ازاى ابقى احسن فى الانجليزى

“ازاى اقوى نفسى فى الانجليزى؟” سؤال يسأله الكثيرين – عندى لكم طريقة لذيذة ومسلية – لو بتحبوا الافلام الاجنبى – عودوا نفسكم تتفرجوا من غير ما تقرأوا الترجمة العربى – مع الوقت حتبدأ تفهم المعنى من سياق الاحداث – وكدة حتركز اكثر فى اللغة وتعبيراتها وطريقة استخدامها فى مختلف المواقف

وبعدين ادخل على موقع subscene.com وابحث عن فيلم عجبك – حتلاقى الحوار بتاعه subtitles موجود باللغة العربية وباللغة الانجليزية – نزل الاثنين وافتحهم – وابدا اقرا الحوار سطر سطر – سطر بالانجليزى من الملف الانجليزى – وترجمه السطر بالعربى فى الملف العربى – كدة حتقدر تتعود على طريقة المحادثة الانجليزية بطريقة عملية وسهلة ومسلية – لانك حتختار الافلام اللى انت حبيتها لما اتفرجت عليها – عشان كدة مش حتزهق زى كتب الدراسة – وكمان اللغة المستخدمة حتكون هى لغة الحوار بتاعة الناس فى الحياة اليومية مش لغة الكتب الجافة

وحاول تمثل دور من الادوار – وردد الحوار بتاع الشخصية اللى اخترتها – وياريت لو نزلت الفيم على جهازك تسمع جملة حوار وبعدين توقف الفيلم وتحاول تجيب نفس طريقة النطق – مين عارف يمكن تكتشف ان عندك موهبة تمثيل مدفونة ومحتاج حد يكتشفك! – لأ بجد حتستفيد استفادة ما أقولكش – ومع تكرار قراءة الحوار وترجمته ومحاولة تمثيل ادوار مختلفة فى قصص متنوعة – حتلاقى نفسك بقيت ولا الحاج اوباما ذات نفسه – وحتقدر لما فى المستقبل تدخل اى interview مقابلة عشان تقدم وظيفة فى شركة اجنبية او استثمارية – حتقدر تبهر الناس وحيفتكروك خواجة او متربى برة

بجد دة كويس لمستقبلك – يللا ابدأ من الان!

One Comment

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *