نصائح ذهبية لاتقان التحدث باللغة الانجليزية

آخر تحديث : 23-12-2016 الساعة 01:40 ص

بقالك كام سنة بتدرس انجليزى ؟
الطالب المصرى لما يخلص ثانوية عامة بيكون قضى 14 سنة من عمره فى دراسة الانجليزى – ومع ذلك لسة مش بيعرف يتكلم انجليزى بطلاقة

لو عايز تتكلم انجليزى صح وبطلاقة زى الانجليز والامريكان وتتقن اللغة الانجليزية بجد .. اتبع النصائح التالية:

لا تحفظ كلمات لكن احفظ تعبيرات phrases – حفظ الكلمة بمفردها بيتنسى بسرعة اما حفظها فى جملة حيخليك مش بس تحفظها لأ وكمان تفتكر معناها وتعرف ازاى تستخدمها بسهولة فى الكتابة والمحادثة – وكمان حتعرف قواعد اللغة بطريقة طبيعية تلقائية بدون حفظ – زى مثلا الطفل الامريكى او الانجليزى – محدش طبعا بيكون علمه قواعد الجرامر لسة – ومع ذلك بيتكلم بجرامر سليم – بطريقة طبيعية تلقائية – ازاى؟ من خلال الاستماع لمن حوله وتقليدهم – لو انت حفظت الكلمات فى جمل دايماً حتلاقى نفسك زى الطفل دة – بتتكلم لغة سليمة تلقائية من غير ما تفكر لا فى القواعد ولا حروف الجر ولا أى حاجة حفظ

لا تذاكر قواعد الجرامر تانى ابداً – انت كل سنة بيقولولك فى المدرسة ذاكر جرامر – هل كل الجرامر اللى اخدته لغاية دلوقتى ياترى خلاك بتتكلم انجليزى بطلاقة وبطريقة طبيعية؟ الناس الانجليز والامريكان لما بيتكلموا اصلاً مش بيفكروا فى الجرامر قبل ما يتكلموا – خالص – بيتكلموا على طول بدون تفكير فى أى قاعدة من قواعد الجرامر – مفيش وقت اصلا يفكروا لان طبيعى محدش يقدر يوقف حديث عبال ما يفكر فى الجرامر – لكن انت بتتكلم ببطء ليه؟ لانك بتفكر الاول فى الجرامر – بتفكر بالعربى وبعدين تحاول تترجم كل كلمة الى انجليزى – وتقعد تفكر الجرامر حيبقى تبع انهى قاعدة – يكون اللى بتحاول تكلمه يا اما نام منك يا اما سابك ومشى

اتعلم باذنيك مش بعينيك – فى المدرسة بيشرحوا لك بالعربى وانت بتقرأ الانجليزى بعينيك – دة مش حيساعدك تتكلم انجليزى – هو اه حيساعدك فى القراءة – لكن مش فى الكلام – لما تيجى تتكلم مش حتعرف – ليه؟ لانك اتعلمت من خلال عينيك – اما لو اتعلمت من خلال ودانك حتقدر تتكلم انجليزى صح – تماماً زى الطفل المصرى اللى اتولد وعاش فى امريكا مثلا – عمرك قابلت حد اتربى هناك من صغره؟ – حتلاقيه بيتكلم انجليزى زى الامريكان بالظبط – لانه اتعلم اللغة بودانه مش بعينيه

لكن المهم تسمع ايه – ابدأ بسماع لغة سهلة جدا – اوعى تسمع لغة صعبة انت مش فاهم منها حاجة خالص – وهنا برضه حنرجع لمثال البيبى – بدءا من سن 6 شهور اهله بيبدأوا الاول يتكلموا معاه بلغة سهلة جدا ومفردات قليلة – ولما يعرف يقولها بيبدأوا يتكلموا معاه بلغة اعلى شوية وبالتدريج – دة نفس اللى المفروض حضرتك تعمله – ابدأ بسماع الاسهل بالنسبة لك – اسمع لغة سهلة تكون فاهم معظمها – 90% مثلا – كدة حتقدر تخمن معنى شوية الكلمات الجديدة عليك من خلال المعنى العام وسياق الكلام – ولما تبقى فاهم 100% ابدأ استمع لمستوى اعلى شوية – برضه تكون فاهم اغلبه والباقى تخمنه – وهكذا بالتدريج حتبنى لغتك وتنميها لغاية ما تبقى فى الاخر فاهم كل حاجة – اسمع انجليزى ساعة او ساعتين كل يوم – قسمها خلال اليوم براحتك فى اوقات فراغك – فى المواصلات – فى اى وقت او مكان مناسب ليه

اتعلم بعمق وبتكرار – فى المدرسة بيعلموك حاجات كتيرة جدا والمنهج بيكون مضغوط – والنتيجة؟ بتضطر تذاكر كل حاجة بسرعة وبدون تعمق لان مفيش وقت تخلص كل اللى فى المنهج المكدس بالكلمات والقواعد والحفظ – مثلا الكلمات – انت بتحفظ كلمات كتير – لكن هل تقدر تستخدمهم فى الكلام؟ لو متقدرش يبقى لم تدرسهم بعمق

استمع لنفس القصص بازمنة مختلفة – مرة الاحداث فى الماضى – ومرة فى الحاضر – وهكذا – بكدة حتتعلم استخدام الجرامر من غير ما تحفظ قواعده

اسمع انجليزى من الحياة الواقعية وليس من الكتب – الكتب مش بتعلم الكلام – اسمع ناس لغتهم الام انجليزى – انجليز امريكان استراليين كنديين – اوعى تسمع جنسيات اخرى

اسمع مثلا القصص اللى مكتوبة لاطفال المدارس فى امريكا او انجلترا او استراليا او كندا – حتلاقيها قصص سهلة ومفرداتها بسيطة فتفهمها كويس

النصائح دى قالها A.J. Hoge فى الفيديو التالى

والكورس بتاعه Effortless English اللى حيخليك تتكلم انجليزى بطلاقة – تقدر تنزله تورنت بالضغط هنا << – هو مساحته كبيرة 7.5 جيجا لانه يحتوى على 5 كورسات وليس كورس واحد – بس ان شاء الله تستفيد منه كويس – وكلنا عارفين ان المحادثة وطريقة نطقك ومدى طلاقتك فى التحدث بالانجليزية بتبقى مهمة جدا فى اى انترفيو للوظائف الكويسة ذات المرتبات العالية – تقريبا مبقاش فيه شغل مش بيبقى عايز الانجليزى بتاعك كويس – واللى يهمهم نطقك وطلاقتك فى الكلام مش اذا كنت بتعرف تقرأ انجليزى ولا لأ – فياريت نهتم ونطور من نفسنا من أجل مستقبل افضل ليكم كلكم باذن الله

التورنت بعد ما يكتمل تنزيله حيبقى عند 5 كورسات – ترتيبهم من الاسهل للأصعب كالتالى :