آخر تحديث : 10-12-2016 الساعة 11:16 ص
عايز احكى لكم عن اكتشاف هايل اكتشفته فى عالم المشويات – اكتشفت ان الشوى البطئ فى الفرن بيدى طعامة رهيبة للأكل
انا بأشوى اللحوم والفراخ فى فرن البوتاجاز على درجة حرارة 140 مئوية – والمدة بتبقى حسب الحجم – يعنى مثلا الفرخة وزن 2000جم بتحتاج 3 ساعات – والفرخة 1200جم بتحتاج ساعتين – واللحمة النصف مطهية مسبقاً بتاخد ساعة شوى فى الفرن
طبعاً الفرن معروف انه بينشف الاكل – دة غير مشكلة الدهون والبهريز اللى بينز من أى حاجة بنشويها – لكن حل المشكلتين دول سهل حداً لو اتبعنا الطريقة التالية :
فى اليوم السابق نحشى الفرخة بخلطة مكونة من : بصل وفلفل رومى فتافيت ونحط عليهم شوية خل وبهارات وفلفل اسود ومعلقة صغيرة هرم ملح (معلقة ونصف لو فرخة 2كجم) – نحشى الفرخة تحت الجلد من امام ومن الخلف وداخل الوراك والمتبقى نحشى به تجويف الفرخة – وبعدين نحطها فى طبق غويط فى الثلاجة لليوم التالى – الخطوة دى بتخلى الفرخة لما تتشوى تبقى طرية وتذوب فى الفم – دة غير الطعامة الخطيرة طبعاً
فى اليوم التالى نجيب صينية فرن ونحط فيها أى تشكيلة خضروات بنفضلها – مثلا حلقات بطاطس وفوقها حلقات بصل وفلفل رومى وطماطم – وقبل خطوة الفرن الافضل عشان البطاطس تبقى ملبن اننا نحط فى الصينية 4 اكواب ماء مذاب فى كوب منهم معلقة كبيرة صلصة طماطم – ولا نضع للخضروات اى ملح او توابل – كله حيجيلها من فوق بعدين من الفرخة – ونغطيها بورق فويل ونحطها على عين البوتاجاز نصف ساعة – وبعدين نشيل الفويل – وبعدين نحط شبكة فوق الصينية – ونحط الفرخة او قطع اللحم على الشبكة – ونصب السوائل اللى اتجمعت فى طبق الثلاجة على الفرخة – وندخلهم الفرن على أعلى رف – وبعدين نشغل الفرن على 140 درجة – وبعد نصف المدة نأخذ بعض من السوائل المتجمعة فى الصينية ونوزعها على الفرخة او اللحمة وبعدين نقلبها على ظهرها ونحط عليها برضه شوية من سوائل الصينية وندخلها الفرن تانى
الوصفة دى بالتفصيل حتلاقوها بالضغط هنا <<
بالطريقة دى الفراخ او اللحمة بتستوى كويس جدا من جوة ومن برة لان الحرارة بتتغلغل فى كل اجزاءها – بعكس النار العالية اللى بتحرقها من برة بينما من جوة بتبقى لسة نية – وفى نفس الوقت البهريز مرحش هدر واستفدنا من كل قطرة منه فى صينية البطاطس – والفرخة واللحمة حتبقى مشوية زى المحلات وأحلى – بعكس لما بنحطها مع الخضروات وتبقى عايمة فى السوائل مش بتاخد لون الشوى الاحمر الجميل ولا طعامته بل بتبقى اقرب لطعم المسلوق وخصوصاً من جوة
نفس الطريقة ممكن نستخدمها مع اللحمة – نفس الصينية والشبكة فوقها وعليها اللحمة اللى حنشويها – دة لو لحمة صغيرة – اما لو كانت لحمة كبيرة بتاخد وقت فى السوا فممكن نسويها مع البصل فى حلة على النار بطريقة الطهى البطئ على اقل نار – كما لو كانت شمعة – لمدة ساعتين الاول وبعدين ندخلها الفرن بنفس الطريقة
وبالف هنا وشفا
اشكرك علي وصفاتك عملت صينيه البطاطس وكانت رائعه وهتكون ان شاء الله الوصفه الاساسي سؤالي الفرن عندي مفهوش مقياس حراره اعرف ا زاي درجه الحراره من غير مقياس ؟ كل الكيكات الي عملتها فشلت والاسباب الحراره اولاها وشكرا
الحمد لله ان الوصفة عجبت حضرتك – بالف هنا وشفا
بالنسبة لدرجة الحرارة : هل زرار الفرن عندك مفيهوش تدريج او أى علامات؟
شكرا لردك لا يوجد به اي علامات او تدريج والفرن عندي فرش
طيب حقول لحضرتك
احنا ممكن نحسبها
الافران بتتراوح درجة حرارتها بين ١٢٠ و ٢٥٠
بمعني انك لو لفيتي مفتاح الفرن للاخر تبقي الحرارة ٢٥٠
هاتي قلم ماركر وقسمي لفة المفتاح اربع ارباع . اقصي وضع للمفتاح اكتبي عند علامته ٢٥٠ وكل ربع قبله اكتبي عنده رقم اقل ٤٠ درجة . واقل حاجة اللي لو لفيتي المفتاح اقل منها الفرن يطفي اكتبي عليها ١٢٠
وبعدين حطي علامة صغيرة بين كل ربعين
كدي حتبقي كل علامة تزود الحرارة او تقللها ٢٠ درجة
شكرا لاهتمامك وردك