آخر تحديث : 13-12-2017 الساعة 11:30 ص

مخبوزات الافران بقت غالية نار – انا اكتشفت انهم بيبيعوا الحاجات بأربع اضعاف تكلفتها – عشان كدة قررت انى اعمل كل المخبوزات بنفسى فى البيت – انا باعمل البيتزا بنفسى من زماااان – وباعمل البقسماط  والغريبة وعيش وعيش سريع وتوست ضمن مخبوزات تانية كتير – تعالوا مع بعض نعمل دلوقتى منين تحفة – هو نفسه لو اتحشى عجوة يبقى كعب الغزال – نفس العجينة ونفس الطريقة – هنا حنعمله سادة – يتاكل مع الشاى او كسناك مع حتة جبنة رومى او شيدر او فلمنك

المنين طلع هش ومقرمش وطعمه تحفة أخلى من الجاهز وبربع التكلفة

المقادير والطريقة

• 250جم دقيق + معلقة صغيرة خميرة فورية
• نقلبهم بمضرب سلك ثم نضيف :
• 250جم ماء
• نقلبهم بمضرب سلك ونغطيهم ونتركهم يخمروا
• بعد حوالى ساعتين حنلاقى السطح عليه فقاعات هوا كتير – كدة خمرت
• نضيف 300جم سمن او زيت او خليط زى ما نحب
• نحمص معلقة كبيرة شمر ومعلقتين كبار سمسم ابيض نصف تحميص وفى الاخر نضيف معلقة كبيرة ينسون (ثوانى فقط لانه بيتحرق بسرعة)
• لما الينسون والشمر والسمسم يبردوا نضيفهم للعجينة
• نضيف 10جم ملح ونقلب الكل كويس مع بعض
• نضيف 750جم دقيق ونقلب الكل وبعدين نخرج العجينة على الرخامة ونعجن كويس 5 دقائق بايدينا
• نغطى العجينة تخمر ساعتين
• نسخن الفرن فاضى على 180 درجة
• نضيف محسن مخبوزات نجهزه كالتالى :

معلقة ونصف صغيرين بيكربونات + 4 معالق كبيرة سكر + معلقتين كبار دقيق
نقلبهم كويس ثم نصب عليهم نصف كوب خل ونقلبهم فى طبق كبير
حيفوروا جامد نروح دلقينهم عالعجينة ونعجنهم كويس فيها

نقسم العجينة 3 كور
نفرد الكورة مسطرة طويلة ونبططها بالنشابة وبعدين نلفها على بعضها زى الماسورة ونقطعها صوابع
ونرصها فى صوانى مغطاه بورق فويل وندخلها الفرن على 180 درجة لمدة 25 دقيقة
نتركها تبرد خالص قبل ما نشيلها من الصوانى

التكلفة
6 دقيق
6 زيت
4 سمن
2 شمر وينسون وسمسم
16ج وزنهم تقريبا 1.6كجم
يعنى تكلفة الكيلو 10ج فقط
وفى الافران الكيلو يتراوح بين 35 و45ج – يعنى فى المتوسط 40ج أى 4 اضعاف تكلفة البيتى !

وبالف هنا وشفا