معظمنا متعود يسخن العيش على عين البوتاجاز مباشرةً – لكن دى طريقة غير صحية لان البقع السوداء الناتجة عن النار المباشرة بتحول النشويات فى الخبز الى مادة ضارة جدا بالصحة قد تسبب اورام خطيرة والعياذ بالله
لذلك انصحكم بالطريقة التالية لتسخين الخبز – وهى طريقة مثالية وتصلح مش بس لتسخين العيش لكن كمان لفك وتسخين الخبز المجمد اللى لسة مطلعينه من الفريزر – وايضاً تصلح لفك وتسخين كل انواع الخبز بما فيها الفينو والكايزر والبتى بان والتوست وايضا شرائح البيتزا البايتة او المجمدة
الطريقة سهلة جداً – حنعمل مع بعض فرن نضعه على عين البوتاجاز – مكون من 3 قطع متوفرة عند معظم الناس بدون حاجة لشراء أى شئ :
- صينية الومنيوم او تيفال
- شبكة معدن بمقاس مناسب تدخل فى الصينية وتكون ليها رجلين
- غطاء معدن اكبر من قطر الصينية لتغطيتها تماماً
أهم حاجة الشبكة المعدن لانها هى اللى حنحط العيش او البيتزا عليها – ويكون للشبكة رجلين عشان مش عايزين الاكل يلمس قاع الصينية – لو الشبكة ملهاش رجلين ممكن نثنى اطرافها لتحت عشان ترتكز عليها وترفع الشبكة
والغطاء ممكن يكون أى غطاء حلة ويفضل يكون غطاء اقرب لشكل القبة ويكون قطره اوسع من قطر الصينية حتى يغطيها تماماً
طريقة العيش الطرى
- نضع الصينية وداخلها الشبكة على شعلة البوتاجاز ونغطيها
- نشعل النار على اعلى درجة والصينية مغطاة وفاضية
- بعد 3 دقائق نفتح الغطاء ونضع الخبز او البيتزا على الشبكة الداخلية وبسرعة نغطى الصينية ونطفى النار فوراً
- بعد 3 دقائق اخرى نفتح حنلاقى العيش طرى بطريقة مش حتصدقوها وبدون أى حتت سوداء – أطرى عيش عرفه الانسان منذ بدء الخليقة
- لو العيش طالع من الفريزر نسيبه متغطى 5 دقائق بدلا من 3
- اما لو بنحب ندلع نفسنا او ندلع احباءنا وناكل الفينو مقرمش بحيث يبقى زى الباجيت الفرنسى او لو بنحب التوست مقرمش زى البقسماط – عشان مثلا ناكله مع بيض سكراملبد او حتة جبنة امينتال – نتبع الطريقة البسيطة التالية :
طريقة العيش المقرمش
- نضع الفينو او التوست او العيش الشامى على الشبكة والصينية باردة ثم نغطيها
- نترك الصينية على نار هادية جدا مثل الشمعة
- بعد 20 دقيقة نفتح الغطاء ونستمتع بأحلى قرمشة فى كوكب الارض – سكان الكواكب الاخرى (ان وجدوا) حيتحسروا ان محدش قالهم على الطريقة دى فوق عندهم
- الطريقة دى مش مناسبة للعيش البلدى الاسمر خصوصاً لو تخين – حيبقى ناشف قوى – لكن لو عيش رقيق ممكن ينفع – لكن احلى عيش ينفع فى الطريقة دى العيش الشامى الابيض والخبز اللبنانى اللى بيبقى سمكه رقيق – وطبعا الفينو بيبقى خطير وهو مقرمش – احلى كمان من الباجيت
- اما لو حابين نتدلع بزيادة بقى وبنحب الجبنة السايحة النايحة : نضع شريحة جبنة (شيدر او جودة او فلمنك او امينتال) على شرائح التوست بعد ما قرمش على النار الهادية جدا – ونغطى الصينية دقيقتين كمان – وبعدين نقلع التاج ونشمر كمامنا – فقد دقت ساعة العمل لتناول الافطار الملكى (بس ما تنساش نار البوتاجاز والعة)
وبالهنا والشفا