حل مشكلة عدم اشتعال سخان الغاز

Posted by on

آخر تحديث : 15-11-2019 الساعة 06:21 ص

عندى سخان غاز ايديال 10 لتر – فى الاول البطاريات بتاعته عاشت حوالى سنتين وبعد كدة بقينا كل شوية نجيب بطاريات طورش جديدة لكن السخان مش بينزل ماء ساخن الا بطلوع الروح وبعد محاولات كتير لفتح وقفل الحنفية الساخنة – صوت التكتكة موجود لكن الماء بارد والسخان مش راضى يولع – كنت فاكر السبب من ضعف البطاريات واشترينا كتير – وفى الاخر طلبت صيانة اوليمبيك تليفون 19999 وجاء المندوب بعد يومين فى الميعاد المحدد – واتضح ان المشكلة كانت بسيطة جدا لم تأخد منه سوى 5 دقائق – لاحظته وعرفت الطريقة فقلت اكتبهالكو هنا يمكن حد يستفيد ويصلحه بنفسه ويوفر فلوسه

اولا اقفل محبس الغاز الموصل للسخان – مهم جداً غلق المحبس أولاً – ثم فك وش السخان – بعض الناس فاكرة اننا لازم نطلب شركة الغاز لفتح السخان – لكن دة مش صحيح – لان وش السخان بيتفك بسهولة من غير ما نحتاج نشيله من على الحائط ومن غير فصل وصلات الغاز او الماء – مجرد مسمارين من تحت ومسمارين من فوق – حيطلع وش السخان معاك على طول وحتشوف كل مكوناته امامك بوضوح وهو راكب على الحيطة كما هو

اذا كنت نسيت تقفل محبس الغاز اقفله الان

كما تلاحظ فى الصورة التالية : توجد قطعة حديد مربعة صفراء صغيرة (يشير اليها السهم) اصغر من نصف كف الايد – موجودة فوق ماسورة الغاز اللى جاية من تحت السخان – اسمها “سولينويد” solenoid – والبعض يسمونه كويل الغاز او صمام الغاز او بوبينة الغاز – هى عبارة عن علبة صغيرة مفتوحة من الجنبين

فك العلبة من السخان – هى مربوطة بمسمارين فى الداخل على طرفى العلبة – واحد تحت العلبة على اليمين كما فى الصورة التالية :

والمسمار الثانى فوق العلبة على الشمال:

وفك ال 2 سوكيت اللى موصلين السلوك (سوكيت ابيض وسوكيت اسود) عشان تعرف تخرجها من مكانها

لما تخرج العلبة من مكانها حتلاقيها من غير جناب وبداخلها حتشوف اسطوانة سوداء اللون تملأ العلبة – نظفها بفرشة اسنان قديمة لان حتلاقى عليها تراب كتير – وفى ظهر العلبة يوجد مكبس او عمود معدن قصير حواليه سوسته وفى آخر العمود كاوتشة سوداء (يشير اليها السهم فى الصورة التالية) – لو ضغطت بصباعك على الكاوتشة دى المكبس حيدخل ويخرج بفعل السوستة – كرر الضغط عليه كذا مرة لانه غالبا بيكون معصلج وهو دة اساساً سبب العطل – لانه مفتاح لغلق وفتح الغاز – فلو عصلج ومتحركش الغاز مش حيوصل وبالتالى الشعلات مش حتولع والماء مش حيسخن – مجرد الضغط على العمود او المكبس دة كذا مرة حيرجع يشتغل تانى

رجع العلبة تانى فى مكانها واربطها بالمسمارين ووصل السلكتين اللى فكيتهم بال 2 سوكت بتوعهم – وبعدين افتح محبس الغاز وجرب تفتح الحنفية السخنة دلوقتى – ان شاء الله حتلاقيه اشتغل من اول مرة بمجرد فتح الحنفية – ركب بقى وش السخان وكافئ نفسك بأحلى كباية شاى ..!

فى الغالب السخان بيحتاج العملية دى مرة فى السنة او كل سنتين – ارجع للصفحة دى عشان تفتكر الطريقة قبل فك السخان

كدة توفر الفلوس اللى كنت حتدفعها للصيانة – لانهم بياخدوا 65 جنيه مصاريف انتقال وحيقولولك السولينويد محتاج يتغير وثمنه 250 جنيه – ومش حتعرف حيركب لك واحد جديد وللا مفكوك من عميل تانى الله اعلم – فبدل كل دة صلحه بنفسك ووفر فلوسك واشرب شايك تمام التمام

تسليك السوستة باليد هو كل المطلوب – لكن بعد سنين لو كررت الطريقة دي ما جابتش نتيجة يبقى انت محتاج لشراء سولينويد جديد – وبدلا من الاتصال بالصيانة اللى حتاخد منك مبلغ كبير جدا مبالغ فيه – اكثر من 300 جنيه – انا اقولك تشتريه منين بعشر هذا المبلغ – اى 30 جنيه فقط – للتفاصيل اضغط هنا : سعر ومكان شراء سولينويد سخان الغاز

الفيديو دة فيه مهندس بيشرح على سخان شبه سخان ايديال – بس الفرق انه يمين بينما سخان ايديال شمال – لكن السولينويد هو هو ونفس شكله ونفس حجمه ونفس طريقة فكة وتركيبه

اما اذا كنت حضرتك لما تفتح حنفية السخن مش بتسمع صوت تكتكة خالص.. او صوت التكتكتة بيستمر حتى بعد ما شعلات السخان ما ولعت.. شوف الموضوع دة: حل مشكلة عدم سماع صوت تكتكة سخان الغاز

84 Comments

    • هات اسبراى اسمه WD40 رش بيه المسامير وباذن الله تفتح معاك

      او حط معلقة صغيرة بيكربونات صوديوم (بيكربوناتو) او بيكنج بودر وقليل من الخل او عصير ليمون – وبفرشة اسنان قديمة ادهن المسامير لازاله الصدأ وباذن الله حيفتحوا معاك

      رد على هذا التعليق << to this comment

  15. للأسف الشديد عملت ده لقيت السوسته شغاله و خفيفه جدا شكلها و انا دوست عليها كذا مره و قفلت كويس برضه الشعلات مشتغلتشي

    المشكله اللي عندي لما بفتح الميه السكنه بيتكتك والشرارات بتشتغل لكن الشغلات لم تشغل و بالتالي الميه لا تسخن

    ارجو الافاده اكثر بخصوص مشكلتي

    رد على هذا التعليق << to this comment

  16. انا عندي سخان فريش ٦ لتر
    بيعمل تكه بس مفيش شعله بتشتغل
    غيرت الحجر بيعمل شرز بس مش بيولع الشعله
    السخان بقاله اربع شهور بالظبط راكب كان شغال حلو وفجأة مبقاش يشتغل

    رد على هذا التعليق << to this comment

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.