باذنجان بارميجيانو

أقدم لكم اليوم صينية باذنجان بارميجيانو حتاكلوا صوابعكم وراها – هى أكلة ايطالى مشهورة مكونة أساسا من الباذجان الرومى والجبنة الرومى – اسم الطبق متاخد من الجبنة البارميجيانو اللى هى الجبنة البارميزان اللى فى مصر بنقول عليها جبنة رومى معتقة – بس أنا عدلت في الوصفة عشان تبقى وجبة صحية وخفيفة ولذيذة ان شاء الله تعجبكم وتعملوها دايما زيى – هى خطواتها كتير شوية بس لو عملتوها بمزاج حتبقى النتيجة صينية تحفة طعمها خيالى – انا باعمل صينية كبيرة عشان تقعد وتكفى يومين او اكتر ويبقى تعب بالمرة – لكن ممكن تعملوا نصف المقادير او ربعها حسب رغبتكم وعدد الافراد اللى حيلتهموها بالهنا والشفا المقادير

  • 3 كيلو باذنجان رومى صغير
  • كيلو طماطم صغيرة
  • كيلو حليب
  • 200جم جبنة رومى مبشورة
  • ملقتين كبار دقيق
  • معلقتين كبار سمن او زبدة

للصوص الاحمر:

  • 4 فصوص ثوم كبيرة
  • 1 بصلة كبيرة
  • 4 معالق كبيرة معجون صلصة طماطم
  • 3 معالق صلصة
  • معلقتين كبار سمن
  • معلقتين كبار زيت زيتون
  • ملح وفلفل وورق لورا  وكبابة صينى مطحونين

الطريقة

  • نغسل الباذنجان ونضعه صحيح فى صينية فرن تحت الشواية العلوية 20 دقيقة على كل وش
  • نخرج الصينية من الفرن وبعد ما تبرد نقطع الباذنجان نصفين طوليين – ونغرف اللحم المشوى حتى نصل الى ماقبل القشرة المحروقة مباشرة (بنفس طريقة بابا غنوج)
  • نفتح الطماطم نصفين بالطول ونضعهم فى صينية بحيث يكون القشر من تحت – ونضع الصينية تحت شواية الفرن لغاية ما تتشوى
  • نضع الدقيق والسمن فى حلة ونقلبها بسرعة بمضرب سلك يدوى صغير على النار – واول ما يبدأ يبقلل نصب عليهم الحليب البارد ونص معلقة صغيرة ملح وفلفل وربع معلقة صغيرة كبابة صينى مطحونة ونقلب لغاية ما يغلى ويعمل فقاعات – نطفى النار – حنحصل على باشميل خفيف – أخف شوية من اللبن الرايب
  • نترك الباشميل يبرد – ونضرب 3 بيضات بالشوكة وبعدين نقلب فيهم الجبنة الرومى المبشورة – وبعدين نقلبه فى الباشميل الدافى بنفس مضرب السلك اليدوى – نقلب كتير وبسرعة عشان البيض ما كلكعش – لغاية ما كل حاجة تذوب ويبقى الباشميل ناعم – حنلاحظ انه بدأ يتخن ويبقى زى اللبن الرايب الطرى
  • نضرب الثوم والبصل فى الكبة وبعدين نحمرهم فى السمن وزيت الزيتون وبعدين نضيف الخل والماء ومعجون الطماطم والتوابل ونقلب ونتركه على النار 5 دقائق وبعدين نطفى النار ونغطيه فى الثلاجة لحين وضعه على السفرة باردا وقت التقديم
  • نحط الباذنجان والطماطم المشوية فى صينية فرن ونصب عليهم خليط الباشميل والجبنة والبيض ونقلبهم وبعدين نفردهم فى الصينية بالتساوى ونضعها تحت الشواية لغاية لونها مايبقى وردى لكن مش أحمر ولا طبعا اسود – حوالى 10 دقائق – وبعدين نطفى الشواية ونشغل الفرن من تحت على الصينية 20 دقيقة على أقل درجة – 120 درجة – عشان تتماسك من تحت
  • وقت التقديم نفرد الصوص الاحمر باردا على وش الصينية

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *