تجربتى مع اتصالات ADSL

480_ar0من سنوات طويلة وانا مشترك فى تى اى داتا – بصراحة اتخنقت من مشكلة دائمة لا حل لها : السرعة غير ثابتة ابدا – ايام تبقى صاروخ وايام تانية تبقى بسرعة السلحفاة – لما تدخل فى مرحلة البطء دى ممكن تستمر ساعات او ايام قد تمتد لاسبوعين – انت ونصيبك – فتركتهم واشتركت فى لينك (اورنج) – السرعة عندهم ثابتة الى حد كبير – لكن الحسابات عندهم ملتوية وممكن جدا يدفعوك اكتر من حقهم – اللخبطة فى المحاسبة بتبدأ لما تشترك فى اى عرض من عروضهم – بعد العرض مش حتعرف هما بيدفعوك ايه – فلوس ورا فلوس – فكان لازم اسيبهم عشان اوقف نزيف المال دة – رجعت للأسف لتى اى داتا مضطر – وبعد حوالى سنتين من نفس مشكلة عدم ثبات السرعة قررت انى اسيبهم خالص – وخصوصا بعد ما عرفت ان اتصالات سعر الدى اس ال عندها ارخص من تى اى داتا وارونج وفودافون – ال2 ميجا ب110ج وال4 ميجا ب160ج – وليك سعة تحميل شهرى 150 جيجا لو خلصوا بتكمل الشهر على سرعة نصف ميجا – هما كاتبين غير محدود لكن دة مش صحيح – سياسة الاستخدام العادل مطبقة وليك 150 جيجا شهرى – والمحاسبة عندهم يوم 15 كل شهر كميعاد ثابت لتجديد الاشتراك لكل الناس – اول شهر بيحاسبوك على الايام اللى فاتت من ساعة ما الخدمة بدأت فقط – يعنى مثلا لو الخدمة عندك بدأت يوم 5 حيحاسبوك على 10 ايام فقط – وفى الشهور التالية تدفع اشتراك شهرى دائماً يوم 15 – وليك فترة سماح 9 ايام

اضغط هنا

(تحديث: قبل الدخول فى تفاصيل الاشتراك احب اقول لكم ان اكبر ميزة فى اتصالات – بجانب انهم ارخص سعر – ان السرعة ثابتة اغلب الوقت بعكس تى اى داتا – تقدروا تشوفوا نتيجة اختبار سرعة اشتراكى 2 ميجا بالضغط هنا – وهى نفس النتيجة اللى باحصل عليها من ساعة ما اشتركت فى اتصالات لا تتغير الا فيما ندر )

الخدمة بتدخل بسرعة – هما بيقولوا للعميل فى التليفون ان الخدمة بتاخد من اسبوع لاسبوعين لكابلات النحاس – ومن اسبوع لثلاثة اسابيع لكابلات الفايبر – لكن بالنسبة لى اخدت 5 ايام فقط من يوم ما وصلنى العقد والراوتر مع انى فايبر

الخطوات بتبدأ اولا بإنك اذا كنت مشترك فى شركة تانية لازم تروح الاول لشركتك وتملأ طلب الغاء للحصول على رقم الغاء – حيحاولوا يخوفوك ويقولولك ان رقم الالغاء بياخد اسبوعين ايام عمل وانه ممكن يوصل لشهر – لكن لا تقلق – الالغاء استغرق 5 ايام عمل فقط – منهم يوم بيبقوا واقفين اجراء الالغاء عشان حد من المبيعات يتصل بيك الاول ويحاول يغريك انك تفضل معاهم ومتسيبهومش – انا اتعرض عليا 6 شهور بنصف السعر ولما رفضت قال لى طب نخليها 9 شهور بنصف السعر! لكن عرضه لم ينسينى السرعة الغير ثابتة اللى ممكن تشل فرفضت طبعاً

لما يصدر لك رقم الالغاء مش حتعرف – الا بطريقة غريبة جدا – حتلاقى مندوبة من فودافون بتتصل بيك وتقول لك حضرتك لغيت مع تى اى داتا وصدر لك رقم الالغاء – فاحنا بنقدم لك عرض مميز – تحب تشترك معانا؟ وتقعد تسرد مزيا العرض بتاعهم – 3 عملاء اتصلوا ورا بعض فى نفس اليوم وكلهم شكرتهم ورفضت الاشتراك فى فودافون لان اسعارهم عبارة عن عروض مؤقتة مش اسعار دائمة زى اتصالاات – اول ما عرفت من اول مندوبة لفودافون ان الالغاء تم اتصلت على طول باتصالات واللى ردت اكدت لى بالفعل ان الخط حاليا متاح واخدت بياناتى عشان تعمل لى العقد وتبعته على البيت مع الراوتر المجانى من خلال مندوبهم خلال من يومين ل5 ايام – ولما عدوا ومجاش اتصلت تانى ففوجئت انهم قالولى ان شركة فودافون حجزت الخط بتاعى وان فودافون بتعمل كدة كتير بدون علم صاحب الخط! ونصحتنى ابلغ الجهاز القومى لتنظيم الاتصالات على رقم ارضى 155 – للتحقيق مع فودافون – وبالفعل اتصلت وكانوا ذوق جدا وبعد يومين اتصالات اتصلوا بى وابلغونى ان الخط اصبح متاح مرة أخرى – وبعد يومين بالظبط وصلنى العقد والراوتر

بتكون مجهز صورة بطاقتك ومبلغ 110ج تأمين (يفضلوا فى حسابك وتستردهم لو لغيت اشتراكك معهم فى أى وقت او تاخد بيهم شهر) – تديهم لمندوب اتصالات لما يجيب لك العقد والراوتر

الغريبة ان محدش بيتصل او يبعت رسالة يبلغك ان الخدمة اشتغلت – انا بعد اسبوع اتصلت كدة بالصدفة فلقيت خدمة العملاء بتقول لى مبروك يا فندم الخدمة اتفعلت عند حضرتك وحوصلك بالدعم الفنى عشان يساعدوا حضرتك فى اعدادات الراوتر – انا كنت قريت ناس تانية كاتبة انهم مش بيتصلوا يبلغوك ومكنتش مصدق – لكن بالفعل دة اللى حصل! – عموما مش مشكلة المهم ان التوصيل عندهم سريع جدا – ونصيحتى انك بعد مرور 5 ايام عمل تتصل انت بيهم

راوتر اتصالات الهدية ماركى هواوى موديل HG531 V1  وهو موديل جديد فى حجم الكف وتغطيته ممتازة وبينقل البيانات بسرعة 300 جيجابت فى الثانية والتعامل معاه سهل جداetisa-001

الانترنت المنزلى ADSL من اتصالات ماشاء الله سريع وثابت – قست السرعة من خلال موقع سبيد تست لقيت سرعة التنزيل 215ك فى الثانية – وسرعة الرفع 52ك فى الثانية – ممتاز بالنسبة لاشتراك 2 ميجا – والمدهش كمان ان البينج سريع جدا – 21 واحيانا 18 مللى ثانية – بينما فى تى اى داتا كان بطئ – حوالى 50 مللى ثانية

لكن للأسف حتى اتصالات يبدو ان عندها نفس مشكلة عدم ثبات السرعة – اذا فجأةً تلاقى السرعة هبطت للعشر – والبينج بقى بطئ جدا – بدلا من 20 فجأة تلاقيه بقى 2600 مثلاً !! – لكن دة لما بيحصل بيستمر دقائق فقط وليس ساعات ولا ايام مثل تى اى داتا

خدمة العملاء ذوق جدا ومتعاونين

توجد مشكلة ان صعب من خلال موقعهم تتابع استهلاكك الشهرى – فى تى اى داتا الموضوع دة سهل جدا وتقدر من خلال صفحتك عندهم انك تعرف كل تفاصيل اشتراكك – وتجدد اون لاين وتعرف استهلاكك فى اى وقت طوال الشهر – وتطلب تغيير السرعة وكمان تقدر تعمل تشات اونلاين مع خدمة العملاء اقسام المبيعات او الدعم الفنى – اما فى اتصالات فالخدمات دى مش واضحة وان كانت موجودة فهى بالتأكيد صعب الوصول اليها – فموقعهم مصمم اساساً لعملاء الموبايل – المفروض ينشئوا موقع مستقل لمشتركى الانترنت المنزلى ADSL

تحديث

بعد حوالى اسبوعين بعثت رسالة لخدمة العملاء واتصل بى مندوبهم والحمد لله حل لى المشكلة العويصة واخيرا بقى عندى صفحة عالنت اقدر اتابع منها استهلاكى فى اى وقت وكمان اقدر من خلالها ادفع الفاتورة الشهرية اونلاين

لو انت اشتركت وعايز تنشئ صفحة لمتابعة استهلاكك ابعت ايميل ل [email protected] او اتصل برقم ارضى : 16511 او موبايل : 01111234777

أكبر مشكلة

لو خطك الارضى فايبر حتواجهك مشكلة غريبة مع اتصالات – كل اليوم على الساعة 7 او 8ص حتلاقى لمبة الدى اس ال طفت لوحدها – فلازم كل مرة تتصل باللدعم الفنى عشان يرجعولك النت – وتانى يوم تتكرر نفس المشكلة وتتصل تانى – كل يوم لمدة 25 يوم – بعدها الحمد لله المشكلة اختفت ولمبة الدى اس ال فى الراوتر مبقتش تطفى – فكرت كتير انى الغى معاهم وقلت لهم لو دة حصل حتدفعونى غرامة 199ج ؟ قالةا لى لأ لان السبب مش من حضرتك – لكن كل ما كنت افكر فى العذاب لو رجعت تى اى داتا وسرهة الزحلفة اللى ممكن تستمر ايام واسابيع أقول استحمل واستنى – اكيد ناس كتير بتلغى وتسيب اتصالات بسبب المشكلة دى – لكن فى الحقيقة مش هما السبب – السبب من المصرية للاتصالات لان السيستم بتاعهم بيقفل البورت اوتوماتيك كل يوم الصبح – واتصالات عندها ابليكشن بترجع النت للعميل يدوى فى كل مرة يحصل فيها ان لمبة الدى اس ال تطفى – اكيد صعب حد يصبر 25 يوم – بس كله يهون فى سبيل عدم الوقوع مرة اخرى تحت رحمة تى اى داتا

لو الموضوع نال اعجابك اضغط هنا لدعم الكاتب (جزاكم الله خيراً)

8 تعليقات

  1. شجعتنى على تجربة اتصالات و بالفعل هبدا بالغاء التعاقد مع شركتى الحالية .
    عندى سؤالين
    1- اطلب منى ارجاع الراوتر المجانى الي بيقدم مع الخدمة …. عادى ؟
    2- الاشتراك ده من اكتر من سنتين ….. علبة الراوتر مش موجودة …. هيغلسوا فى حاجة ؟
    شكرا جزيلا لعرض التجربة

    • الراوتر المجانى اصبح ملكك ولن يسترده احد منك ابداً
      حضرتك حاليا مع شركة ايه؟
      وبالمناسبة من فضلك ياريت اعرف رأيك في صفحة الاعلانات اللي بتظهر لك عند الضغط علي روابط الموقع
      هل سببت لك ازعاج كبير؟ ام يمكنك تحملها؟
      في الحقيقة الاعلانات تساعدني علي دفع نفقات الموقع وتسهم ايضا في جزء من دخلي الشهري . لكني في نفس الوقت اخشي ان تزعج قرائي الاعزاء فأخسرهم اذا ما قرروا لا سمح الله عدم العودة للموقع
      رأيك يهمني جدا فياريت اعرفه من فضلك لاني محتار
      ربنا يبارك لك

  2. انا بستخدم 4g والسرعة مش بتقل عن ٢٥ميجا ولو مكان حلو بتوصل الى ٦٠ ميجا ، بس طبعا اسعار الباقات مش بتخليك تستمتع بالسرعة بدون تانيب ضمير .
    اتصلت عليهم وقالولي ان اسرع خط منزلي هيبقا ٨ ميجا.
    هل حضرتك مرتاح بسرعة ٢ ميجا وشايف ان ٨ هتبقى فرق كبير و كويسة لمشاهدة الافلام والفيديوهات ؟

    • 2 ميجا سرعة معقولة جدا – بتخدم 3-4 اشخاص – طبعا احيانا بيكون بطئ لكن فى اتصالات فترات البطء اقل بكتير من تى داتا – ابنى بيتفرج على افلام اونلاين بدون تقطيع – لكن انا بافضل تنزيل الافلام تورنت عشان كلنا نشوفهم وقت ما نحب – التورنت ميفرقش سرعتك كام – مسألة وقت فقط – يعنى ممكن تحط 20 فيلم ينزلو براحتهم خلال يومين – او فيلم فيلم وكدة حينزل فيلم 1 جيجا مثلا كل ساعتين تقريبا
      التورنت بيخليك مش ضرورى يكون عندك سرعة كبيرة – الاهم هو الميجات المسموحة لك – 120 جيجا طبعا اكبر من اى باقة ودة يسمح لك بتنزيل افلام كتير قوى
      وبالنسبة للفيديو فيوتيوب والماتشات بتشتغل على 480 بدون تقطيع
      وفر فلوسك واشترك 2 ميجا – جرب الاول ولو معجبتكش تبقى على
      (على فكرة مصر حتبقى اقل سرعة فيها 4 ميجا اول 2018 حسب كلام وزير الاتصالات)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *