كل سنة وانتم طيبين – عندى عزومة ل12 شخص اول يوم رمضان – فجلست أكتب خطوات التحضير للعزومة عشان اقدر ارتب الخطوات والتوقيتات صح وما انساش حاجة
قائمة الطعام
- تمر منقوع فى الحليب
- 3 فرخات طهى بطئ ثم مشوية فى الفرن
- صينية بطاطس فى الفرن
- ملوخية
- رز بالشعرية
- سموسة لحمة مفرومة وجبنة بالزيتون والفلفل الرومى والطماطم
- طماطم مخللة
- سلطة رايب بالخيار
- قطايف (بما فيها عمل العجينة)
خطوات العمل:
- الصبح بدرى: فك الفراخ من الفريزر وتقطيعها ارباع ثم طهيها على نار هادية جدا ساعة مع بصل وفلفل رومى وطماطم وتوابل
- عمل عجينة القطايف وتركها تخمر ساعة ونص
- عمل الطماطم المخللة اثناء تخمير عجينة القطايف
- عمل سلطة الخيار بالرايب برضه فى هذه الاثناء
- تسوية القطايف
- تصفية الفراخ من شوربتها ورصها فى صينية ودهنها بصوص الشوى – سمن بلدى بالثوم والزعتر
- استخدام كوب من الشوربة لعمل الرز – والباقى نصفه لعمل الملوخية ونصفه لصينية البطاطس
- تقطيع البطاطس والخضروات ورصهم فى الصينية وتقليبهم فى شوربة الفراخ مع صلصة وتوابل
- تسوية الصينية على البوتاجاز
- عمل الملوخية
- حشو القطايف
- حشو السموسة
- نقع التمر فى حليب ساخن
قبل الفطار ب40 دقيقة
- عمل الرز بكوب شوربة
- شوى الفراخ ثم شوى صينية البطاطس
- تحمير السموسة
- حفظ الفراخ والبطاطس والسموسة فى فرن دافئ لما بعد صلاة المغرب
بعد الفطار
- تحمير القطايف وتقديمها ساخنة