آخر تحديث : 23-05-2017 الساعة 03:49 م

الفراخ بقت اسعارها نار – وطبعا الصدور الفيليه اغلى بكتير – مع انها اكثر جزء صحى وآمن فى الفرخة – عشان كدة حنعمل مع بعض صدور فراخ فيليه بطريقة اقتصادية موفرة

لما نشترى صدور فراخ مخلية نطلبها صحيحة بدون تقطيع – فقط نخلى البائع يفصل كل جنب لوحده – الجنب الواحد وزنه حوالى ربع كيلو – وفى البيت حنجمدها – ولما نعوز نعملها نطلع جنب واحد او صدر فصين من الفريزر (حسب الرغبة وحسب عدد اللى حياكلوا – ممكن ربع كيلو يكفى 4 افراد لو الميزانية على اد الايد) وبعد ما تفك شوية نص فك نضعها على قورمة ونبدأ نقطعها بالعرض رأسياً من فوق لتحت – وليس مثل طريقة تقطيع بائع الفراخ – يعنى ننيم الصدر بحيث يكون طرف البوز الرفيع على شمالنا والطرف الاخر التخين على يميننا – ونبدأ باستخدام سكين حامى فى تقطيع شرايح رقيقة بالعرض – الصدر حيطلع معانا حوالى 20 شريحة نجتس لو حرصنا على تقطيعه رقيق

لو طريقة التقطيع مش واضحة ممكن تشوفوا الفيديو دة

بعد كدة حنضرب فى الخلاط بصلاية مقشرة مع طماطماية صغيرة وحبة فلفل رومى وفص ثوم – ولو بنحبها مشطشطة نحط نصف قرن فلفل حامى (اختيارى) و4 معالق خل ومعلقة صغيرة من كل من الملح والفلفل والملح صينى ونضربهم فى الخلاط كويس ونتبل بيهم شرائح الفيليه فى طبق ونتركه مغطى فى الثلاجة 4 ساعات على الاقل

ثم نخرج الطبق ونصب عليه بيضة مضروبة ونقلبهم ونحط معلقتين خلطة فيجيتار او دقيق متبل بملح وفلفل وبهارات ونقلب الخليط لغاية ما نحصل على عجينة تقيلة شوية فى سمك عجينة لقمة القاضى او الباشميل عشان تمسك فى قطع الفيليه

وبعدين نجيب طبق كبير غويط (طبق غسيل الفواكه مثلا) ونحط فيه بقسماط مطحون متقلب معاه خلطة فيجيتار او دقيق متبل – ونخرج قطعتين ثلاثة من شرائح الفيليه نضعهم فى طبق البقسماط ونمسك الطبق عشان نهزه ونخبطه بين ايدينا بقوة بحيث نخلى قطع الفراخ تتقلب فى البقسماط – لغاية ما قطع الفراخ تتغطى من كل الاجناب بخلطة البقسماط – ثم نضعهم فى طبق ونكرر مع باقى القطع

ونحمرهم فى زيت ساخن لغاية ما يبقى لونهم ذهبى غامق

الطريقة دى حتلاقيها عملت لك كمية ضخمة من الفراخ الفيليه بعكس الطرق التقليدية – لان الفراخ هنا بتبقى مكسوة بطبقة من الخضروات اللى لزقت فيها بفضل البيض والدقيق ودة بيخلى حجمها يكبر وتوكل اكتر وفائدتها الصحية اعلى – وطبعا بيعطيها طعم لذيذ جدا يحبه الصغار والكبار

الاكلة دى موفرة ومش حتكلفك سوى ثمن ربع كيلو صدور فيليه ل4 افراد – يعنى اقل من نصف ثمن فرخة

وبالف هنا وشفا