طريقة عمل الممبار باللحمة المفرومة

عندى ليك مفاجأة النهاردة اضغط هنا عشان تشوفها (مفاجأة جديدة كل يوم)

دى طريقة ناجحة وسهلة لعمل ممبار طعم جدا – جربوها وان شاء الله تعجبكم

المقادير

  • ربع كيلو ممبار بتلو
  • ٢ بصله كبيره
  • ١/٤ كيلو لحمه مفرومه
  • كوب صلصة طماطم
  • ١/٢ كوب بقدونس
  • ملعقه كبيره سمن
  • ملح
  • ملعقه صغيره بهارات
  • ١/٢ ملعقه صغيره قرفه
  • ملعقه صغيره فلفل اسود
  • ٣ كوب رز مصري (٦٦٠ جرام)
  • ماء السلق (٣ ورق لورا، ٤ فص ثوم، بصله صغيره، ٦ حبات حبهان، ١/٤ ملعقه صغيره فلفل اسود صحيح، ٣ حبات قرنفل)

الطريقة فى الفيديو :

الممبار اللى فى الفيديو من النوع اللى بنشتريه متنضف جاهز – اما لو اللى عندنا مش متنضف فاليكم طريقة تنظيفه :

تنظيف الممبار بطريقة سهلة وسريعة

من المهام الصعبة اللي بتواجهنا و خصوصا في العيد مهمة تنظيف الممبار
وكل وحدة بيبقى وقتها ضيق جدا وعايزة تعمل كل حاجة فى اقل وقت ممكن و بتبقي عايزة طريقة سهلة و سريعة عشان توفر التعب والمجهود
علشان كدة تيتة أوزي هاتعرفنا علي طريقة سهلة و سريعة فى تنظيف الممبار هي كالتالي

هانجيب الممبار ونغسله كويس بالمية تحت الحنفية كتير بنملى بالماء أكثر من مرة ثم نجيب لوح التقطيع ونحط عليه الممبار وبسكينة مش حامية نكحط بها الممبار من اول طرف ليه

هنقلب الجزء اللى كحطنا علي الجهه الاخري ونمسكه بايدنا ونكحت بالسكينة بالاتجاة التانى بشكل مستقيم هنلاحظ انه بيتجمع حاجات كتير داخل الممبار هانفضل نكحت بالسكينة لحد مانخرج كل اللي جواه من الطرف وهنا هنقلب الممبار وتحت الحنفيه نغسلة كويس جدا هنلاقيه بقي ابيض و نظيف ثم نحط علي الممبار ملح وخل وعصير ليمون علشان الريحة تطلع

و نسيبة مش اقل من ساعتين ثم نشطفة تحت الماء الساخن مرة اخري ثم نقطعالممبار على حسب المقاس اللى نفضله و نقوم بحشوة بالخلطة اللي هي نفس طريقة الخلطة اللي بنعملها للمحشي وما نكترش الأرز فيه و احنا بنحشيه لأنه لما هايتسلق الأرز هايزيد حجمه ونسيب فراغ في اول الصابع وآخره ونجيب حلة وفيها ماء على النار وفيها كمون و ملح و فلفل و حبهان و ورق لورى ونسيبها تغلى ثم نضع الممبار وهنلاقيه قفل لوحده اول ماينزل الميه وهكذا واحده واحده لحد ماتخلص الكمية كلها وطبعا هتكون الميه غلت خلاص نوطى ونغطى الحله ونسيبها وكل شويه نفتح عليه علشان نعرف استوى ولا لسه علشان مش يتفرتك فى الحلة ومش هايحصله حاجه لو فتحنا الحله ولما يستوي نشيلة من الماء و نحطه في مصفه ثم يحمر في الزيت مضاف له معلقة زبدة ولو اتبقى شوية ملحقناش نحشيهم نشيلهم تانى فى الفريزر طالما ريحته كويسه ومتنضف كويس
و بالف هنا

افكار ممكن تجربوها
1 – لو اللمبار رفيع فاسهل طريقة لحشوه هي عن طريق القمع بندخل القمع فى طرف الممبار و نضع الخلطة في القمع و بايد معلقة خشب او اي حاجة رفيعة او ممكن بصابعنا نضغط علي الخلطة في القمع علشان تنزل داخل الممبار ولو معندناش قمع ممكن زجاجة بلاستيك تكون فتحتها صغيرها نقطعا من الربع العلوي بتعاها و نستخدمها مثل القمع
2 – هي لتسهيل التحمير نضع المنبار فى صنيه فيها ملعقة سمن ونحركها كويس جدا ثم نضعها فى الفرن تحت الشواية حتى نقلل من نسبة المادة الدهنية في اكلنا و كمان نتجنب طرطشة الزيت
3 – ممكن يتخرم بدبوس نضيف علشان الارز يستوى وعلشان مايفرقعش
4 – بالنسبة للناس اللي بتحب تحط القرفة في وصفاتهم كنوع من انواع التوابل ممكن في ماء السلق نضيف عود قرفة خشب هايخلي طعمة جميل

معلومة علي السريع
1 – الممبار عبارة عن الامعاء الدقيقه للحيوان سواء كان بقر او جاموس او خروف او جدي
2 – الدهون اقل فى الممبار البقرى
3 – الممبار التخين بيكون كندوز والوسط بتلو و الرفيع ضاني
4 – الممبار الرفيع ممكن يتعمل سجق بيتحشي لحمة مفرومة متبلة بالبهارات
5 – هذه الاكله من الأكلات الشعبية المصرية وبعض البلدان يطلقون عليها فوارغ محشية

لو الموضوع نال اعجابك اضغط هنا لدعم الكاتب (جزاكم الله خيراً)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *