياً وفيه طعامة الفول – المهم فقط ان نغسل الفول جيدا أكثر من مرة قبل نقعه بماء نظيف لانه هو اللى حندمس فيه الفول

المقادير

  • 600جم فول مستورد
  • 2.25 لتر ماء
  • 30جم ملح ناعم (3 معالق صغيرين هرم)
  • نصف معلقة صغيرة بيكربونات صوديوم (بيكربوناتو)
  • نصف كوب خل (80جم)

الطريقة :

  • نغسل الفول كويس 3 مرات
  • نصفى الفول ونضعه فى حلة ونضيف له ماء نظيف ونغطيه 4-6 ساعات
  • نضعه على نار عالية بضع دقائق – ونضيف له الملح – وعندما يبدأ فى الغليان نغطيه ونهدى النار شمعة اقل حاجة لعدة ساعات حتى يستوى
  • بعد 5 ساعات من تسوية الفول نضيف البيكربونات ونقلب ثم نغطيه ساعة أخرى
  • لحظة اطفاء النار نرش على وش الفول نصف كوب خل حتى لا يسود

بعد تدميس الفول لما نغرف طبق نحط عليه زيت كتير – الزيت الكتير بيخلى طعم الفول يجنن – وياسلام كمان لو نحط عليه شوية طحينة وشوية كمون ونقطع طماطماية فتافيت عليه حتاكلوا احلي وانظف طبق فول

وبالف هنا وشفا


المراجع :

http://www.seriouseats.com/2014/09/soaking-black-beans-faq.html

http://www.epicurious.com/expert-advice/soaking-salting-dried-bean-myths-article

http://www.latimes.com/food/dailydish/la-dd-dont-soak-dried-beans-20140911-story.html

http://www.latimes.com/food/la-fo-calcook-20141018-story.html

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *