كفتة رز بيتى

اليكم طريقة عمل كفتة الارز فى البيت

المقادير

  • مقدار لحمة مفرومة
  • نصف مقدار بصل
  • نصف مقدار ارز نى ناشف
  • عشر مقدار بقدونس مفرى
  • معلقة ثوم مهروس
  • معلقتين نعناع ناشف او زعتر (اوريجانو)
  • ملح وفلفل وكبابة صينى وملح صينى
  • بيضة لكل نصف كيلو لحم
  • معلقة كبيرة خل

الطريقة

  • نقشر البصل ونخرطه ونقطع البقدونس قطع صغيرة ونضربهم مع الثوم والتوابل فى الكبة مع اللحمة المفرومة – اذا كانت الكبة صغيرة والكمية كبيرة عليها نقسمها على كذا مرة
  • نطحن الارز ناشف كما هو – بدون غسيل – فى مطحنة التوابل 3 دقائق حتى يصبح ناعما
  • نصب خلطة اللحمة مع الرز المطحون فى الكبة مرة اخرى – او نضعهم فى طبق واسع ونعجنهم باليد جيدا حتى يختلط كل الرز مع الخلطة
  • نضع الطبق فى الثلاجة لمدة ساعة على الاقل حتى يتشرب الرز ماء البصل والبقدونس وتتماسك الخلطة
  • نسخن زيت غزير ثم نبل معلقة بالزيت وناخذ بالمعلقة قطعة نسقطها فى الزيت العميق الساخن مثل ما بنقلى الطعمية – ونكرر الاخذ بالمعلقة ونسقط فى الزيت بسرعة
  • لو الزيت غزير وعميق مش حنحتاج نقلبها على ظهرها – بعد ما يبقى لونها بنى محمر نخرجها من الطاسة ونتركها فى شبكة تحتها حلة عشان تتصفى منن الزيت – انا بأصب كل شئ فى الشبكة حتى الزيت نفسه – وبعدين آخد الزيت المتصفى وارجعه لطاسة التحمير تانى – واترك الكفتة زى ماهى فى الشيكة تنز بواقى الزيت فى الحلة اللى تحتها – ثم نفردها فى صينية ونتركها تبرد

الصلصة

  • نشوح ثوم مهروس فى سمن مع ورق لورا وملح وبهارات
  • نضيف كيلو عصير طماطم مضروب فى الخلاط مع ثلث برطمان صلصة طماطم فى حلة على النار
  • بعد خمس دقائق نحط الكفتة بعد ما بردت
    • ممكن نترك نصف كمية الكفتة بدون صلصة للى بيحبها كدة (بتبقى جميلة جدا بدون صلصة على فكرة – عندهم حق اللى بيحبوها كدة محمرة برة الصلصة – يعنى ممكن نقدم الكفتة محمرة فى طبق لوحده – والصلصة لوحدها نحطها على الرز اثناء التقديم – ولادى بيحبوها كدة اكتر)
  • نغطيها على نار هادية حتى تمام النضج – حوالى نص ساعة

وبالف هنا وشفا

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *