أسهل فطير مشلتت بيتى

آخر تحديث : 05-09-2018 الساعة 01:48 م

مين مبيحبش الفطير المشلتت؟ طب ايه رأيكم انكوا ممكن تعملوه فى البيت بمنتهى السهولة وزى الفلاحى بالظبط؟

لازم الاول نتفق ان سر الفطير المشلتت الفلاحى يكمن فى السمن البلدى او الزبدة – لازم تكون طبيعية اصلية – ابتعدوا تماما عن الزبدة الرخيصة السايبة لانها غالبا بتكون زبدة صناعية مصنوعة من زيوت رخيصة مهدرجة – لو معندكوش حد واثقين فيه تشتروا منه الزبدة الفلاحى الاصلية انصحكم بزبدة روتانا النيوزيلاندية

الطريقة دى اتعلمتها من بنات الفطير بتوع قرية الأسد – بس طبعا بحجم اصغر – الكيلو حنقسمه 4 كور – كل فطيرة بتتعمل بكورة عجين – دة حجم مناسب لصوانى 28 او 30 – اما لو عندنا صوانى 40سم يبقى نقسم الكيلو كورتين

المقادير التالية تكفى لعمل 4 فطيرة مشلتتة فى صوانى مقاس 28 او 30سم

مقادير العجينة

  • 1كجم دقيق
  • 550جم ماء
  • 10جم ملح

مقادير اخرى

  • 200جم سمن بلدى او زبدة طرية بحرارة الغرفة او خليط من الزبدة و الزيت (زبدة قابلة للفرد – الطريقة هنا)
  • قليل من السمن والحليب لدهان الفطير بعد الفرن

الطريقة

  • نذيب الملح فى الماء جيدا
  • نضيف 400جم دقيق ونقلبهم مع كل الماء كويس
  • بعد 5 دقائق نقلبهم مرة كمان ثم نضيف باقى الدقيق ونخلطهم كويس
  • نقلب العجينة على رخامة المطبخ ونعجنها دقيقتين ثم نغطيها
  • بعد ربع ساعة نعجنها دقيقتين كمان حنلاقيها بقت ناعمة جدا
  • نقسم العجينة 4 اجزاء ونشكلهم كور وندهنهم زيت ونرصهم فى صينية او حلة ونغطيهم 4 ساعات على الاقل – لو استعجلنا حنلاقى العجينة كل ما نفردها تكش تانى وحتتعبنا – وممكن نتركها فى الثلاجة لليوم التالى
  • نستخدم طبلية او ترابيزة – مدورة او مربعة – نرش على سطحها شوية دقيق ونفرد كرة عجينة اولا بايدينا – ثم نرش عليها شوية دقيق ونلف العجينة على عصاية (العصاية الخشب اللى بتتباع لوحدها لتركيب المقشة عليها) ثم نفردها بالعرض – ونكرر كذا مرة – وكل مرة نضغط قليلا على اطراف العصاية واحنا بنلف العجينة عشان الدايرة تكبر – ثم نفردها بالعرض وهكذا – شاهدوا الفيديو أسهل من الكلام
  • نرفع العجينة من اطرافها ونشدها على اكبر مساحة لغاية ما نخلى طروفها تدلدل من الطبلية او الترابيزة اللى بنشتغل عليها
  • نرش عليها سمنة او زبدة طرية نوزعها بحيث تغطيها كلها
  • ثم نبدأ نطبق العجينة على بعضها كذا تطبيقة – وبعد كل تطبيقة ندهن سمن قبل ما نطبق التطبيقة اللى بعدها وهكذا
  • نلمها ونمسكها من صرتها ونقلبها على صينية ونغطيها ببلاستيك لترتاح نصف ساعة
  • نفرد باقى الكرات بنفس الطريقة
  • ندهن صينية مقاس 30 بقليل من السمن ثم نضع فيها احد الاقراص ونبلل يدنا بسمن ونبدأ برفق فى فرد العجينة حتى تملأ الصينية كلها
  • نضع الصينية على البوتاجاز على نار أقل من متوسطة لمدة 5 دقائق على كل وجه لغاية ما يحمروا
  • بعد ما الفطير يستوى نغطيه بفوطة 10 دقائق عشان يبقى طرى
  • نقطعها ونقدمها ساخنة مع عسل نحل او عسل اسود او جبنة قديمة
  • ما تبقى نحفظه فى كيس مقفول فى الثلاجة
  • عند تسخين قطعة نضعها فى طاسة مع قليل من الحليب ونغطيها على نار هادية

تابعوا طريقة فرد العجينة وتطبيقها على بعضها مع هذا الفيديو:

أما فى الاماكن اللى بيعملوا فيها كميات كبيرة من الفطير المشلتت الحجم الكبير – زى قرية الاسد مثلا على طريق اسكندرية الصحراوى – الفطير بيعملوه على مرحلتين – كل مرحلة بتتعمل على طبلية لوحدها – الطبلية الاولى واحدة بتفرد عليها العجينة بالدقيق والعصاية – والطبلية الثانية اتنين قصاد بعض بيفردوها لغاية ما تدلدل من الطبلية وبعدين يرشوا عليها السمن ويطبقوها قصاد بعض – طريقة جميلة ومنظمة جدا من بنات آخر شطارة – شاهدوا الفيديو: