آخر تحديث : 26-09-2017 الساعة 06:20 م
الحليب الطبيعى البلدى الفلاحى (او حليب الزريبة او اللى بيتباع فى محلات الالبان ذات السمعة الطيبة – لمناقشة ازاى نشترى لبن مضمون ونظيف ومش مغشوش اضغط هنا) ممكن نعمل منه أحلى جبنة ولبن رايب بطريقة طبيعية بدون استخدام اى اضافات او ادوات – لا تستخدم الحليب المبستر المعلب لانه سيفسد – اما الحليب الفلاحى ففيه بكتيريا طبيعية اذا تركناه خارج الثلاجة بدون غلى تبدا البكتيريا فى تحويل سكر الحليب (اللاكتوز) الى حمض اللبن مما يسبب تخثره فيصبح فى البداية لبن رايب واذا تركناه اكثر يصبح جبنة
الطريقة سهلة جدا : نضع الحليب الطازج (من غير ما نغليه) فى زجاجة او برطمان او حلة ونتركه على المطبخ – اذا كنت عاوزه يبقى لبن رايب او زبادى ضع معلقة صغيرة لبن رايب او زبادى فى الحليب واتركه على المطبخ بدون غلى الحليب – بعد 8 – 12 ساعة حيبقى لبن رايب او زبادى
اما لو عايزين جبنة نتركه على المطبخ كما هو لمدة 24 ساعة بدون اى اضافات حنلاقى انه بدأ يفصل وحنلاقى سائل بدأ يظهر فى اسفل البرطمان تحت اللبن – هذا هو ما يسمى شرش وبيكون شفاف – نصبهم فى صفاية او شاشة تحتها وعاء – الشرش حيتصفى فى الوعاء – والجبنة حتفضل فى الشاشة او الصفاية – نرش على الجبنة شوية ملح ونتركها تتصفى بضع ساعات كمان او ليلة لو عايزينها جبنة ناشفة – اما لو بنحبها تكون جبنة طرية ننقلها بعد ما نصفيها لمدة ربع ساعة بس ونحطها فى علبة فى الثلاجة وناكل احلى جبنة – نقدر نعملها جبنة بورسان فرنسية Boursin باننا نقلب فيها ثوم مهروس وشوية ملح وفلفل وبقدونس وعيدان بصل اخضر مفرومين – او ملح وفلفل – صدقونى مش حتشتروا جبنة من السوبرماركت تانى!
لعمل جبنة بورسان تحفة بمنتهى السهولة اضغط هنا
الجبنة الطرية بالطريقة دى تكلفتها = سعر لتر الحليب × 3 لإن الثلاثة كيلو حليب بيطلع منهم كيلو جبنة طرية
وماننساش كمان ان الجبنة بتاعتنا مش هى بس اللى بتطلع من الحليب – لأ دة الشرش بتاعها لذيذ جدا ومغذى وكله فيتامينات وكالسيوم – وطويل العمر : ممكن نحفظه فى زجاجات بالثلاجة لمدة 6 شهور
اوعوا ترموا الشرش – دة مفيد جدا وكله كالسيوم – ممكن نشربه طعمه مزز شوية ولذيذ جداً – انا باسخنه واشربه كالحليب بدون اى اضافات
وعلى فكرة اللبن الرايب الطبيعى دة يتمتع بكمية كبيرة من فيتامين K2 يمكنكم قراءة المزيد عن هذا الفيتامين وفوائده الصحية الرائعة بالضغط هنا – كما يمكنكم الاطلاع على الجانب العلمى والطبى لفوائد فيتامين K2 بالضغط هنا
كدة نكون استفدنا من الحليب 100% – وبالف هنا وشفا
المراجع:
http://www.thekitchn.com/word-of-mouth-clabber-73245
http://thenourishingcook.com/what-is-clabbered-milk/
http://blog.culturesforhealth.com/ancestral-fermentation-clabbered-raw-milk/