تجربتى مع اتصالات ADSL

آخر تحديث : 18-03-2019 الساعة 07:23 م

480_ar0تحديث: تركت اتصالات واشتركت مع تي اي داتا (WE) بعد ان تحسنت كثيرا عن السابق – يمكنكم متابعة تجربتي الجديدة مع وي ولماذا لغيت مع اتصالات هنا : تجربتي مع We وي (تي اي داتا)

تحديث سابق: اضفت لكم  فى نهاية الموضوع تقييمى للخدمة بعد 15 شهر من الاستخدام


من سنوات طويلة وانا مشترك فى تى اى داتا – بصراحة اتخنقت من مشكلة دائمة لا حل لها : السرعة غير ثابتة ابدا – ايام تبقى صاروخ وايام تانية تبقى بسرعة السلحفاة – لما تدخل فى مرحلة البطء دى ممكن تستمر ساعات او ايام قد تمتد لاسبوعين – انت ونصيبك – فتركتهم واشتركت فى لينك (اورنج) – السرعة عندهم ثابتة الى حد كبير – لكن الحسابات عندهم ملتوية وممكن جدا يدفعوك اكتر من حقهم – اللخبطة فى المحاسبة بتبدأ لما تشترك فى اى عرض من عروضهم – بعد العرض مش حتعرف هما بيدفعوك ايه – فلوس ورا فلوس – فكان لازم اسيبهم عشان اوقف نزيف المال دة – رجعت للأسف لتى اى داتا مضطر – وبعد حوالى سنتين من نفس مشكلة عدم ثبات السرعة قررت انى اسيبهم خالص – وخصوصا بعد ما عرفت ان اتصالات سعر الدى اس ال عندها ارخص من تى اى داتا وارونج وفودافون – ال2 ميجا ب110ج وال4 ميجا ب160ج – وليك سعة تحميل شهرى 150 جيجا لو خلصوا بتكمل الشهر على سرعة نصف ميجا – هما كاتبين غير محدود لكن دة مش صحيح – سياسة الاستخدام العادل مطبقة وليك 150 جيجا شهرى – والمحاسبة عندهم يوم 15 كل شهر كميعاد ثابت لتجديد الاشتراك لكل الناس – اول شهر بيحاسبوك على الايام اللى فاتت من ساعة ما الخدمة بدأت فقط – يعنى مثلا لو الخدمة عندك بدأت يوم 5 حيحاسبوك على 10 ايام فقط – وفى الشهور التالية تدفع اشتراك شهرى دائماً يوم 15 – وليك فترة سماح 9 ايام

(تحديث: قبل الدخول فى تفاصيل الاشتراك احب اقول لكم ان اكبر ميزة فى اتصالات – بجانب انهم ارخص سعر – ان السرعة ثابتة اغلب الوقت بعكس تى اى داتا – تقدروا تشوفوا نتيجة اختبار سرعة اشتراكى 2 ميجا بالضغط هنا – وهى نفس النتيجة اللى باحصل عليها من ساعة ما اشتركت فى اتصالات لا تتغير الا فيما ندر )

الخدمة بتدخل بسرعة – هما بيقولوا للعميل فى التليفون ان الخدمة بتاخد من اسبوع لاسبوعين لكابلات النحاس – ومن اسبوع لثلاثة اسابيع لكابلات الفايبر – لكن بالنسبة لى اخدت 5 ايام فقط من يوم ما وصلنى العقد والراوتر مع انى فايبر

الخطوات بتبدأ اولا بإنك اذا كنت مشترك فى شركة تانية لازم تروح الاول لشركتك وتملأ طلب الغاء للحصول على رقم الغاء – حيحاولوا يخوفوك ويقولولك ان رقم الالغاء بياخد اسبوعين ايام عمل وانه ممكن يوصل لشهر – لكن لا تقلق – الالغاء استغرق 5 ايام عمل فقط – منهم يوم بيبقوا واقفين اجراء الالغاء عشان حد من المبيعات يتصل بيك الاول ويحاول يغريك انك تفضل معاهم ومتسيبهومش – انا اتعرض عليا 6 شهور بنصف السعر ولما رفضت قال لى طب نخليها 9 شهور بنصف السعر! لكن عرضه لم ينسينى السرعة الغير ثابتة اللى ممكن تشل فرفضت طبعاً

لما يصدر لك رقم الالغاء مش حتعرف – الا بطريقة غريبة جدا – حتلاقى مندوبة من فودافون بتتصل بيك وتقول لك حضرتك لغيت مع تى اى داتا وصدر لك رقم الالغاء – فاحنا بنقدم لك عرض مميز – تحب تشترك معانا؟ وتقعد تسرد مزيا العرض بتاعهم – 3 عملاء اتصلوا ورا بعض فى نفس اليوم وكلهم شكرتهم ورفضت الاشتراك فى فودافون لان اسعارهم عبارة عن عروض مؤقتة مش اسعار دائمة زى اتصالاات – اول ما عرفت من اول مندوبة لفودافون ان الالغاء تم اتصلت على طول باتصالات واللى ردت اكدت لى بالفعل ان الخط حاليا متاح واخدت بياناتى عشان تعمل لى العقد وتبعته على البيت مع الراوتر المجانى من خلال مندوبهم خلال من يومين ل5 ايام – ولما عدوا ومجاش اتصلت تانى ففوجئت انهم قالولى ان شركة فودافون حجزت الخط بتاعى وان فودافون بتعمل كدة كتير بدون علم صاحب الخط! ونصحتنى ابلغ الجهاز القومى لتنظيم الاتصالات على رقم ارضى 155 – للتحقيق مع فودافون – وبالفعل اتصلت وكانوا ذوق جدا وبعد يومين اتصالات اتصلوا بى وابلغونى ان الخط اصبح متاح مرة أخرى – وبعد يومين بالظبط وصلنى العقد والراوتر

بتكون مجهز صورة بطاقتك ومبلغ 110ج تأمين (يفضلوا فى حسابك وتستردهم لو لغيت اشتراكك معهم فى أى وقت او تاخد بيهم شهر) – تديهم لمندوب اتصالات لما يجيب لك العقد والراوتر

الغريبة ان محدش بيتصل او يبعت رسالة يبلغك ان الخدمة اشتغلت – انا بعد اسبوع اتصلت كدة بالصدفة فلقيت خدمة العملاء بتقول لى مبروك يا فندم الخدمة اتفعلت عند حضرتك وحوصلك بالدعم الفنى عشان يساعدوا حضرتك فى اعدادات الراوتر – انا كنت قريت ناس تانية كاتبة انهم مش بيتصلوا يبلغوك ومكنتش مصدق – لكن بالفعل دة اللى حصل! – عموما مش مشكلة المهم ان التوصيل عندهم سريع جدا – ونصيحتى انك بعد مرور 5 ايام عمل تتصل انت بيهم

راوتر اتصالات الهدية ماركى هواوى موديل HG531 V1  وهو موديل جديد فى حجم الكف وتغطيته ممتازة وبينقل البيانات بسرعة 300 جيجابت فى الثانية والتعامل معاه سهل جداetisa-001

الانترنت المنزلى ADSL من اتصالات ماشاء الله سريع وثابت – قست السرعة من خلال موقع سبيد تست لقيت سرعة التنزيل 215ك فى الثانية – وسرعة الرفع 52ك فى الثانية – ممتاز بالنسبة لاشتراك 2 ميجا – والمدهش كمان ان البينج سريع جدا – 21 واحيانا 18 مللى ثانية – بينما فى تى اى داتا كان بطئ – حوالى 50 مللى ثانية

لكن للأسف حتى اتصالات يبدو ان عندها نفس مشكلة عدم ثبات السرعة – اذا فجأةً تلاقى السرعة هبطت للعشر – والبينج بقى بطئ جدا – بدلا من 20 فجأة تلاقيه بقى 2600 مثلاً !! – لكن دة لما بيحصل بيستمر دقائق فقط وليس ساعات ولا ايام مثل تى اى داتا

خدمة العملاء ذوق جدا ومتعاونين

توجد مشكلة ان صعب من خلال موقعهم تتابع استهلاكك الشهرى – فى تى اى داتا الموضوع دة سهل جدا وتقدر من خلال صفحتك عندهم انك تعرف كل تفاصيل اشتراكك – وتجدد اون لاين وتعرف استهلاكك فى اى وقت طوال الشهر – وتطلب تغيير السرعة وكمان تقدر تعمل تشات اونلاين مع خدمة العملاء اقسام المبيعات او الدعم الفنى – اما فى اتصالات فالخدمات دى مش واضحة وان كانت موجودة فهى بالتأكيد صعب الوصول اليها – فموقعهم مصمم اساساً لعملاء الموبايل – المفروض ينشئوا موقع مستقل لمشتركى الانترنت المنزلى ADSL

تحديث

بعد حوالى اسبوعين بعثت رسالة لخدمة العملاء واتصل بى مندوبهم والحمد لله حل لى المشكلة العويصة واخيرا بقى عندى صفحة عالنت اقدر اتابع منها استهلاكى فى اى وقت وكمان اقدر من خلالها ادفع الفاتورة الشهرية اونلاين

لو انت اشتركت وعايز تنشئ صفحة لمتابعة استهلاكك ابعت ايميل ل [email protected] او اتصل برقم ارضى : 16511 او موبايل : 01111234777
ا
و رقم ارضى : 35346377 من القاهرة او : 0235346377 من خارجها

أكبر مشكلة

لو خطك الارضى فايبر حتواجهك مشكلة غريبة مع اتصالات – كل اليوم على الساعة 7 او 8ص حتلاقى لمبة الدى اس ال طفت لوحدها – فلازم كل مرة تتصل باللدعم الفنى عشان يرجعولك النت – وتانى يوم تتكرر نفس المشكلة وتتصل تانى – كل يوم لمدة 25 يوم – بعدها الحمد لله المشكلة اختفت ولمبة الدى اس ال فى الراوتر مبقتش تطفى – فكرت كتير انى الغى معاهم وقلت لهم لو دة حصل حتدفعونى غرامة 199ج ؟ قالةا لى لأ لان السبب مش من حضرتك – لكن كل ما كنت افكر فى العذاب لو رجعت تى اى داتا وسرهة الزحلفة اللى ممكن تستمر ايام واسابيع أقول استحمل واستنى – اكيد ناس كتير بتلغى وتسيب اتصالات بسبب المشكلة دى – لكن فى الحقيقة مش هما السبب – السبب من المصرية للاتصالات لان السيستم بتاعهم بيقفل البورت اوتوماتيك كل يوم الصبح – واتصالات عندها ابليكشن بترجع النت للعميل يدوى فى كل مرة يحصل فيها ان لمبة الدى اس ال تطفى – اكيد صعب حد يصبر 25 يوم – بس كله يهون فى سبيل عدم الوقوع مرة اخرى تحت رحمة تى اى داتا

عايز تعرف استهلكت كام جيجا وفاضل لك كام ؟

هناك طريقتين – اما عن طريق صفحتك فى موقع اتصالات – او عن طريق التليفون

اذا لم تتمكن من انشاء حساب لك لتظهر لك صفحتك الخاصة على موقعهم – فهناك طريقة التليفون وهى كالآتى :

  • من التليفون الارضى اطلب : 0235346377
  • ثم اضغط 1122 لتستمع آلياً الى:
    • ما تم استهلاكه
    • ثم المتبقى فى رصيدك من الجيجات

لاحظ ان اتصالات بتبدأ تحسب استهلاكك بدءا من يوم 15 كل شهر – او من يوم 1 من كل شهر – وليس من يوم اشتراكك كباقى الشركات

واذا رصيدك من الجيجات انتهى كله قبل يوم 15 القادم سرعتك بتقل الى ربع ميجا او نصف ميجا (حسب اشتراكك) حتى يوم 15 فتعود السرعة كما كانت ويبدأ حساب ميجاتك من الصفر

تقييمى للتجربة بعد استخدام سنة و3 شهور

الثبات فى الخدمة والسرعة هى الصفة الاساسية لدى اس ال اتصالات – فخلال 15 شهر الحمد لله ولا مرة الخدمة اتقطعت ولا حدث أى عطل

انا تقريبا نسيت رقم الدعم الفنى بتاعهم لانى مش باستخدمه ولا محتاجهم فى اى حاجة

السرعة ثابتة معظم الوقت – طبعاً بتقل بين المغرب وحتى منتصف الليل لان دة وقت الزروة فى مصر كلها عموما – وبتبقى احسن باقى اليوم – لكن الفرق فى السرعة بين الفترتين مش كبير زى تى اى داتا

البطء الملحوظ فى السرعة مش بيتكرر الا قليل قوى ومش بيستمر ايام زى ما بيحصل لمشتركى تى اى داتا

بعد الزيادة فى الاسعار بسبب ضريبة ال14% بقت اتصالات ارخص اكتر كمان من الاول :

  • سرعة 2 ميجا بسعة 120 جيجا بقت ب125.40ج – تى اى داتا بقت ب159.60ج (سعة 150 جيجا)
  • سرعة 4 جيجا سعة 150 جيجا بقت ب182.40ج – تى اى داتا بقت ب250.8ج (سعة 200 جيجا)

تجديد الاشتراك اونلاين بيتم بدون اى مشاكل الحمد لله

الحمد لله انا راضى عن اتصالات ومش بافكر اسيبهم وبانصح اصحابى ومعارفى بالتحويل اليهم

بصراحة مش عارف ليه هما اقل عدد مشتركين فى مصر-160 الف فقط – مع انهم ممتازين الصراحة – ساعات بافكر اقول يمكن هو دة سبب ان سرعتهم ثابتة : ان زباينهم قليلين – وهو دة نفسه سبب رداءة خدمة تى اى داتا اللى مشتركيها 4 مليون بيتصارعوا على نفس الباندويدث اللى بخلانين يزودوه حبة لان كل تركيزهم فى حشر مزيد من الناس ةالتكويش على مزيد من الفلوس من جيوبهم

اذا كنت من مشتركى اتصالات او ناوى تشترك معاهم ياريت تبقى تكتب لنا رأيك فى الخدمة بعد فترة من الاستخدام – وتقارن ما بين شركتك القديمة وبين اتصالات – عشان الناس تستفيد وميبقاش رأيى انا لوحدى

وجزاكم الله خيراً

شارك هذا الموضوع
error

117 تعليق

    • لما تروح فرع تى داتا الموظف حيوهمك انك كدة حتقعد شهر بدون نت على الاقل – لكن الحقيقة ان تانى يوم من تقديمك لطب الالغاء حد حيتصل بيك ويعرض عليك 6 شهور بنصف القيمة ولو رفضت حيعرض عليك 9 شهور ولو رفضت حيتم الالغاء خلال 5 ايام ولو اتأخروا اطلب 155 وقدم شكوى حيجبروهم يلغولك خلال 48 ساعة
      اول ما يتم الالغاء كل الشركات حتتصل بيك عشان يحاولوا يقنعوك تشترك معاهم – انت لو متصل من قبل باتصالات حيتصلوا بيك او اتصل انت بيهم وسجل بياناتك وخلال يومين 3 حيبعتولك مندوب بالراوتر الجديد وصورة العقد وتكون محضر له مبلغ الاشتراك وصورة بطاقتك – وحيقولولك الخدمة حتشتغل خلال 21 يوم لكن بعد 5 ايام تقريبا الخدمة حتشتغل – خليك موصل الراوتر لانك حتعرف قبل ما هما يبلغوك بتشغيلها

        • لازم الخط الارضي
          اتصالات موقعها وحش جدا وشبة مستحيل انك تعرف استهلاكك من الموقع وانا كلمتهم كتير في الموضوع دة عشان يعملوا موقع منفصل للدى اس ال مفيش فايدة مش بياخدوا بنصيحتي – هما فاشلين تماما كموقع للأسف

          • عاوزين نعرف ايه مميزات أنظمة we الجديدة , نسيب اتصالات ونروح we

          • المعروف عن المصرية للاتصالات انها عنوان للخدمات الرديئة – وتغيير اسمها لا يغير من الامر شئ
            البينج بطئ جدا
            السرعات الكبيرة مقترنة بعدد جيجات هزلي
            ممكن تقرا تفاصيل اكتر هنا

          • انا حولت السرعه بتاعتي امبارح 4 ميجا بايت بس السرعه دلوقتي 2.7 ميجا بايت … بتاخد كام يوم بالظبط لحد ما السرعه 4 تيجيلي او حتي 3 ونص

          • السلك اللي جايلي من الشارع لونه فضي من الداخل .

            Downstream max rate (kbit/s)
            4032

            مع اني اتصلت بيهم وقولتهم خطي بيستحمل لحد سرعه كام قالو 29 ميجا

            Downstream line attenuation (dB) 20.5

            مش عارف اعمل ايه دلوقتي انتظر يومين كمان ولا اتصل بيهم وارجع لسرعه 2 ميجا تاني …..

            Downstream line rate (kbit/s) 3321

            البينج بتاعي ما بينزلش عن 95ms وساعات بطلع ms500

          • كلمهم لان الداونستريم لاين ريت مفروض يكون 4096 وليس 3321
            والبينج المفروض يكون في جدود 10 – احتمال يكون سلك التليفون اللى جايلك من الشارع محتاج يتغير لو فيه لحامات او وصلات

          • Downstream max rate (kbit/s)
            4032

            معني كدا ان الخط عندي بيستحمل لحد سرعه 4 ميجا بس وكدا اخره

          • الواصله اللي طالعه من سبلتر علي الروتر 12 متر .. هي المشكله …. اما وصلت الروتر علي السبلتر علي الوصله 1 متر جاب 20000 معني كدا انه فايبر …. والعيب كان في وصله 16 متر…. تفتكر كل ما طال السلك اللي طالع من سبلتر للروتر قلت سرعه النت زي مع حصل معايه ولا دا ضعف في جوده السلك 16 متر…

            السلك اللي جاي من الشارع لونه فضي ….. والسلك اللي طالع من السبلتر للروتر 16 متر نحاس…..

            تفتكر لو جبت سلك 16 متر فضي تفتكر المشكله تتحل

            انا عامل حكايه 16 متر سلك عشان خايف علي اسرتي من اشاره الوافاي كل ما ابعد اشاره و تكون متوسطه كان احسن اما يكون في قلب الشقه وحاط الروتر في البلكونه

  1. بعد نهايه ال quota السرعة تنزل الى 128kbs غير مقبولة على الاطلاق 1m مع we
    اقل سعر ل quota اضافية 25g = 75LE
    100g = 100LE مع we
    انا اتصالات بقالى سنين بس موضوع الكوته يخنق شكلهى هحول ل we وربنا يستر عالسرعة

        • مع اتصالات او اكتر من 3 سنين كمان وكلامك صح جداا وبجد فعلا رغم ان السرعه ال 2 مكنتش بتوصل اتنين بس كانت ثابته ومفتكرش انى كلمت خدمة العملاء اصلا
          المشكلة لما بتحلص ال 120 جيجا سعة التحميل … والسرعه بتنزل وبتصبح ضعيفه جداا وبتنتهى ف 25 يوم
          بفكر ف شركة وي والعروض الجديد بس الفكره ان مش عوز اقدم على خط جديد واعمل طلب الغاء لكن ف ناس بتخوفني لان المده ممكن توصل لشهر

          • مش فاهم ليه تقدم على خط جديد
            الالغاء بياخد 5 ايام ووي بتوصلك النت خلال يومين بالكتير 5 ايام
            بس على فكرة ممكن تندم لو البينج يهمك لان وي البينج بتاعهم رقمه كبير
            لو حتشترك في وي قولهم مش عاوز راوتر لانك لو قبلت راوتر مينفعش تسيبهم قبل سنة – اما بدون راوتر ممكن بعد شهر لو معجبتكش الخدمة تسيبهم

          • طيب تنصح ب ايه انا اصبحت باحرج جدا لما بيجي اطفال وبفضل افصل الروتر علشان الباقه بتخلص وفكرت انها بتمزل ل 50 كيلو تحميل ف الثانية حاجه بجد وحشه

          • ايه اللي بيخلي ال١٢٠ يخلصو معاك؟
            ممكن يكون حد من جيرانك بيستخدم الواى فاى بدون علمك
            هل بتنزل افلام حجمها كبير مثلا؟
            هل بتشوف يوتيوب اتش دي؟
            قل لي استخداماتك ايه وكام جهاز في البيت

          • 3 تلفونات و اللاب بتاعي
            الفكره ان معدل ف اليوم احياننا بيصل ل 3 جيجا اقل حاجه ف اليوم استهلاك دا غير يوم زي الجمعه ف اطفال بيكونه ف البيت والفديوهات بتفتح معهم بطريقه هستيري انا بحول اجي على نفسي وارشد ف استهلاكي بس مش عارف لدرجة الشهر دا اهو بستخدم برنامج تحديد السرعة علشان بس يقدر يشغل معايه لاخر الشهر الفكره النهاردة 30 اهو وحاليا النت الاستهلاك مخلص 65 جيجا
            اول ما اتجددت يوم 15 ف الشهر من بدا الساعه 12 بليل ل تاني يوم يعني ف 24 ساعة كان الاستهلاك 18 جيجا علشان كان خلصانه قبلها ب 8 ايام والموبيلات ما صدقت
            وانا اصلا طلب ف هندسة اتصالات وبنزل تدريب احيانا ف شركة اتصالات وعارف انها شركة محترمه
            واهو خلص تقريب نصه ف 14 يوم وكمان محدد السرعه للبيفتحه

          • 3 جيجا في اليوم استهلاك معقول
            بالنسبة للاطفال اضبط لهم يوتيوب علي ريزوليوشن ٣٦٠ او ٤٨٠ بلاش اوتو
            وممكن تستخدم في الراوتر فلتر الماك ادرس عشان تضمن ان محدش بيلقط النت بتاعك من برة البيت

  2. لو سمحت محتاج اعرف المده اللي اقدر الغي اشتراك الانترنت م اتصالات بدون ما ادفع الغرامه …. وهل فعلا بياخدو الراوتر بعد الغاء الخدمه .. انا مشترك ف معاهم م شهر 1/2018 اقدر الغيه امتي ؟
    وشكرا جدا لذوقك واتمنالك كل التوفيق …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.