آخر تحديث : 25-03-2022 الساعة 03:07 ص

تلاحظون اللون الابيض للعجينة فى نصف القرص؟ بمجرد تحوله للاصفر نرفع القرص من الطاسة

عجينة القطايف سهلة جدا لو جربتوها مش حتشتروا الجاهزة تانى – خصوصاً بعد ما تحشوها وتعملوها مش حتصدقوا جمالها – بتطلع هشة ومقرمشة احلى من الجاهزة بكتيييير – وطبعا أوفر – المقادير التالية تعمل لك كيلو قطايف وبتكلفك 2ج فقط بينما الجاهزة ب12ج يعنى بيكسبوا 6 أضعاف تخيلوا؟!

أهم شئ فى عجينة القطايف كثافتها – كل ما كانت خفيفة – يعنى الماء كتير – كل ما كانت رقيقة وتتحمر أسرع وتبقى مقرمشة وهشة اكتر – لكن لو رقيقة قوى الخروم بتاعتها حتبقى منفدة على الناحية التانية وكدة ممكن الحشو يقع وكمان فى التحمير ممكن تتحروق بسهولة لو نسيناها شوية بسيطة – ومن ناحية تانية كل ما كانت العجينة تقيلة – يعنى الماء قليل – كل ما بقت تخينة فتاخد وقت اطول فى التحمير وتبقى طرية مش مقرمشة – عشان كدة احسن حاجة الوسط – لا تكون العجينة خفيفة قوى ولا تقيلة قوى – وممكن نجرب واحدة فى الاول – لازم لما نصبها تكون بتفرش فى الصينية لوحدها – لو محتاجة اننا نحرك الصينية عشان تفرش يبقى كدة العجينة تقيلة فنخففها بقليل من الماء ونقلب كويس – ولو لقيناها رقيقة قوى وخرومها منفدة من الناحيتين يبقى كدة العجينة بقت خفيفة زيادة عن اللزوم – ودى مشكلة لاننا لو اضفنا شوية دقيق لازم ننتظر بقى لما يخمر ودة حيوقف الشغل – عشان كدة الافضل ان العجينة تكون تقيلة ونخففها شوية بشوية بالتدريج لو احتجنا عن انها تكون خفيفة أصلاً

المقادير (لعمل كيلو قطايف – حوالى 45 قرص):

• 750جم ماء
• 450جم دقيق ابيض
• معلقة صغيرة خميرة فورية
• نصف معلقة صغيرة ملح

الطريقة

• نقلب الكل بمضرب سلك يدوى لغاية ما تبقى العجينة سائلة وناعمة بدون كلاكيع
• نغطيها حتى يتضاعف ارتفاعها وتصبح كلها فقاقيع (ساعة على الاقل)
• نصب مقدار من العجينة فى براد او كنكة او شفشق له بوز مدبب
• نجهز فوطة قطن عشان نفرد عليها القطايف لما تطلع لتهويتها
• نجهز طبق صغير به معلقة سمن ومنديل ورق مطبق
• نسخن طاسة تيفال على نار متوسطة
• نمسح بمنديل السمن سطح الطاسة ونبدا نصب دوائر بالحجم اللى عاوزينه
• ننتظر حتى تظهر خروم تملآ الدائرة كلها وبمجرد ما يختفى لون العجين الابيض ويصبح مصفر نرفعها من الطاسة – مش مهم يكون لون قعرها وردى زى الجاهز لانهم بيعملوها على سطح حديد – ومنقلبهاش على الوش التانى – القطايف تسوى من وجه واحد – ثم نضعها على الفوطة للتهوية
• فى كل مرة نمسح الاول بالمنديل قبل صب دوائر عجين جديدة
• بعد ماتبرد خالص على الفوطة نرصها فى طبق كل اثنين فى وش بعض (الوش المخرم) ونغطيه بكيس محكم حتى لا تنشف فى الهواء لحين حشوها
• نحضر خلطة الحشو – توجد خلطات كثيرة لكن خلطتى المفضلة هى :
  • ربع كيلو سودانى بدون ملح ومجروش خفيف
  • 4 معالق كبيرة هرم جوز هند
  • 4 معالق كبيرة هرم سكر
• طريقة الحشو اننا نطبق القطايف على وشها المخرم – ونضغط باصابعنا عشان نقفل ثلثها عشان تبقى فاتحة بقها فنصب فيه الحشو باستخدام معلقة صغيرة – ونحرص اننا منجيبش الحشو على الطروف عشان تلزق كويس – وبعدين نضغط بصوابعنا لغلق باقى نصف الدائرة ونعيد عليها للتأكد من عدم وجود أى فتحات – حتلاحظوا انها بتقفل احسن بكتير من القطايف الجاهزة بسبب انها طازة وكمان لم نسويها حتى تحمر وبالتالى سهل جدا ان طروفها تلزق
• ممكن نحشى كل الكمية ثم نقسمها على اكياس ونحفظها فى الثلاجة لعدة ايام كل يوم نقلى شوية – لانها لازم تؤكل ساخنة فالافضل نعمل كمية محدودة كل يوم – يكفى 3 لكل واحد فى اليوم عشان سعرات القطايف عالية – فمثلا لو اسرتك من 4 افراد يبقى محتاجة 3×4=12 فى كل كيس – أهم شئ احكام غلق الاكياس والافضل وضعهم فى كيس مزدوج عشان يفضلوا طراى
• أما الشربات فنعمله بكوب سكر مع كوب ماء ونقطتين عصير ليمون – والمتبقى منه ممكن نغطيه فى الثلاجة للايام التالية – بس ندفيه شويه بسيط على النار قبل استخدامه
• بعد ما نخرج القطايف من الزيت نكون مجهزين مصفاة تحتها وعاء لاستقبال نقط الزيت – وبعد وضع كمية جديدة فى زيت التحمير نبدأ نحط القطايف بعد ما اتصفت فى الشربات – ولا نتركها فيه الا حوالى 10 ثوانى عشان تحتفظ بقرمشتها

لحشو القطايف وعملها مقرمشة ولذيذة اضغط هنا