آخر تحديث : 08-04-2017 الساعة 01:03 م

البقسماط اصبح غالى بطريقة مبالغ فيها جداً – انا بدأت أعمله فى البيت وبيطلع الصراحة تحفة وبربع ثمن الجاهز ونقدر نعمله بأكثر من طعم ومذاق زى ما نحب

المقادير

• 500جم دقيق
• 200جم ماء
• نصف معلقة خميرة فورية
• معلقة كبيرة شمر
• معلقتين كبار سمسم ابيض
• 100جم زيت
• 5جم ملح
• 2 معلقة كبيرة سكر ناعم
• معلقة صغيرة بيكربونات صوديوم
• ربع كوب خل

الطريقة

حنعمل تخمير من مرحلتين

• نخلط 200جم من الدقيق مع الخميرة ثم مع كل الماء ونقلبهم كويس بمضرب سلك يدوى ثم نغطى العجينة الطرية الى ان تظهر فقاقيع كثيرة على الوش (حوالى 4 ساعات)
• نحمص الشمر والسمسم فى طاسة ناشفة
• نطحن السكر اذا لم يكن ناعم
• نضيف الزيت والملح ونقلب ثم نضيف الشمر والسمسم وباقى الدقيق ونقلب كويس ونخرج العجينة عشان نعجنها على رخامة المطبخ بايدينا 5 دقائق
• نضعها فى وعاء ونغطيها حتى يتضاعف حجمها (حوالى 4 ساعات اخرى)
• نسخن الفرن فاضى على 180 درجة مئوية
• نحضر محسن مخبوزات كالتالى :
  • فى طبق غويط نخلط البيكربونات والسكر مع معلقتين كبار دقيق
  • ثم نصب عليهم الخل ونقلب بسرعة
  • حتتكون رواغى كتير نصبها بسرعة على العجينة ونعجنها فيها جيدا حتى تتشربها كلها
• على طول نقسم العجينة الى 3 كرات ونفرد كل كرة بالنشابة على شكل مستطيل طوله مثل طول صوانى الفرن اللى عندنا – ثم نقسم المستطيل بالعرض باستخدام عجلة تقطيع البيتزا او بالكسينة 4 اجزاء بالعرض ثم كل جزء نقسمه 4 شرايط برضه بالعرض لنحصل على 16 شريط – ونرصهم فى صوانى فرن مبطنة بورق زبدة مع مراعاة ترك مسافات بين كل شريطين لان حجمهم سيكبر فى الفرن
• ندخل الصوانى فى فرن ساخن على درجة 180 مئوية لمدة 15 دقيقة حتى يصبح لون البقسماط ذهبى
• بعد اجراج الصوانى من الفرن نترك البقسماط يبرد فيهم اولا قبل نقله

وبالف هنا وشفا

شارك هذا الموضوع