ورقة لحمة بدون ورق

زمان كان ابى يشترى لنا لحمة ويضع معها بصل وفلفل رومى وطماطم ويلفهم كلهم فى ورق اللحمة التخين بتاع جزارين زمان – ويذهب بها الى الفرن حيث يضعونها فى صاج ويشونها فى الفرن – وبمجرد فتح الورقة فى البيت تخرج رائحة روعة – كانت طعمها خيالى لا يقارن باى شئ اخر

اليوم يستبدل البعض ورقة اللحمة اللى انقرضت بورق فويل – لكن هناك مخاطر من طهى الطعام فى الورق الفويل – عشان كدة حنعمل نفس الطريقة بدون لا ورق ولا فويل – وحنعملها حتى من غير فرن – على البوتاجاز بطريقة الطهى البطئ عشان ناكل لحمة تذوب فى الفم ذوباناً

المقادير

  • معلقتين سمن بلدى ومعلقتين زيت
  • معلقة ثوم مهروس
  • نصف كيلو مكعبات لحم كندوز
  • 3 بصلات كبار
  • 3 فلفل اخضر رومى كبير
  • قرن فلفل اخضر حامى
  • 5 حبات طماطم كبيرة
  • ربع كوب خل
  • ملح وفلفل وورق لورا مطحون وملح صينى وكبابة صينى او بهارات
  • ورق عودين بقدونس

الطريقة

  • نقطع بسكين حامى اللحمة الى شرائح سمكها تقريبا نصف سمك صباع الايد – التقطيع بيبقى اسهل لما تكون مكعبات اللحمة مجمدة وفكت قليلا
  • نقشر البصل ونقطعه هو والطماطم اثمان مثل فصوص البرتقال
  • نقطع الفلفل قطع متوسطة الحجم
  • نشوح الثوم مع السمن والزيت فى حلة متوسطة الحجم – ثم نضيف طبقة واحدة من شرائح اللحم ونشوحه دقيقة على كل جانب – مجرد يتغير لونها من الاحمر الى البنى
  • نخرج الشرائح اللى اتشوحت فى طبق ونشوح كمية أخرى – ونستمر حتى ننتهى من تشويح كل اللحم
  • فى نفس السمن نحمر شرائح البصل والفلفل لتأخذ نفس طعامة اللحمة
  • فى هذه الاثناء نرش الملح وكل التوابل على اللحمة ونقلبهم كويس
  • بعد ما البصل ياخد لون وردى نصب فوقه شرائح اللحم ثم نصب فوقهم شرائح الطماطم
  • نصب الخل فى الطبق الى كان فيه اللحم حتى ياخذ بقايا التوابل ثم نصبه فى الحلة
  • نغطى الحلة ونتركها 4 ساعات على أهدى نار ممكنة مثل الشمعة
  • اذا وجدنا سوائل كثيرة فى الحلة نرفع الغطاء حوالى نصف ساعة اضافية حتى تقصر وتتركز طعامتها
  • عند الغرف نرش بعض اوراق البقدونس على الوش
  • اسرتى تحب ان تغطى اطباق الارز الابيض بشرائح اللحم والبصل والفلفل والطماطم مع الصوص الخيالى بتاعهم – وانا اعشق كل ما سبق لكن بدل الارز اضعهم فوق طبق سلطة ضخم مكون من قطع طماطم ووخيار فقط – ما اقولكوش على الطعامة – تجنن بجد

جربوا الطريقة السهلة دى وان شاء الله حتدعولى – وكل افراد اسرتكم حيدعولكم كمان

وبالف هنا وشفا

شفت مفاجأة النهاردة ؟ اضغط هنا عشان تشوفها (مفاجأة جديدة كل يوم)

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *