أفضل طريقة لحماية الكمبيوتر واللاب توب

Reboot-Restore-Rx_03

تحديث

اذا كنت تستخدم ويندوز 10 لا تقم بتنصيب هذا البرنامج لانه غير متوافق مع Windows 10 فى الوقت الحالى وقد يسبب توقف الجهاز عن العمل

كل الناس بتستخدم برامج مضادة للفيروسات – لكن انا لأ

مضادات الفيروسات برامج مزعجة بتطلب تحديث كل شوية وكمان بتبطأ الجهاز لانها شغالة طول الوقت وياريتها بتحمى الجهاز فى الآخر – فهناك الاف الاخطار اللى ممكن تصيب جهازك فى وجود أقوى برامج الانتى فايرس

انا باستخدم برنامج صغير بيعزل الكمبيوتر تماما عن كل شئ – أى فيروسات تدخل الجهاز مرحبا بيها مفيش مشاكل – لما اطفى الجهاز وافتحه تانى المرة الجاية الفيروسات دى حتختفى ويرجع الجهاز كما سبق بالظبط كل مرة

يعنى البرامج دى مش بس بتحمى جهازك من الفيروسات – دى كمان حتخلى جهازك سريع وخفيف بالظبط زى يوم ما اشتريته – وطبعا كلنا بنلاحظ ازاى الاجهزة بتبقى بطيئة بمرور الوقت وتفقد سرعتها اللى كانت عليها لما اشتريناها جديدة – المشكلة دى مش حيبقى لها وجود وحيظل جهازك سريع لسنوات وسنوات – ومش حتحتاج تفرمت كل شوية

أول برنامج من النوع دة بدأت فى استخدامه من حوالى 10 سنين اسمه Deep Freeze – بس عيبه انه مش مجانى وبيبطأ الجهاز شوية بسيطة – وكمان كل مرة عايز تعمل اى تعديل دائم فى الجهاز او تنصب برنامج مثلا بصفة دائمة لازم تطفى الجهاز وتشغله تانى – وبعدين استخدمت برنامج اسمه Returnil لكن الموقع بتاعهم توقف مؤخراً وكمان اختيارات البرنامج كتيرة وممكن تلخبطك – وأخيرا اكتشفت برنامج تحفة صغير جداً وبسيط جداً وأى واحد ممكن يستخدمه بسهولة – اسمه Reboot Restore RX – والجميل انه برنامج مجانى وتنصيبه سهل جدا (اضغط على اسمه لتنزيله)

أثناء التنصيب بيسألك عايز تحمى أى بارتيشن – يعنى مثلا لو عندك الهارد متقسم C و D و E هو بيكون معلم لك على C – لو عايز تحمى بارتيشن اضافى او اكتر علم على الحرف بتاعه – بس انصحك تسيب واحد على الأقل مش متعلم عليه – المهم فقط هو C فالاحسن تترك الاختيارات كما هى وتدوس Next

بعد كدة البرنامج حيقفل جهازك ويفتحه تانى وبكدة يبقى جهازك محمى من أى تعديل – يعنى لو حد جاء ومسح لك كل ما على C من برامج او ملفات – أو دخلت فيروسات او لو مواقع لعبت فى المتصفح واضافت شريط جديد – لو الجن الازرق عمل عمايله فى جهازك – مجرد ما تقفل الجهاز وتفتحه حتلاقى كل حاجة زى ما كانت – كل برامجك وملفاتك اللى اتمسحت رجعت زى ما هى – ولا أثر لأى فيروس او أى تعديل – الجهاز كل مرة بيرجع زى ما كان بالظبط لحظة تنصيبك للبرنامج دة – عشان كدة أفضل شئ انك تنصب البرنامج دة بعد ما تكون يا اما لسه شارى الجهاز جديد يا اما لسة مفرمته وحاطط له نسخة ويندوز طازة – وبكدة حيفضل الجهاز بنفس حالته وسرعته وخفته مهما طال الزمن

خد بالك ان النوع دة من البرامج بيرجع الجهاز زى ما كان كل مرة تفتحه – يعنى لو نصبت برنامج جديد او عملت تحديث – المرة الجاية لما تفتح مش حتلاقيهم – ولو نزلت أى حاجة من النت برضه حتختفى لو حفظتها فى C – عشان كدة نصحتكوا عند تنصيب البرنامج انكوا تختاروا يقفل C فقط – عشان لما تنزل اى حاجة من النت تحفظها فى D او اى جزء غير C

أما بالنسبة لتنصيب اى برنامج جديد او تحديثه – فنصيحتى انك تنصبه الاول وتجربه – ولو عجبك ولقيته لم يسبب مشاكل او يبطأ الجهاز مثلا – تعالى عند السهم اللى تحت بجوار الساعة ودوس عليه – حتلاقى ايقونة البرنامج لونها برتقالى على شكل زر باور – نفس الشكل البرتقالى اللى فوق – دوس عليها يمين بالماوس واختار Disable – حتلاحظ ان الايقونة تحولت من اللون البرتقالى الى اللون الرمادى – يعنى البرنامج الان لا يحمى الجهاز – وأى تعديل يحصل حيفضل موجود مش حيختفى – ساعتها نصب البرنامج – وبعد ما تخلص دوس برضه يمين على نفس الايقونة واختار Enable – بدون تأخير عشان ما تدخلش أى حاجة للجهاز فى الوقت اللى فيه مش محمى – والأحسن انك ما تدخلش على النت طول ما الايقونة لونها رمادى – وهكذا تقدر فى أى وقت عايز تعمل تعديل دائم فى جهازك انك توقف البرنامج وتعمل التعديل وبعدين ترجعه يشتغل تانى من غير ما تحتاج تقفل الجهاز وتفتحه تانى زى ما بيطلب برنامج Deep Freeze ودى ميزة كبيرة جدا ما يحسش بيها غير اللى كان معتمد على ديب فريز قبل كدة

الطريقة دى ممكن تساعدك قوى فى اختيار البرامج الافضل – يعنى كتير لما بنعوز برنامج نعمل بيه حاجة بنلاقى اختيارات كتيرة قوى – برامج كتيرة بتؤدى نفس الغرض – لكن المشكلة ان الاف من البرامج المجانية بتكون مش كويسة وبيبقى فيها برامج تانية مخفية بتنصب نفسها بدون ما تشعر وتبطأ جهازك وتزحمه بدون أى لازمة – دلوقتى ممكن نجرب اى عدد من البرامج بدون مشاكل – على شرط تكون الايقونة برتقالى طبعاً – ممكن تلاقى برامج بتقول انها مجانية لكن تطلع بتشتغل مثلا 14 يوم بس – او برامج بها اعلانات – وكتير من البرامج المجانية بتنصب معاها حزمة من البرامج الغريبة بدون علمك او موافقتك مالهاش اى لازمة لتحقيق مكاسب تجارية ليهم – كل دة مش حتكتشفه الا بعد ما تنصب البرنامج – يعنى كانت البرامج دى ممكن تخللى جهازك شوربة وتبهدله – لكن كل دة ينتهى الآن! دلوقتى فى حماية ريبوت ريستارت ار اكس لو نصبت 100 برنامج وجربت زى ما انت عايز – مجرد قفل وفتح الجهاز كل شئ حيختفى تماما –  والبرامج بس اللى عجبتك وثبت لك انها محترمة ومفيدة ولا تزرع اشياء غير مرغوب فيها ووقع اختيارك عليها هى بس اللى تنصبها تنصيب دائم بعد تعمل Disable والايقونة تبقى رمادى – بس أهم حاجة ماتنساهاش على الرمادى – بمجرد ما تنصب البرامج اللى عجبك تروح فورا عامل للايقونة Enable عشان يرجع الجهاز فى حمايته تانى

لكن نصيحتى لكم – بعد تجربة برنامج ما والتأكد من انه جيد وتريده بصفة دائمة على جهازك – لو كنت فاتح الجهاز من مدة وعملت تغييرات أخرى انصحك انك تقفل الجهاز وتفتحه من جديد وفورا تنصب البرنامج اللى انت عايزه وبعدينتدوس يمين على الايقونة وتختار Disable Reboot Restore RX ثم تدوس تانى على طول وتختار Enable – لانك لو عملت كدة وكنت فاتح جهازك بقالو مدة اى تعديلات او اضافات او ربما فيروسات حيحتفظ لك بيها – فدايما ما تعملش Disable الا لما تقفل الاول جهازك وتفتحه تانى

بكدة انت مش محتاج خلاص أى antivirus مضاد للفيروسات – يعنى حتسترد جزء كبير من سرعة جهازك اللى كان محتلها مضاد الفيروسات – وبكدة حيفضل جهازك سريع وخفيف زى الجديد بالظبط – بس بشرط – خللى الحماية دايما مفعلة – يعنى تأكد دائما ان الاقونة لونها برتقالى – اوعى تنسى وتسيبها رمادى اكثر من اللازم – يا دوبك تسطب البرنامج اللى انت استقريت عليه – من غير ما تدخل على النت – وبعدين على طول تروح عامل للايقونة Enable عشان يدخل فى الحماية وترجع الايقونة برتقالى تانى

وما تنساش اى داونلود تعمله احفظه فى أى مكان غير C – والا لن تجد كل اللى نزلته – صور اغانى برامج افلام العاب – كله حيختفى با معلم لو حفظته فى سى

نفس البرنامج دة ممكن يساعدك فى انك تخلى جوجل كروم رهوان وسريع سرعة رهيبة

لو انت من مستخدمى متصفح جوجل كروم حتلاحظ ان كل يوم بيبطأ اكتر واكتر – لغاية ما تلاقى مجرد فتحه بياخد وقت طويل جدا – والحل بسيط جدا

تأكد من انك عامل ساين ان sign in بالاكاونت بتاعك فى جوجل – عشان يحفظ لك كل مواقعك المفضلة bookmarks وكلمت السر واى اضافات extensions زودتها للمتصفح وتاريخ تصفحك وصفحات البداية بتاعتك وحاجات كتير تانية – عشان يحفظ لك كل دة لازم يكون ليك حساب فى جوجل وتكون كاتب اسم حسابك وكلمة السر فى اعدادت المتصفح

اقفل المتصفح جوجل كروم

اعمل Disable لبرنامج ريبوت

دوس على ستارت وبعدين Computer – ودوس بالماوس جوة شريط العنوان اللى فوق – حتلاقى كلمة Computer تتحول الى اللون الازرق – انسخ العنوان التالى وحطه فى شريط العنوان:

%LOCALAPPDATA%\Google\Chrome\User Data\

ودوس Enter حتلاقى ملف اسمه Default – غير اسمه الى Backup Default – خد بالك لازم تكون قافل المتصفح قبل ما تعمل كل دة

بعد كدة افتح متصفح جوجل كروم – حيتعامل معاك كإن دى أول مرة تشغله – لا تقلق – اعمل بس ساين ان sign in وانتظر شوية حتلاقى جوجل راح جايب لك كل اللى هو حافظهولك عنده من مفضلات وكل حاجة – وحينشئ مجلد جديد نضيف اسمه Default بدل اللى انت غيرت اسمه – ولو قارنت بين المجلد القديم والجديد حتلاقى فرق رهيب فى الحجم وحتلاقى ان كروم بقى رهوان

بعد جوجل ما يرجع لك مفضلاتك وكل حاجة – حوالى ربع ساعة او نصف – لا تدخل خلالهم على أى موقع خالص – اعمل لايقونة برنامج ريبوت Enable لتعود فى حمايته من تانى

تصفح بقى براحتك ولا تحمل هم كروم – فكل مرة تفتح جهازك مجلد Default حيرجع جديد تانى وفيه بس اللى جوجل نزله لما كانت ايقونة ريبوت لونها رمادى

فاضل انى اقول لكم على ميزة هامة جدا للبرنامج دة – وهى انه فى حالة لو ويندوز لأى سبب باظت وجهازك مش راضى يفتح – او لو حصل والبرنامج نفسه باظ لأى سبب – تقدر تعمل الاتى بسهولة:

  • اقفل الجهاز وافتحه تانى
  • بمجرد ظهور صورة السبلاش بتاعة البرنامج – قبل ظهور الويندوز – اضغط فى لوحة مفاتيحك على زر Home بصفة متكررة
  • ستظهر لك قائمة بها 3 اختيارات
    • Restore Now
    • Uninstall
    • Exit
  • الاختيار الاول يعالج مشكلة الويندوز لو باظت ومش راضية تفتح
  • الاختيار الثانى – لو الاول مجبش نتيجة – يشيل البرنامج لو كان هو السبب فى عدم فتح الجهاز – وبعد ما ويندوز تفتح تبقى نصبه من تانى
  • الاختيار الثالث لو عايز تخرج من المنيو

حصلت معايا قبل كدة – لما كنت باستخدم ويندوز 10 جديد – ونصبت البرنامج عليها – وفوجئت ان الجهاز بعد ما قفل مش راضى يفتح تانى – مكنتش اعرف انه غير متوافق مع ويندوز 10 حسب ما قالولى بعد كدة – ومرة تانية البرنامج باظ ومبقاش راضى يشتغل ولا يخللى ويندوز تبدأ – فى الحالات دى الطريقة السابقة بتنفع جدا بدل ما تضطر تفرمت وتحط ويندوز من اول وجديد

وأى اسئلة انا تحت امركم ويسعدنى تقديم المساعدة لمن يطلبها فى أى وقت ولا أسألكم الا الدعاء – ربنا يكرمكم جميعاً ويرضى عنكم ويمتعكم بالصحة والسعادة دنيا وآخرة يارب

3 تعليقات

  1. طب البرنامج ده اجيبه منين ؟؟
    يعنى لو عملت عليه سيرش اى واحد الاقيه انصبة ولا ممكن يكون زى ما قلت حاجات تانية
    انا كرهت احمل اى حاجة من النت لانى بلاقى حاجات تانية اللى دخلت الجهاز و بصعوبة لما امسحها ده لو عرفتها اصلا
    وشكرا جدا على المقال المفيد ده

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *