آخر تحديث : 20-12-2018 الساعة 03:11 م

مش لازم تشترى سمك الماكريل مشوى جاهز – لان شويه فى البيت سهل جدا وموفر وكمان يخلينا نقدر نعمله فى أى وقت – بس نشترى سمك مكريل نى ونشيله فى الفريزر

الطريقة من أسهل ما يكون – سمك المكريل يتميز بانه لا يحتاج تنظيف وكمان طعمه مضبوط لا يحتاج أى اضافات – لا ملح ولا توابل ولا خضروات ولا ردة – صدقونى احلى طعم وهو مشوى ناتوريل طبيعى – أى اضافات تنتقص من طعامته هو نفسه

نغسل السمك بالماء فقط ثم نرصه فى صينية فرن زى ما هو بدون فتح بطنه ولا أى حاجة

ونشعل الشواية اللى موجودة أعلى سقف الفرن – وفى الوقت دة نحط الصينية على نار عالية على البوتاجاز لمدة 5 دقائق مع صب نصف كوب ماء فى الصينية عشان نسوى السمك من تحت قليلا وفى نفس الوقت نسخن قعر الصينية – ثم قبل ان ننقل الصينية للفرن اذا كان الماء قد جف نصب نصف كوب آخر – ثم نضعها فى الرف الاوسط تحت الشواية ونقفل باب الفرن ونتركه 15 دقيقة

بعد اخراج الصينية حنلاقى وش السمك نشف شوية لكن من ظهره طرى عشان السوائل اللى نزلت فى الصينية –  فنقلبه على الناحية التانية عشان السوائل تطريها هى كمان ويبقى سهل فى نزع قشره عند تناوله

نتركه يبرد او لو مستعجلين نحطه فى الثلاجة شوية لغاية مايبرد – طعمه وهو بارد احلى بكتير من وهو سخن

عند الاكل نقشر السمك من الناحيتين بسكين مشرشر ثم نشقه طوليا من بطنه – وننظفه بطرف السكينة وننزع السلسلة

يؤكل كما هو بدون اضافة ملح ولا أى توابل – فلحمه مضبوط ولا يحتاج أى شئ – يقدم مع أرز سمك او ارز ابيض مطهى على البخار (او مسلوق)

جربوا حتلاقوا ان طعم المكريل بيبقى أحلى لما يبرد – وكمان اسهل فى تنظيفه – ساعتها بيشبه طعم التونة اللذيذة

وبالهنا والشفا