تدميس الفول فى البيت

 

 

تحديث : اقرأ اسرار تدميس فول دايب زي الزبدة

محلات الفول اصبحت تبيع الفول وكأنه الماظ – كمية صغيرة جدا لا تكفى طفل باسعار مبالغ فيها وتزيد كل يوم – دة غير خطورته على الصحة لان عربيات الفول وبعض المحلات بتستخدم مادة كيماوية خطيرة عشان الفول يستوى بسرعة ويوفروا فى ثمن انابيب البوتاجاز – بينما الفول المستورد سعره رخيص ويتراوح بين 5 و6ج للكيلو – تعالوا ندمس الفول فى البيت باسهل طريقة ومش حيكلفنا ربع ثمنه من المحلات

ملاحظات قبل البدء

  • انا كنت لما ادمس فول يطلع وشه مسود كانه محروق فطعمه يبقى مر – لغاية ما توصلت الى السبب : الهواء – فالفول يبدو انه يتأكسد بتعرضه للهواء – لذلك مهم اننا ندمس الفول فى حلة حجمها مناسب على قد الفول وماؤه – بحيث يملوا الحلة قرب الحافة فميبقاش فيه مكان للهواء اثناء الطهى – ويفضل كمان يكون غطاء الحلة به خرم لتنفيس البخار
  • مش لازم تعمل كيلو فول مرة واحدة – خصوصا لو احنا اسرة صغيرة – ممكن نعمل ربع الكمية – يعنى نعمل الكيلو على 4 مرات – كدة حيبقى الفول طازة فى الثلاجة اول باول من غير ما نحتاج نشيله فى الفريزر – المهم ان مقدار الماء يكون 4 اضعاف وزن الفول الجاف – يعنى الربع كيلو فول يحتاج لتر ماء للنقع ويحتاج لتر ماء للتدميس على النار
  • عند شراء الفول المستورد ابحث عن الفول الفاتح اللون وتجنب شراء الفول البنى الغامق

المقادير

  • كيلو فول تدميس مستورد
  • 4 لتر ماء للنقع
  • 4 لتر ماء للتدميس

الطريقة

  • ننقى الفول للتخلص من أى فولة بها ثقب او بقعة سوداء
  • نغسل الفول ونصفيه 3 مرات ثم ننقعه فى ماء 4 اضعاف وزنه ماء لمدة 6 ساعات
  • نصفى الفول من ماء النقع (يمكن استخدام الماء فى سقى النباتات لانه مغذى ممتاز لها) ثم نغسل الفول ونصفيه 3 مرات تماما من الماء
  • نضع ماء يعادل 4 اضعاف وزن الفول الخام فى حلة مغطاه على النار
  • بعد ما الماء يغلى نسقط فيه الفول ونغطيه مرة أخرى
  • بعد ما الماء يرجع يغلى تانى (حوالى 3 دقائق) نوطى النار أقل حاجة كانها شمعة
  • بعد ساعتين حيكون الفول استوى وجاهز للأكل – لكن انا باحب اسيبه على النار ساعة زيادة عشان ماؤه يتقل
  • ناخد من على الوش ما نحتاجه للأكل طازة ونضع الباقى فى الثلاجة بدون غطاء
  • واحنا بنسخن الفول نحط عليه ملح وخل ونقلب – وبعد ما نطفى النار نضيف زيت وكمون ومعلقة طحينة خام – ما نحطش ابدا الزيت الا بعد ما نطفى النار
  • يقدم مع سلطة بلدى – بصل (مقطع ومتقلب فى شوية خل) – خيار مخلل – سلطة طحينة
لو الموضوع نال اعجابك اضغط هنا لدعم الكاتب (جزاكم الله خيراً)

2 تعليقان

    • اشكر حضرتك على التعليق – لكنى انصحك بتجنب استخدام البيكربونات وخصوصا لو كنت تتناول الفول بصفة دائمة لان البيكربونات ضارة ولا يجب تناولها بصفة متكررة اكثر من اسبوعين – خصوصا لمرضى القلب والسكر والضغط وكبار السن
      ولا ضرر من ابقاء الفول مدة اطول على النار – المهم صحتك

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *