آخر تحديث : 15-12-2016 الساعة 09:36 ص
اذا كنت من هواة النباتات المنزلية وعايز تغذى نباتاتك وتخليها تنمو اسرع وتزهزه وتبقى صحتها كويسة – تقدر تعمل بنفسك سماد طبيعى ومغذى من حاجات بنرميها فى الزبالة او ندلقها فى الحوض – انا بأسميه “مشروب التغذية”
- قشر البطاطس
- قشر الموز
- قشر البرتقال واليوسفى
- قشر البيض وماء سلقه
- رأس عيدان الكبريت
نحضر حلة او طبق او اى وعاء – وكل ما نسلق بيض نحط ماء السلق + قشر البيض فى الوعاء – وكل ما نقشر بطاطس او برتقال او موز او يوسفى نضع قشرهم مع قشر البيض وماء سلق البيض – ولما ننقع فول او اى بقوليات نضيف ماء النقع برضه فى الوعاء – وبعد كام يوم حيبقى عندنا منقوع غنى جدا بكمية معادن وفيتامينات الزرع حيرقص من الفرح لما تسقيه منه ونستخدم ماؤهم فى سقى الزرع – فهو خليط غنى بالبوتاسيوم والكالسيوم والفسفور والمغنسيوم – نصفى الماء بصفاة ونملأ به زجاجة فاضية (زجاجة بيبسى 2 لتر مثلا) – ومرة فى الاسبوع نحط منه معلقتين كبار فى كل قصيص زرع قبل ما نسقيه بالماء العادى
- لا ننسى لما نسلق بيض بدل ما نرمى الماء اللى غلينا فيه البيض نضيفه لنفس الوعاء – فهو غنى بالكالسيوم
- ماء النقع
ولما ننقع البقول فى البيت (الفول – الفاصولا البيضاء – اللوبيا) بلاش نرمى ماء النقع – دة غذاء مفيد جداً نسقى بيه الزرع – فهو غنى بكل المعادن التالية: بوتاسيوم – كالسيوم – مغنسيوم – حديد – نحاس – زنك – منجنيز – وبه ايضاً فيتامينات : ب1 (ثيامين) – ب2 (ريبوفلافين) – ب3 (نياسين) (المصدر) – ب9 (حمض الفوليك)
لذلك ماء النقع دة يمكن يعتبر احسن حاجة مغذية للزرع – ولانه يحتوى على مجموعة عناصر كتير مفيدة للزرع – وهو كمان اسهلهم لانه لا يتطلب غلى ولا أى حاجة
لو انت بتدمس فول فى البيت حيبقى عندك باستمرار ميزة توافر ماء نقع الفول – وبكدة الزرع بتاعك حيستفيد دايما وان شاء الله حتبقى صحته آخر جمال
ارجوا الافاده
اصنع منقوع لمختلف مخلفات المطبخ و اتركه اكثر من شهر و اضيف ماء
و لكن لاحظة وجود دود كثير بالخليط لونه ابيض و رائحة الخليط كريهه فهل هذا مضر ام جيد ارجو الافاده
شهر ونص طبعا كدة فسد ويجب التخلص منه
المفروض يومين ثلاثة فقط