تجربتى مع اتصالات ADSL

Posted by on

آخر تحديث : 18-03-2019 الساعة 07:23 م

480_ar0تحديث: تركت اتصالات واشتركت مع تي اي داتا (WE) بعد ان تحسنت كثيرا عن السابق – يمكنكم متابعة تجربتي الجديدة مع وي ولماذا لغيت مع اتصالات هنا : تجربتي مع We وي (تي اي داتا)

تحديث سابق: اضفت لكم  فى نهاية الموضوع تقييمى للخدمة بعد 15 شهر من الاستخدام

من سنوات طويلة وانا مشترك فى تى اى داتا – بصراحة اتخنقت من مشكلة دائمة لا حل لها : السرعة غير ثابتة ابدا – ايام تبقى صاروخ وايام تانية تبقى بسرعة السلحفاة – لما تدخل فى مرحلة البطء دى ممكن تستمر ساعات او ايام قد تمتد لاسبوعين – انت ونصيبك – فتركتهم واشتركت فى لينك (اورنج) – السرعة عندهم ثابتة الى حد كبير – لكن الحسابات عندهم ملتوية وممكن جدا يدفعوك اكتر من حقهم – اللخبطة فى المحاسبة بتبدأ لما تشترك فى اى عرض من عروضهم – بعد العرض مش حتعرف هما بيدفعوك ايه – فلوس ورا فلوس – فكان لازم اسيبهم عشان اوقف نزيف المال دة – رجعت للأسف لتى اى داتا مضطر – وبعد حوالى سنتين من نفس مشكلة عدم ثبات السرعة قررت انى اسيبهم خالص – وخصوصا بعد ما عرفت ان اتصالات سعر الدى اس ال عندها ارخص من تى اى داتا وارونج وفودافون – ال2 ميجا ب110ج وال4 ميجا ب160ج – وليك سعة تحميل شهرى 150 جيجا لو خلصوا بتكمل الشهر على سرعة نصف ميجا – هما كاتبين غير محدود لكن دة مش صحيح – سياسة الاستخدام العادل مطبقة وليك 150 جيجا شهرى – والمحاسبة عندهم يوم 15 كل شهر كميعاد ثابت لتجديد الاشتراك لكل الناس – اول شهر بيحاسبوك على الايام اللى فاتت من ساعة ما الخدمة بدأت فقط – يعنى مثلا لو الخدمة عندك بدأت يوم 5 حيحاسبوك على 10 ايام فقط – وفى الشهور التالية تدفع اشتراك شهرى دائماً يوم 15 – وليك فترة سماح 9 ايام

(تحديث: قبل الدخول فى تفاصيل الاشتراك احب اقول لكم ان اكبر ميزة فى اتصالات – بجانب انهم ارخص سعر – ان السرعة ثابتة اغلب الوقت بعكس تى اى داتا – تقدروا تشوفوا نتيجة اختبار سرعة اشتراكى 2 ميجا بالضغط هنا – وهى نفس النتيجة اللى باحصل عليها من ساعة ما اشتركت فى اتصالات لا تتغير الا فيما ندر )

الخدمة بتدخل بسرعة – هما بيقولوا للعميل فى التليفون ان الخدمة بتاخد من اسبوع لاسبوعين لكابلات النحاس – ومن اسبوع لثلاثة اسابيع لكابلات الفايبر – لكن بالنسبة لى اخدت 5 ايام فقط من يوم ما وصلنى العقد والراوتر مع انى فايبر

الخطوات بتبدأ اولا بإنك اذا كنت مشترك فى شركة تانية لازم تروح الاول لشركتك وتملأ طلب الغاء للحصول على رقم الغاء – حيحاولوا يخوفوك ويقولولك ان رقم الالغاء بياخد اسبوعين ايام عمل وانه ممكن يوصل لشهر – لكن لا تقلق – الالغاء استغرق 5 ايام عمل فقط – منهم يوم بيبقوا واقفين اجراء الالغاء عشان حد من المبيعات يتصل بيك الاول ويحاول يغريك انك تفضل معاهم ومتسيبهومش – انا اتعرض عليا 6 شهور بنصف السعر ولما رفضت قال لى طب نخليها 9 شهور بنصف السعر! لكن عرضه لم ينسينى السرعة الغير ثابتة اللى ممكن تشل فرفضت طبعاً

لما يصدر لك رقم الالغاء مش حتعرف – الا بطريقة غريبة جدا – حتلاقى مندوبة من فودافون بتتصل بيك وتقول لك حضرتك لغيت مع تى اى داتا وصدر لك رقم الالغاء – فاحنا بنقدم لك عرض مميز – تحب تشترك معانا؟ وتقعد تسرد مزيا العرض بتاعهم – 3 عملاء اتصلوا ورا بعض فى نفس اليوم وكلهم شكرتهم ورفضت الاشتراك فى فودافون لان اسعارهم عبارة عن عروض مؤقتة مش اسعار دائمة زى اتصالاات – اول ما عرفت من اول مندوبة لفودافون ان الالغاء تم اتصلت على طول باتصالات واللى ردت اكدت لى بالفعل ان الخط حاليا متاح واخدت بياناتى عشان تعمل لى العقد وتبعته على البيت مع الراوتر المجانى من خلال مندوبهم خلال من يومين ل5 ايام – ولما عدوا ومجاش اتصلت تانى ففوجئت انهم قالولى ان شركة فودافون حجزت الخط بتاعى وان فودافون بتعمل كدة كتير بدون علم صاحب الخط! ونصحتنى ابلغ الجهاز القومى لتنظيم الاتصالات على رقم ارضى 155 – للتحقيق مع فودافون – وبالفعل اتصلت وكانوا ذوق جدا وبعد يومين اتصالات اتصلوا بى وابلغونى ان الخط اصبح متاح مرة أخرى – وبعد يومين بالظبط وصلنى العقد والراوتر

بتكون مجهز صورة بطاقتك ومبلغ 110ج تأمين (يفضلوا فى حسابك وتستردهم لو لغيت اشتراكك معهم فى أى وقت او تاخد بيهم شهر) – تديهم لمندوب اتصالات لما يجيب لك العقد والراوتر

الغريبة ان محدش بيتصل او يبعت رسالة يبلغك ان الخدمة اشتغلت – انا بعد اسبوع اتصلت كدة بالصدفة فلقيت خدمة العملاء بتقول لى مبروك يا فندم الخدمة اتفعلت عند حضرتك وحوصلك بالدعم الفنى عشان يساعدوا حضرتك فى اعدادات الراوتر – انا كنت قريت ناس تانية كاتبة انهم مش بيتصلوا يبلغوك ومكنتش مصدق – لكن بالفعل دة اللى حصل! – عموما مش مشكلة المهم ان التوصيل عندهم سريع جدا – ونصيحتى انك بعد مرور 5 ايام عمل تتصل انت بيهم

راوتر اتصالات الهدية ماركى هواوى موديل HG531 V1  وهو موديل جديد فى حجم الكف وتغطيته ممتازة وبينقل البيانات بسرعة 300 جيجابت فى الثانية والتعامل معاه سهل جداetisa-001

الانترنت المنزلى ADSL من اتصالات ماشاء الله سريع وثابت – قست السرعة من خلال موقع سبيد تست لقيت سرعة التنزيل 215ك فى الثانية – وسرعة الرفع 52ك فى الثانية – ممتاز بالنسبة لاشتراك 2 ميجا – والمدهش كمان ان البينج سريع جدا – 21 واحيانا 18 مللى ثانية – بينما فى تى اى داتا كان بطئ – حوالى 50 مللى ثانية

لكن للأسف حتى اتصالات يبدو ان عندها نفس مشكلة عدم ثبات السرعة – اذا فجأةً تلاقى السرعة هبطت للعشر – والبينج بقى بطئ جدا – بدلا من 20 فجأة تلاقيه بقى 2600 مثلاً !! – لكن دة لما بيحصل بيستمر دقائق فقط وليس ساعات ولا ايام مثل تى اى داتا

خدمة العملاء ذوق جدا ومتعاونين

توجد مشكلة ان صعب من خلال موقعهم تتابع استهلاكك الشهرى – فى تى اى داتا الموضوع دة سهل جدا وتقدر من خلال صفحتك عندهم انك تعرف كل تفاصيل اشتراكك – وتجدد اون لاين وتعرف استهلاكك فى اى وقت طوال الشهر – وتطلب تغيير السرعة وكمان تقدر تعمل تشات اونلاين مع خدمة العملاء اقسام المبيعات او الدعم الفنى – اما فى اتصالات فالخدمات دى مش واضحة وان كانت موجودة فهى بالتأكيد صعب الوصول اليها – فموقعهم مصمم اساساً لعملاء الموبايل – المفروض ينشئوا موقع مستقل لمشتركى الانترنت المنزلى ADSL

تحديث

بعد حوالى اسبوعين بعثت رسالة لخدمة العملاء واتصل بى مندوبهم والحمد لله حل لى المشكلة العويصة واخيرا بقى عندى صفحة عالنت اقدر اتابع منها استهلاكى فى اى وقت وكمان اقدر من خلالها ادفع الفاتورة الشهرية اونلاين

لو انت اشتركت وعايز تنشئ صفحة لمتابعة استهلاكك ابعت ايميل ل Tec[email protected] او اتصل برقم ارضى : 16511 او موبايل : 01111234777
او رقم ارضى : 35346377 من القاهرة او : 0235346377 من خارجها

أكبر مشكلة

لو خطك الارضى فايبر حتواجهك مشكلة غريبة مع اتصالات – كل اليوم على الساعة 7 او 8ص حتلاقى لمبة الدى اس ال طفت لوحدها – فلازم كل مرة تتصل باللدعم الفنى عشان يرجعولك النت – وتانى يوم تتكرر نفس المشكلة وتتصل تانى – كل يوم لمدة 25 يوم – بعدها الحمد لله المشكلة اختفت ولمبة الدى اس ال فى الراوتر مبقتش تطفى – فكرت كتير انى الغى معاهم وقلت لهم لو دة حصل حتدفعونى غرامة 199ج ؟ قالةا لى لأ لان السبب مش من حضرتك – لكن كل ما كنت افكر فى العذاب لو رجعت تى اى داتا وسرهة الزحلفة اللى ممكن تستمر ايام واسابيع أقول استحمل واستنى – اكيد ناس كتير بتلغى وتسيب اتصالات بسبب المشكلة دى – لكن فى الحقيقة مش هما السبب – السبب من المصرية للاتصالات لان السيستم بتاعهم بيقفل البورت اوتوماتيك كل يوم الصبح – واتصالات عندها ابليكشن بترجع النت للعميل يدوى فى كل مرة يحصل فيها ان لمبة الدى اس ال تطفى – اكيد صعب حد يصبر 25 يوم – بس كله يهون فى سبيل عدم الوقوع مرة اخرى تحت رحمة تى اى داتا

عايز تعرف استهلكت كام جيجا وفاضل لك كام ؟

هناك طريقتين – اما عن طريق صفحتك فى موقع اتصالات – او عن طريق التليفون

اذا لم تتمكن من انشاء حساب لك لتظهر لك صفحتك الخاصة على موقعهم – فهناك طريقة التليفون وهى كالآتى :

  • من التليفون الارضى اطلب : 0235346377
  • ثم اضغط 1122 لتستمع آلياً الى:
    • ما تم استهلاكه
    • ثم المتبقى فى رصيدك من الجيجات

لاحظ ان اتصالات بتبدأ تحسب استهلاكك بدءا من يوم 15 كل شهر – او من يوم 1 من كل شهر – وليس من يوم اشتراكك كباقى الشركات

واذا رصيدك من الجيجات انتهى كله قبل يوم 15 القادم سرعتك بتقل الى ربع ميجا او نصف ميجا (حسب اشتراكك) حتى يوم 15 فتعود السرعة كما كانت ويبدأ حساب ميجاتك من الصفر

تقييمى للتجربة بعد استخدام سنة و3 شهور

الثبات فى الخدمة والسرعة هى الصفة الاساسية لدى اس ال اتصالات – فخلال 15 شهر الحمد لله ولا مرة الخدمة اتقطعت ولا حدث أى عطل

انا تقريبا نسيت رقم الدعم الفنى بتاعهم لانى مش باستخدمه ولا محتاجهم فى اى حاجة

السرعة ثابتة معظم الوقت – طبعاً بتقل بين المغرب وحتى منتصف الليل لان دة وقت الزروة فى مصر كلها عموما – وبتبقى احسن باقى اليوم – لكن الفرق فى السرعة بين الفترتين مش كبير زى تى اى داتا

البطء الملحوظ فى السرعة مش بيتكرر الا قليل قوى ومش بيستمر ايام زى ما بيحصل لمشتركى تى اى داتا

بعد الزيادة فى الاسعار بسبب ضريبة ال14% بقت اتصالات ارخص اكتر كمان من الاول :

  • سرعة 2 ميجا بسعة 120 جيجا بقت ب125.40ج – تى اى داتا بقت ب159.60ج (سعة 150 جيجا)
  • سرعة 4 جيجا سعة 150 جيجا بقت ب182.40ج – تى اى داتا بقت ب250.8ج (سعة 200 جيجا)

تجديد الاشتراك اونلاين بيتم بدون اى مشاكل الحمد لله

الحمد لله انا راضى عن اتصالات ومش بافكر اسيبهم وبانصح اصحابى ومعارفى بالتحويل اليهم

بصراحة مش عارف ليه هما اقل عدد مشتركين فى مصر-160 الف فقط – مع انهم ممتازين الصراحة – ساعات بافكر اقول يمكن هو دة سبب ان سرعتهم ثابتة : ان زباينهم قليلين – وهو دة نفسه سبب رداءة خدمة تى اى داتا اللى مشتركيها 4 مليون بيتصارعوا على نفس الباندويدث اللى بخلانين يزودوه حبة لان كل تركيزهم فى حشر مزيد من الناس ةالتكويش على مزيد من الفلوس من جيوبهم

اذا كنت من مشتركى اتصالات او ناوى تشترك معاهم ياريت تبقى تكتب لنا رأيك فى الخدمة بعد فترة من الاستخدام – وتقارن ما بين شركتك القديمة وبين اتصالات – عشان الناس تستفيد وميبقاش رأيى انا لوحدى

وجزاكم الله خيراً

119 Comments

  1. شجعتنى على تجربة اتصالات و بالفعل هبدا بالغاء التعاقد مع شركتى الحالية .
    عندى سؤالين
    1- اطلب منى ارجاع الراوتر المجانى الي بيقدم مع الخدمة …. عادى ؟
    2- الاشتراك ده من اكتر من سنتين ….. علبة الراوتر مش موجودة …. هيغلسوا فى حاجة ؟
    شكرا جزيلا لعرض التجربة

    رد على هذا التعليق << to this comment

    • الراوتر المجانى اصبح ملكك ولن يسترده احد منك ابداً
      حضرتك حاليا مع شركة ايه؟
      وبالمناسبة من فضلك ياريت اعرف رأيك في صفحة الاعلانات اللي بتظهر لك عند الضغط علي روابط الموقع
      هل سببت لك ازعاج كبير؟ ام يمكنك تحملها؟
      في الحقيقة الاعلانات تساعدني علي دفع نفقات الموقع وتسهم ايضا في جزء من دخلي الشهري . لكني في نفس الوقت اخشي ان تزعج قرائي الاعزاء فأخسرهم اذا ما قرروا لا سمح الله عدم العودة للموقع
      رأيك يهمني جدا فياريت اعرفه من فضلك لاني محتار
      ربنا يبارك لك

      رد على هذا التعليق << to this comment

  4. انا بستخدم 4g والسرعة مش بتقل عن ٢٥ميجا ولو مكان حلو بتوصل الى ٦٠ ميجا ، بس طبعا اسعار الباقات مش بتخليك تستمتع بالسرعة بدون تانيب ضمير .
    اتصلت عليهم وقالولي ان اسرع خط منزلي هيبقا ٨ ميجا.
    هل حضرتك مرتاح بسرعة ٢ ميجا وشايف ان ٨ هتبقى فرق كبير و كويسة لمشاهدة الافلام والفيديوهات ؟

    رد على هذا التعليق << to this comment

    • 2 ميجا سرعة معقولة جدا – بتخدم 3-4 اشخاص – طبعا احيانا بيكون بطئ لكن فى اتصالات فترات البطء اقل بكتير من تى داتا – ابنى بيتفرج على افلام اونلاين بدون تقطيع – لكن انا بافضل تنزيل الافلام تورنت عشان كلنا نشوفهم وقت ما نحب – التورنت ميفرقش سرعتك كام – مسألة وقت فقط – يعنى ممكن تحط 20 فيلم ينزلو براحتهم خلال يومين – او فيلم فيلم وكدة حينزل فيلم 1 جيجا مثلا كل ساعتين تقريبا
      التورنت بيخليك مش ضرورى يكون عندك سرعة كبيرة – الاهم هو الميجات المسموحة لك – 120 جيجا طبعا اكبر من اى باقة ودة يسمح لك بتنزيل افلام كتير قوى
      وبالنسبة للفيديو فيوتيوب والماتشات بتشتغل على 480 بدون تقطيع
      وفر فلوسك واشترك 2 ميجا – جرب الاول ولو معجبتكش تبقى على
      (على فكرة مصر حتبقى اقل سرعة فيها 4 ميجا اول 2018 حسب كلام وزير الاتصالات)

      رد على هذا التعليق << to this comment

  5. أشكرك أخي الكريم على هذا الموضوع وتقريبا حكيت اللى حصل معايا انا كمان بس في مشكلة معايا انا لسه موصل مع اتصالات جديد على سرعة ٢ ميجا بايت بس للأسف منذ بدايتها لم تتعدى ٦٠٠ كيلوبايت بقياس سبيد تيست ومع اني اتصلت على الدعم الفني مازالت نفس المشكلة فما سببها وما الحلول . سنترال العاشر من رمضان

    رد على هذا التعليق << to this comment

  10. استفسار لو سمحت، انا مشترك في اتصالات والنت كان شغال تمام ، و في السنترال بعد ما غيروا الكابلات من نحاس لفايبر ، الرواتر مش شغال نت مع ان لمبه adsl و الانترنت شغالين ، كلمت الشركه قالي في خلال ١٥ يوم هيتم حل المشكلة ..
    هل الكلام ده صحيح لو عندك خلفيه ؟ لأن اللي شغالين ف السنترال بيقولولي اشترك في تي داتا والغي اتصالات وانا مش عاوز ارجع ل تي داتا تاني

    رد على هذا التعليق << to this comment

  11. لو سمحت ضرورى،، انا طلبت adsl من اتصالات لاشتراك فى خدمة 2ميجا وجالى راوتر(zxhn h108n) فهل ده افضل واحدث ام هواوىhg531 ,عشان انا كنت سمعت من الكول سنتر بس مش متاكد انه هيجيلى ماركة هواوى فخايف يكون المندوب غيره لما جابه،،،واشكرك على ردك الجميل وعلى زوق مع الناس

    رد على هذا التعليق << to this comment

  13. السلام عليكم لو سمحت انا دلوقتي تي اي داتا 2 ميجا سعه 150 جيجا وعندي مشكله ان مواقع محجوبه كتير مع ان بتفتح عادي من انترنت الموبايل وخصوصا ان اكتر من موقع وكنت بستخدمهم قبل كده عادي خالص من يومين تلاته ومش واقعين لاني فتحت من برنامج اوبرا vpn  فتح عادي خالص
    و فيه مواقع بطيئه جدا مع ان السرعه 256 كيلو بايلت
    وبرامج ال vpn محجوبه برضو معادا اللي متاح عن طزيق متصفح اوبرا سريع جدا
    والالعاب مبتدخلش اولاين كل الالعاب سواء كومبيوتر او بلايستيشن مع اني اونلاين
    ف كنت عايز اعرف هل اتصالات متاح فيها الكلام ده او لا
    لان خدمه عملاء اتصالات قالي اه متاح بس عايز اتاكد

    رد على هذا التعليق << to this comment

    • للأسف معنديش خبرة فى الالعاب اونلاين – لكن انا لاحظت ان البينج بتاع اتصالات ساعات بيكون افضل شوية من تى داتا
      برامج الفى بى ان معروف ان سيرفراتها بطيئة خصوصا المجانية منها – فالافضل متستخدمهاش الا للضرورة
      بالنسبة للمواقع المحجوبة فى مصر فهى كتير فمش عارف تقصد اى مواقع

      رد على هذا التعليق << to this comment

      • انا البينج عندي علي حسب موقع سبيد تيست 22 وساعات 25
        انا بستخدم ال vpn مش اكتر من دقيقه او اتنين بس تي اي داتا حاجبه كل برامج ال vpn
        بالنسبه للمواقع المحجوبه ف طلع انا مواقع اباحيه بس اللي اتحجبت ف مش مشكله بالنسبه ليا المشكله ان بسبب الحجب التصفح حتي الفيسبوك بقي بطيء
        و تي اي داتا بتقول مشكله في مصر كلها
        و التورنت اتقفل خالص مفيش اي تورنت بينزل عند ناس كتير من اول امبارح في لو تعرف التورنت اخباره ايه ف اتصالات بينزل ولا كلهم متفقين يقفلوه

        رد على هذا التعليق << to this comment

        • مش تى داتا اللى حاجبة الفى بى ان – البلد بتعمل اللى يقدرها عليه ربنا
          بالنسبة لبطء الفيسبوك – بتستخدم متصفح ايه؟ كمبيوتر/لابتوب وللا موبايل/تابلت ؟
          بالنسبة للتورنت جربته شغال زى الفل فى اتصالات
          متأكد انه قفل عندك؟ ياريت تجرب تانى

          رد على هذا التعليق << to this comment

          • ال في بي ان مقدر عشان التتبع بيبقي صعب
            الفيسبوك اتعدل خلاص هو كان فعلا عند كله كده بسبب تي اي داتا
            التورنت مقفول في تي اي داتا خالص بس الله اعلم اتحجب خالص ولا عشان التصليحات عشان بيقولو فيه مشاكل وبتاع ف الله اعلم ليوم 9 في الشهر لو متعدلش هغير

          • انا سمعت كده برضو بس الله اعلم ان كانت كدبه سمعتهم متريحش

  14. السلام عليكم ورحمة الله حاج محمد كيف أحوالك
    انا اشتركت معاهم الحمد لله و النت ممتاز عندي نفس مشكلتك بتاعة عمل اليوزر لمتابعة الاستهلاك و تواصلت معاهم كذا مرة الناس بصراحة محترمين جدا بس نفس المشكلة رسالة التفعيل مش بتوصل على الميل أو الموبايل هل لازم يكون عندي خط اتصالات؟ ولا ممكن التفعيل على أي رقم موبايل شركة أخرى.. برجاء توضيح هذه النقطة

    رد على هذا التعليق << to this comment

        • حتى لو جبت رقم اتصالات ممكن برضه مينفعش
          المشلكة ان الدعم الفنى فى اتصالات اه ذوق لكن فنياً قدراتهم محدودة – ومتبرمجين على ردود محطوطالهم بيرددوها للكل – لغاية ما يرفعوا شكوتك للادمين او مسئول الموقع حيحل لك المشكلة بنفسه فى ساعتها – اديهم رقم تليفونك واطلب منهم يوصلوه لمدير الموقع – لو عملوا كدة حيكلمك ويحل لك المشكلة بسهولة
          تقريبا الموقع فيه اخطاء فنية فى برمجته فهو بيعملوهلك يدوى
          موقع اتصالات هو اكبر نقطة ضعف عندهم للأسف ودة مستمر محدش بيعمل فيه حاجة مش عارف ليه
          وانا اقترحت عليهم يعملوا موقع منفصل لمستخدمى الدى اس ال ويفصلوه تماما عن الموبايل لكن يبدو انهم مش عايزين او مش فاهمين اهمية دة لينا

          رد على هذا التعليق << to this comment

          • فعلا هما رفعوا الشكوى للادمن و الادمن معملش حاجة.. عجيبة
            😂😂😂😂

    • اهلا بيك يا كرلس
      سرعة 4 ميجا بالفعل ارخص فى اورانج
      فسرعة ال4 ميجا فى اورانج تكلفتها الشهرية 171ج شاملة الضريبة – اقل 11.40ج من اتصالات اللى تكلفة ال4 ميجا عندها ب182.40ج شاملة الضريبة
      لكن بالنسبة للجودة فانا لم اجرب اورانج مؤخراً – لكن خبرتى معاهم لما كانوا لينك دى اس ال بتقول انهم على الاقل افضل من تى اى داتا من ناحية ثبات السرعة
      وتقدر كمان تقرا موضوع عنهم هنا : http://my2cents.gawaher.com/20287
      واياً كان قرارك – فياريت بعد ما تشترك بفترة تبقى تشركنا فى تجربتك وتقول لنا رأيك فى الخدمة اللى اشتركت فيها

      رد على هذا التعليق << to this comment

  17. ما زالت مشكلتي معاهم.. عدم وصول كود التفعيل على الميل أو الموبايل و عملت كذا شكوى في الفاضي و فكرت اشتري رقم اتصالات اسجله عندهم و افعل بيه الخدمة يس لسه صابر عليهم.. عاوز اتأكد من حضرتك يا حاج محمد لو سمحت.. انت فعلت الخدمة يدون رقم اتصالات ولا برقم اتصالات؟

    رد على هذا التعليق << to this comment

    • برقم اتصالات بس مشتريتوش مخصوص للتفعيل
      وحتى وانت معاك رقم اتصالات الكود مش بيوصل
      لابد الادمن بنفسه يفعل لك ربط رقم
      وانا اتكلمت معاهم انهم لازم يعملوا موقع منفصل للدى اس ال واعترفوا باهمية دة لكن مفيش حاجة بتتعمل
      لكن تقدر تعرف استهلاكك على فكرة من التليفون الارضى
      اطلب 0235346377
      ثم اضغط 1 للغة العربية
      ثم اضغط 22 لتستمع آلياً الى رصيدك من الجيجات

      رد على هذا التعليق << to this comment

  18. ما هو ده اللي حصل بالظبط الادمن عمل كده و قالي انه ضاف رقمي و عملنا كذا محاولة و جميعها باءت بالفشل كذا مرة و يا اما الشكوى تتقفل و أما يؤجلها

    فعاوز اريح دماغي اجيب رقم اتصالات و افعل عليه ال DSL بالمرة

    رد على هذا التعليق << to this comment

  20. انا قرأت هنا عن تجربتكم مع اتصالات مصر ، فصدقت ، لكن كانت من اسؤا التجارب ، قبل وصول الانترنت ، لدرجة اني ما اريد نت ارضي منها او من غيرها لو كان تعامل غيرها جزء من عشر تعاملها

    رد على هذا التعليق << to this comment

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.