خبز الصاج عيش او كريب فى دقيقتين

خبز الصاج مشهور فى الخليج وايران وسوريا ولبنان ودول كتير جدا – والمخابز والمطاعم السورية فى مصر بتستخدمه فى سندوتشات الشاورمة الملفوفة السورى

عشان نعمل عيش صاج (البعض يسميه خبز رقاق لشدة رقته) او كريب احترافى لازم نشترى الصاج او ما يسمى “تاوة” مصنوعة من الالمونيوم السميك جدا – سمك 2سم تقريبا – قارئة فاضلة عرفتنى انها بتتباع فى شارع امير الجيوش – باب الشعرية – اللى بيبيعوا فيه معدات المطاعم والمطابخ الكبيرة – وثمنها بيتراوح من 40ج للنوع الحديد – الى 100ج للنوع الالمونيوم

العجينة سهلة جداً – بتتكون من دقيق وماء فقط – ممكن اضافة ملح او سكر حسب استخدام العيش
العجينة مفروض تتعجن وتترك ساعتين تتخمر – بدون اضافة خميرة
الماء يكون حوالى 60% من وزن الدقيق – يزيد أو يقل حسب نوعية الدقيق – فبعض الدقيق يتشرب ماء أكثر من غيره – المهم نحصل على عجينة تلتصق خفيف باليد – لاننا عند صنع العيش حنقطع قطعة صغيرة بحجم قبضة الكف ونمسح بيها على وش التاوة وهى سخنة فى حركة دائرية من برة لجوة لغاية مانوصل لمركز الدائرة – تشبه طريقة عمل الكنافة – فاحنا عايزين عجينة طرية بحيث تلزق واحنا بنسحبها بايدنا حوالين التاوة – كما ترون فى الفيديو التالى

فى الفيديو دة الخباز البحرينى بيصب خلطة بيض حلو خفيفة على وش العيش – مكونة من بيضتين وسكر وماء ورد وذرة حبهان مطحون – لكن ممكن نحط أى خلطة من تأليفنا – او ما نحطش أى حاجة ويبقى عيش سادة

وفيه نوع تانى بتكون العجينة بتاعته طرية زى عجينة الكريب ودة بيحتاج عصاية زى بتاعة الكريب لفرد العجينة – وبعض الناس بيستخدموا المثلث الحديد اللى بيقطعوا بيه صوانى البسبوسة فى فرد العجينة بس مش بتبقى بالاتقان بتاع عصاية الكريب الخشب (عصفورة الكريب)

اما فى الصين فطوروا التاوة بحيث تلف فى حركة دائرية سريعة باستخدام بدال قدم – والخباز يستخدم عصفورة كريب بحيث توزع العجينة على الصاجة بمنتهى السهولة وبسرعة وبطريقة متساوية – بس العجينة طبعا بتبقى طرية زى عجينة الكريب – اثقل شوية من عجينة لقمة القاضى (الزلابيا) – فى الفيديو التالى الخبازة بتكسر بيضة على قرص العيش بعد نضجه وتوزعها برضه باستخدام نفس عصفورة الكريب – وبعد ثنيه بيحشوه صوص وبصل اخضر

فى البحرين وفى مدينة الاحساء بالسعودية يسمونه خبز “المسح” – ربما لأنهم يمسحون بسكين مثلث على وش العجينة لازالة اى ارتفاعات ولضغط العجينة على التاوة عشان تستوى بسرعة وبتساوى من كل الجوانب – وقد اشتهرت هناك الحاجة أم حسن التى اصبحت فنانة فى صنع هذا الخبز وبيعه للناس هناك حتى أن صحيفة الشرق الأوسط اللندنية كتبت عنها هنا:

http://classic.aawsat.com/details.asp?section=54&article=495720&issueno=10951#.U_tCMPmSzZk

ودى طريقة مصرى لعمل خبز الصاج او خبز الشاورمة – تشبه شوية الفطير وبيبقى طعمها جميل فى السندوتشات الملفوفة ينفع نحشيها أى حوادق – تونة فراخ – خضروات – جبنة – وممكن نعمل كمية ونشيله فى الفريزر عالتسخين

One Comment

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *