ازرع نعناع فى بلكونتك

عندى ليك مفاجأة النهاردة اضغط هنا عشان تشوفها (مفاجأة جديدة كل يوم)

زراعة النعناع فى البيت سهلة جدا – بدون بذور

اضغط هنا

لما نشترى حزمة او حزمتين نعناع طازج من السوق او من الخضرى – نبدأ ننزع اوراقهم من تحت لفوق لغاية ما نترك فقط اصغر ورقتين اللى مع بعض فى قمة العود فوق (التاج) – يعنى حيبقى عندنا عود طويل خالى من الارواق فيما عدا الورقتين الصغننين اللى مع بعض فى راس العود فقط

بعد كدة نربط العيدان – بنفس الرباط اللى اشتريناه بيه فى فازة او أى وعاء غير شفاف – ونراعى ان الورق الاخضر كله يكون على ارتفاع واحد بحيث يبقى فرق الاطوال من تحت فقط لكن من فوق يكونوا كلهم نفس الطول – ضرورى يكون الوعاء مش شفاف عشان الجذور تتكون – وياريت نجيب حتة كرتونة نقصها ونحطها حوالين السيقان كمان بحيث تغطى فتحة الفازة عشان نمنع دخول الضوء فى الماء من فوق كمان – لان لو دخل ضوء فى الماء حتظهر فروع خضراء تحت وليس جذور بيضاء – وبعدين نحطه فى الاول فى مكان بعيد عن الشمس – اضاءة متوسطة المهم يكون مش فى الشمس والا حيدبل لانه لسة بدون جذور – وكل كام يوم نغير الماء خصوصا لو عكر – ولو الماء قل نزوده

خلال 4 ايام حنلاحظ بدء ظهور جذور بيضاء رقيقة بدأت تظهر فى السيقان – ولما يعدى اسبوع او 10 ايام يبقى النعناع جاهز للنمو فننقله الى مكان مشمس – شمس شمس – النعناع بيحتاج شمس كتير – ولن يحتاج منا بعدها شئ سوى تزويد الماء كل ما يقل – وتغييره بين الحين والاخر

التغذية

بين الحين والاخر – مع كل تغيير لماء الفازة او الوعاء – ممكن نغذيه كالتالى : لما نسلق بيض ننتظر لما الماء يبرد ونضع منه معلقة فى الفازة – او نسلق قشر بطاطس 10 دقائق ولما الماء يبرد نحط منه معلقة فى الفازة – ولا نكرر ذلك الا بس لما نغير ماء الفازة بماء جديد

طريقة الزراعة فى الماء اسهل بكتير من الزراعة فى الطين – خصوصا للناس الجداد فى الزرع اللى لسة معندهومش خبرة كفاية – وفرص نجاح الزراعة فى الماء اكتر بكتير من الزراعة فى الطين – كفاية ان الزرع مش ممكن يموت من كتر السقى زى ما بيحصل مع الزرع فى الطين – وكمان الزرع فى الماء بيحتاج عناية أقل وممكن نترك الزرع مدة طويلة لو مثلا مسافرين بعكس الزرع فى الطين – وكمان الزراعة فى الماء تقدر تحافظ على الزرع طوال الشتاء لاننا نقدر ندخله من البلكونة ونضعه خلف زجاج شباك مشمس لنحميه من برد الشتاء

طبعاً مش كل الزرع ينفع ينمو ويعيش فى الماء – لكن هناك نباتات معروفة بقدرتها على العيش بسعادة فى الماء مثل النعناع – الزعتر – الاوريجانو – الريحان – المريمية – بلسم الليمون – وزرع كتير ممكن نكتشفه بالتجربة – انا ناوى باذن الله اجرب البقدونس والشبت والكزبرة والجرجير وحب الرشاد – ولو حاجة منهم نفعت حابقى اقول لكم باذن الله

………………………..

اما لو بنفضل طريقة الطينة: نحضر اصيص مخرم من اسفل ونملأه طينة او خليط بيتموس ورمل – وباستخدام قلم رصاص مثلا نعمل فى الطين خرم عميق نضع فيه برفق عود من اللى خرجت منه جذور – ونضغط خفيف بصوابعنا حول العود عشان نثبته فى الطين – ونعمل لكل عود خرم بنفس الطريقة – بس نراعى يكونوا بعيد عن بعض شوية عشان يتغذوا كويس – وبعدين نسقى الاصيص كويس لغاية ما الماء الزائد يخرج من اسفل ونتخلص منه

وسواءا زرعناه  فى الماء او فى الطين – فى الحالتين النعناع بيحتاج مكان مشمس – 4-6 ساعات شمس يوميا على الاقل

يوميات نعناع افندى

اليوم الاول (7-12-2016)

wp_20161207_11_35_18_pro

حزمتين نعناع بعد نزع اوراقهم السفلية كلها وربطهم ووضعهم فى فازة مغطاة بقطعة كرتون لمنع وصول الضوء الى الماء


بعد 4 ايام (11-12-2016)

بعد اول يومين غيرت الماء واضفت له معلقتين كبار من مشروب التغذية << لكن اتضح ان كدة غلط لان بهد كدة بيومين لما شميت ماء الفازة لقيته ريحته وحشة – فعرفت انى لازم اغلى الحاجة الاول – يعنى معلقة من ماء سلق البيض او معلقة من ماء سلق قشر بطاطس مثلا


بعد 12 يوم (19-12-2016)

نقلت النعناع من يومين ليصبح بجوار زجاج شباك مشمس – مع تغيير الماء كل يومين – ماء فقط بدون اى اضافات – لكن طبعا بانتظر حتى يتبخر كل الكلور من الماء قبل ان اعيد النعناع للفازة


 


 


 


 


 


 

 

لو الموضوع نال اعجابك اضغط هنا لدعم الكاتب (جزاكم الله خيراً)

2 تعليقان

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *