آخر تحديث : 08-06-2022 الساعة 01:59 م
انتشرت على الفيس بوك وصفة بسكوت لذيذ جداً وعمايله سهلة خالص – ومن كتر ما انتشر اطلقوا عليه اسم بيومى فؤاد (الممثل اللى انتشر فى كل الافلام والمسلسلات)
انا جربته وطلع تحفة ولادى اتهبلوا عليه – وعشان انا باحب دايماً استخدم الميزان وليس المكيال فانا حولت المقادير لتصبح بالجرامات كعادتى – طريقة اكيد حتعجب الناس اللى بتتحرى الدقة فى وصفات الاكل
المقادير
- 250جم سكر
- 100جم زيت دوار شمس
- 50جم سمن بلدى
- بيضتين حجم كبير او 3 صغيرين
- معلقة صغيرة فانيليا
- ذرة ملح
- 450جم دقيق ابيض
- نصف معلقة صغيرة بيكربونات
- معلقة كبيرة خل
- 100جم جوز هند (اختيارى)
مقادير نصف الكمية
- 125جم سكر
- 50جم زيت دوار شمس
- 25جم سمن بلدى
- بيضة حجم كبير
- نصف معلقة صغيرة فانيليا
- ذرة ملح
- 225جم دقيق ابيض
- ربع معلقة صغيرة بيكربونات
- نصف معلقة كبيرة خل
- 25جم جوز هند (اختيارى)
الطريقة
- نجهز الفرن بوضع الرف فى أعلى مكان واشعاله على درجة 180 مئوية لاحمائه
- نضرب كل حاجة فى الخلاط – او بمضرب سلك يدوى – ماعدا الدقيق والبيكنج باودر
- نخلط النواشف: الدقيق والبيكنج باودر والفانيليا وجوز الهند ونقلبهم مع الخليط السائل
- نستكمل عجن بايدينا فى طبق العجين
- نأخذ قطع صغيرة من العجينة نلفها بين كفى ايدينا لتصبح على شكل كرة بحجم البلية
- بشاكوش اللحمة نبصم البسكوت بالضغط عليه جامد فيصبح مبطط وفى نفس الوقت ياخد شكل مربعات محفورة زى الجاهز – كل ما يكون رقيق حيبقى مقرمش ويستوى بالتساوى من وشه زى ظهره – بس ما يكونش رقيق قوى لدرجة انه يتكسر مننا واحنا بنرصه فى الصوانى
- نرص البسكوت فى صوانى مفروشة بورق فويل
- ندخله الفرن الساخن على الرف العلوى لمدة 12 دقيقة
- نخرجه من الفرن ونتركه يبرد فى الصوانى نفسها – حنلاقيه لسة طرى لكن هو حيكمل سوى لان الزيت ساخن بداخله وحيكمل تسويته خارج الفرن
- بعد ما يبرد خالص حنلاقيه مقرمش ولذيذ جداً – نحفظه فى علبة صفيح حتى يحتفظ بقرمشته
- راقب المكان لان ممكن قوى تلاقى الصوانى فاضية فى لحظة
وبالهنا والشفا (دة لو لحقت تاكل منه حاجة)
روعة معمول أيضا بأذن الله