التنسيق بدون معلم فى 5 دقائق

عندى ليك مفاجأة النهاردة اضغط هنا عشان تشوفها (مفاجأة جديدة كل يوم)

أعزائى الطلبة
ناس كتير متلخبطة فى طريقة استخدام موقع التنسيق لكتابة رغبات الثانوية العامة والازهرية والفنية
عشان كدة انا فكرت انشئ الصفحة دى لمساعدتكم والرد على كل استفساراتكم – وحتى اللى مش عارف حاجة انا ممكن املأله رغباته لو عايز بالنيابة عنه

أهم حاجة لازم تعرفوها ان صفحة الرغبات بها مكان ل60 رغبة – لازم تملاهم كلهم لانك لو كتبت مثلا 59 رغبة مش حتتقبل منك

لازم كمان نعرف ان ترتيب الرغبات له اهمية قصوى – يعنى لازم نفكر كويس هل الرغبة الاولى اللى انا كتبتها هى فعلا اكتر حاجة انا باحبها وميال ليها وشايف ان قدراتى تؤهلنى للتفوق فيها ونفسى ادخلها؟ اوعى تكتب اللى انت بتحبه اكتر حاجة فى غير الرغبة الاولى والا قج تفاجأ بان ما قبلها فى الترتيب قد تحقق بعكس ما كنت تتمنى

سيبك من كلام أى حد – دة مستقبلك انت – وأوعى تقول لأ انا مجموعى كبير يبقى لازم اختار كليات قمة – لو انت مش بتحب الكليات دى اوعى تدخلها لمجرد انك مستخسر مجموعك فى غيرها – انت كدة حتبقى عامل زى اللى ساكن فى قرية مفيهاش كهربا راح يشترى راديو حجارة لكن كان معاه اكتر فاشترى تليفزيون 190 بوصة LED 3-D

طلبة كتييييير دخلوا طب او هندسة عشان مجموعهم كبير واهلهم ضغطوا عليهم – وكانت النتيجة انهم فشلوا فى الدراسة وحولوا بعد ما خسروا سنة وساعات اكتر من عمرهم

وناس كتير دخلوا معاهد او كليات بسيطة وحققوا مستقبل باهر بينما كتير من خريجى كليات القمة مش لاقيين شغل

وناخد بالنا – التنسيق بيكون اليكترونى – بيقف عند اول رغبة ليك كاتبها – لو مجموعك يجيبها خلاص – يعنى لا ينتقل ابدا للرغبة الثانية الا لو مجموعك ميجيبش الرغبة الاولى – ونفس الشئ طبعا لباقى الرغبات

وبالتالى اوعى حاجة انت نفسك تدخلها تكتبها رغبة ثالثة او خامسة او عاشرة – اكتبها اول رغبة

لا ترتب رغباتك حسب المجموع اللى بتقبله الكليات – دة غلط كبير – رتب رغباتك حسب انت عاوز ايه اكتر حاجة – ثم رغبتك التالية لو متحققتش رغبتك الاولى وهكذا

لو مثلا عايز هندسة وساكن فى القاهرة اكتب ال3 كليات المتاحة – القاهرة وعين شمس وحلوان – ولو عندك استعداد تتغرب ممكن تكتب بعدهم كليات المحافظات بس بالترتيب من الاقرب للأبعد

ولو جت لك كلية فى محافظة غير محافظتك لازالت عندك فرصة تستخدمها اسمها “التحويل لتقليل الاغتراب” ودى بتتم عن طريق موقع التنسيق الاليكترونى – بعد ما تظهر نتيجة مرحلتك تقدر تملأ طلب تحويل اونلاين وتختار التحويل من الكلية اللى خارج محافظتك لكلية مناظرة فى محافظتك – بس خد بالك قبول طلبك مش مؤكد – الوزارة بتسمح بالتحويلات فى حدود 10% من الاعداد المقبولة فى كل كلية – يعنى لو طلبات التحويل اكتر من كدة بياخدو طلبات اللى جايبين مجموع أعلى – وانت لما تملا فورمة التحويل لو كنت من القاهرة مثلا ليك انك تختار التحويل لجامعة القاهرة وعين شمس وحلوان بشرط يكون جاتلك كلية ليست فى محافظتك – يعنى لو جتلك اصلا حلوان مينفعش تطلب تحول للقاهرة او عين شمس

ولو تقليل الاغتراب لم يقبل مازالت عندك فرصة تحول لأى كلية او معهد أخر قبل مجموعك – بس تحويل ورقى وليس عن طريق الموقع الاليكترونى – يعنى تروح بنفسك للكلية او المعهد اللى عاوز تحول له ومعاك خطاب الترشيح للكلية اللى انت مش عاوز تدخلها – حياخدوه منك ويعملولك اجراءات التحويلفى الوزارة – بس بتاخد مدة حوالى شهر او شهرين لكن انت بتحضر مع بدء الدراسة عندهم عادى لغاية ما تيجى الموافقة من الوزارة

لو الموضوع نال اعجابك اضغط هنا لدعم الكاتب (جزاكم الله خيراً)

One Comment

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *