جداول اكسيل لتجار السلع التموينية – اعرف رصيدك من السلع لحظياً

تحديث

الجداول المذكورة هنا قديمة – ويوجد الان جداول افضل منها للسادة تجار التموين هنا:

===========================

بعض السادة تجار السلع التموينية طلبوا منى تصميم جداول تساعدهم على معرفة رصيدهم من السلع التموينية – فبدأت على الفور فى تنفيذ مطلبهم – ويمكنكم تنزيل الملف المرفق هنا وتجربته – ولو هناك بضاعة مرتجعة ادخل عدد عبواتها بالسالب تحت كل صنف

لفتح الملف تحتاج الى كمبيوتر او لاب توب او تابلت – وبرنامج Microsoft Excel أو البرنامج المجانى LibreOffice Calc اضغط على اسم البرنامج لتنزيله على جهازك لتتمكن من فتح واستخدام الجداول التى صممتها لكم

طريقة الاستخدام

بعد فتح الملف حتلاقى جدولين – اسمهم موضح اسفل الجداول – جدول اسمه البضاعة الواردة – والجدول الثانى اسمه البضاعة المنصرفة

فى جدول البضاعة الواردة ادخل عدد العبوات اللى استلمتها تحت كل سلعة – وبالنسبة للتاريخ اضغط داخل خانة التاريخ وبعدين دوس على زر Ctrl وزر ك مع بعض لادخال تاريخ اليوم – ولو تاريخ سابق ادخله بالكتابة العادية

ولو استلمت بضاعة اضافية اكتبها فى السطر التالى – وبرضه ادخل التاريخ بنفس الطريقة – حتلاقى الاجمالى يظهر لك فوق كل صنف

وفى جدول السلع المنصرفة يمكنك ادخال اسماء العملاء بتوعك مسبقا – وعند الصرف ادخل تاريخ الصرف بنفس الطريقة السابقة – ثم العدد المنصرف من كل سلعة تحت اسمها – حتلاقى فوق كل صنف رقمين بيتغيروا: اجمالى المنصرف – واجمالى المتبقى من كل سلعة – وكل ما تصرف لحد جديد حتلاقى اجمالى المنصرف والمتبقى بيتغير – عشان تبقى عارف بالظبط صرفت كام من كل سلعة ومتبقى منها فى مخزنك كام عبوة باستمرار – بدون حاجة للجرد اليدوى

انا مش عارف البقال التموينى بيخدم كام مواطن – فمبدئيا صممت الجداول بحيث يمكن ادخال بيانات 10 الاف بطاقة تموينية

وبرضه مش عارف التجار بيرجعوا البضاعة المتبقية آخر الشهر وللا بيتسلموا الشهر الجديد ويبقى عندهم الجديد بالاضافة للمتبقى من الشهور السابقة؟ عشان كدة عملت لكم 10 صفوف لادخال البضائع ال20 – ولو الوزارة زودت عدد السلع التموينية حاعدل لكم الجداول حتى يمكن ادخال اصناف أكثر

وبالنسبة للبضاعة ادخالها حيكون بعدد العبوات وليس بالوزن – ولو محتاجين تحولوا من كراتين الى اطنان الى عبوات استخدموا الالة المخصصة لذلك – تجدها فى القائمة اللى على يمينك

الملف المرفق ليس نهائى – أرجو من السادة التجار القاء نظرة عليه وتجربته ثم ابلاغى بأى تعديلات أو اضافات يريدونها – وسأقوم بكل التعديلات المطلوبة وتحديث الملف باستمرار لكى يلبى طلباتكم – برجاء ترك تعليقاتكم بالاسفل بكل مقترحاتكم وملاحظاتكم

والآن اضغط على الرابط التالى لتنزيل الجداول (تحت التجربة)

التموين الوارد والمنصرف

13 تعليق

  1. الله ينور
    بجد رائعه
    بس التاريخ لما مسحته عمل تاريخ هجري
    كمان لو امكن يكون في خانه في صفحه الصرف بعدد الافراد اقدر اعمل بيها جرد للافراد المنصرفه علشان اعرف انا صرف اد ايه من الربط وياريت يكون التاريخ موثق بالساعه علشان نةقدر نبهر الزبون بميعاد وتاريخ الصرف لو فكر يدعي انه مصرفشي وربنا انت استاذ

  2. عمو محمد ممكن لظروف المحاسبه يكون بعد االمسلسل خانه لاثبات رقم البطاقه الذكيه علشان نعرف مين سجل بالظبط وعدده وكمان حاله البطاقه سواء ورقي او خلافه كمان لو الاسماء كلها نازله فعلا ازاي نعمل اختيار بالتصفيه

    • تحت أمرك بس فيه حاجات مش فاهمها يا ريت توضيح اكثر تفصيلا:
      – تقصد ايه بكلمة “وعدده” الضمير هنا راجع على مين؟ عدد ايه؟
      – هل مازالت هناك بطاقات تموين ورقية؟ وهل فى الورقية برضه ليها رقم؟
      – بالنسبة للاسماء تقصد ايه “اختيار يالتصفية”؟
      – عايز ارقام البطاقات على شمال الاسماء وللا على يمينها؟

      • يا باشا عيد سعيد علي حضرتك
        كلمه عدده القصد بيها عدد الافراد
        اما اختيار التصفيه فده لو ازاي نقدر ننزل الاسماء كلها مسبقا
        البطاقات الورقيه انا هاعرفها بانها البطاقات اللي هتظهر من غير رقم زكي بالتصفيه
        ارقام البطاقات بعد المسلسل يعني شمال وربنا يجعلنا من اهل اليمين مش كده ولا ايه

  3. يا باشا عيد سعيد علي حضرتك
    كلمه عدده القصد بيها عدد الافراد
    اما اختيار التصفيه فده لو ازاي نقدر ننزل الاسماء كلها مسبقا
    البطاقات الورقيه انا هاعرفها بانها البطاقات اللي هتظهر من غير رقم زكي بالتصفيه
    ارقام البطاقات بعد المسلسل يعني شمال وربنا يجعلنا من اهل اليمين مش كده ولا ايه

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *