مناهج وزارة التربية والتعليم على إسطوانات تعليمية مجانية لجميع المراحل الدراسية من إنتاج وزارة التربية والتعليم


أصدر أمس مركز تطوير المناهج التابع لوزارة التربية والتعليم المصرية مجموعة رائعة من الإسطوانات التعليمية لجميع السنوات الدراسية من أولى إبتدائى حتى ثالثة ثانوى

كل إسطوانة تغطى منهج دراسى واحد فى تيرم واحد
بعض المواد ماتزال ناقصة فى بعض السنوات الدراسية – لكن النسبة الأكبر من المواد متوفر لها الآن إسطوانات للتنزيل
وكعادة وزارة التربية والتعليم – ووسائل الإعلام المصرية كافة – لم يتم الإعلان عن هذه الخطوة العملاقة – ولا يعرف أصحاب المصلحة – من الطلبة وأولياء أمورهم – أى شيئ عن تلك الإسطوانات
وقد قامت الوزارة بوضع كل الإسطوانات على موقع جديد لها لايعرفه أحد – فى حين كان فى إمكانها وضع الإسطوانات فى المكان الذى يعرفه كل الناس – ماعلينا
.
كل الإسطوانات جاهزة لتنزيل من هنا
http://manahg.moe.gov.eg/
.
تحديث: طريقة أفضل للحصول على الإسطوانات التعليمية
=============
سيرفر الوزارة إتضح إنه بيكون واقع معظم الوقت – وحتى لما يكون شغال بيقعد يقطع والنتيجة أن الإسطوانة اللى نزلتها بعد طول عذاب حتلاقيها ناقصة ومش حتشتغل فى الغالب
علشان كدة أنا رفعت لكم مجموعة إسطوانات بنظام التورنت – وهو نظام هايل – صحيح ممكن ياخد وقت شوية – لكن الفايلات بتيجى كاملة فى الآخر ودة المهم
حتلاقوا الإسطوانات بنظام التورنت هنا

ولو مش عارف ماهو التورنت ولم تستفيد منه قبل كدة – مش مشكلة – حتلاقى شرح مبسط هنا
===================================================

وقد قمت بتنزيل إسطوانة لغة عربية لأكتب لكم عن مستوى جودة تلك الإسطوانات
الإسطوانة رائعة – ومصممة بطريقة سهلة جدا للطالب
وتشمل الدرس ومعانى الكلمات ومواطن الجمال والنحو وتدريبات تفاعلية رائعة
معظم تدريبات كتاب الوزارة موجودة على الإسطوانة بالإضافة لمجموعة إضافية كبيرة من الأسئلة
يتاح للطالب الإجابة عن كل سؤال – وفى حالة الإجابة خطأ تظهر لك الإجابة الصحيحة
الإسطوانة تستخدم طرق تفاعلية متنوعة – فهناك التوصيل بين مجموعتين – علامة صح وخطأ (تسحب بالماوس إحدى العلامتين وتلقيها فى المكان المناسب) – ملئ الفراغات بكلمات مناسبة من مجموعة متاحة – وكتابة إجابات عن طريق لوحة المفاتيح والضغط على أيقونة لمعرفى الإجابة الصحيحة
والنحو يشمل أمثلة كثيرة أكثر من كافية
وهناك تدريبات تفاعلية للنحو منفصلة
أصوات المعلمين وطريقة إلقائهم واضحة وصحيحة فى معظم الأحيان
وفى الحوارات تجد أصوات مختلفة لرجال ونساء وأطفال ليقوموا بأدوار مناسبة لكل منهم
وتشمل الإسطوانة ألعاب تعليمية لأيضا – وإن كانت تغطى التيرم ككل وليس درس درس
.
الإسطوانة رائعة حقا وجذابة للطالب ومليئة بالشروحات والتدريبات – ويمكن للمذاكرة الإعتماد عليها الى جانب كتاب الوزارة أو لوحدها إن لم يتوفر للمغتربين
.
موقع تنزيل الإسطوانات يتيح لك إما تنزيل الإسطوانة فى ملف واحد كبير وإما مجزأة فى ملفات أصغر
إذا كان النت عندك بطيئ أو بيقطع أنصحكم بتنزيل الملفات المجزأة
.
متطلبات التشغيل
ستحتاجون الآتى
برنامج لفك الملفات المضغوطة – مثل سفن زب – نزل نسخة مجانية من هنا
http://www.7-zip.org/
برنامج شوك ويف من شركة أدوبى – الإسطوانة نفسها ستتيح لك تنزيله من النت – لكن إن لم تفعل فيمكنك تنزيله من هنا
http://www.adobe.com/shockwave/download/?P1_Prod_Version=SWArchive9.0.0

95 تعليق

  1. السلام عليكم
    فى الصف الثانى كتاب انجليزى فقط عايز باقى المواد شكرا

    • عزيزى هشام
      الوزارة لم تكمل بعد باقى المناهج
      بعض السنوات الدراسية أكثر حظا من غيرها فى عدد الإسطوانات – وربنا يسهل وينتهوا من باقى الإسطوانات

  2. بعد تجربة عدد كبير من الإسطوانات – وجدت أن عدد كبير منها لايفتح إلا لمدة ثانية واحدة ثم تغلق من نفسها
    ويبدو إن السبب هو نسخة البرنامج اللى صمموا به تلك الإسطوانات – فالإسطوانات تم إنتاجها فى أوقات مختلفة – وبنامج دايريكتور كان يتبع شركة ماكروميديا من قبل – وبعدين إشترته شركة أدوبى – والفولدر اللى بيتصطب فيه الأول غير الفولدر اللى بيتصطب فيه التانى – وإختلافات أخرى فنية

    أنا أرسلت إيميل للوزارة – الدعم الفنى لمناقشة المشكلة دى – يارب يردوا عليا علشان ألاقى لكم حل فى أقرب وقت بمشيئة الرحمن

    لكن حاليا الإسطوانات اللى تلاقى فيها – بعد فك الضغط – ملف
    autorun.exe
    غالبا لن تعمل
    أما الإسطوانات التى فيها 10 ملفات وليس منهم الملف أعلاه – بل فقط ملف
    run.exe
    فغالبا حتشتغل معاك بإذن الله

  3. اخى الكريم
    جزاك الله خيراً
    بالنسبه لمدارس اللغات والمدارس التجريبية يتم تدريس الرياضة والعلوم باللغة الانجليزية
    فهل قامت الوزارة بعمل اسطوانات خاصه بهذه المدارس ام لا
    ولك كل الشكر والتقدير

  4. الرد
    وماذا عن مناهج العتوم و الرياضة باللغة الفرنسية علي القنوات التعليمية أو ال cd?
    برجاء

  5. Pingback: How to copy Arabic URL كيف تنسخ عنوان عربى لموقع - .. - my 2 cents

  6. عزيزتى أم مريم
    للأسف الوزارة سقط من وعيها إن فيه طلبة بيدرسوا فى مدارس فرنسية – أو يمكن الوزير ماحدش قاله إن المدارس الفرنسية تتبع الوزارة
    لكل الشهادة لله الراجل عادل – فمدارس اللغات الإنخليزى برضه مش فى باله – يعنى مساواه أهه الراجل معندوش خيار وفقوس

  7. جزاك الله كل خير
    واتمنى ان ارسلك لتطوير ذلك الاســـــــــــطوانات وانشاء الله هتستفيد وانا ايضا ساستفاد

  8. للاسف لم استطيع تحميل اى من الكتب او الاسطوانات التحميل بطئ جدا جدا ويعمل فترة قصيرة ثم يقف ارجوك ساعدنى كيف يتم التحميل

    • فعلا السيرفر بتاع الوزارة مش مستحمل الضغط الكتير عليه – أصل الإسطوانات هايلة هايلة ويمكن عشان كدة فيه ضغط جامد أوى لتنزيل الإسطوانات ايومين دول
      نصيحتى أن تحاولى التنزيل وقت الفجر أو من 3 الى 8 صباحا لو تقدرى تسهرى – هما يستاهلوا الصراحة
      وكمان أنصحك لو بتستخدمى فاير فوكس نزلى بلج إن إسمها داون زم أول – من هنا
      https://addons.mozilla.org/en-US/firefox/addon/201

  9. مشكوور عاى الموضوع المفيد

    والشرح الوافى ..

    أتمنى لك وللجميع التوفيق

      • جزاكم الله كل خير على ما تفعلوه
        ونتمنى أن تقوم الوزارة بإنزال بقية المواد كالأحياء للثانوية العامة

  10. برجاء اح الاخوة من المنتدي يكون عندة النت بحالة كويسة وسريعة ييعيد تحميل هذه الكتب علي احد المواقع الجيدة لان موقع الوزارة اصبح تقيل وبيقطع

    • أنا فعلا شغال فى الإتجاه ده ياأستاذ رفاعى – وإنتهيت من رفع بعض السنوات والباقى بإذن الله فى الطريق – سواءا روابط مباشرة أو بطريقة التورنت
      حتلاقى الروابط كلها هنا

  11. السلام عليكم ورحمه الله

    بعد اذن حضرتك:
    هو مفيش غير اللغه الفرنسيه والالمانيه فقط للصف الاول الثانوى

    انا مش لقيت اى مواد تانيه

    بتمنى الاقى ردك speed

    • وعليكم السلام ورحمة الله وبركاته
      المسئولين فى الوزارة أكدوا لى إنهم بيعملوا إسطوانات لبقية المناهج
      المشكلة إن اللى بيصمموا ويبرمجوا الإسطوانات مجرد موظفين فى الوزارة والوزارة لا تعطيهم سوى مرتبهم – وأنا إقترحت أن يتم الإنفاق على الإسطوانات أكثر من كدة لإنها أفيد للطلبة من البرامج التعليمية – وأكيد لو الموظفين شعروا بالتقدير المادى والأدبى حيشتغلوا بنشاط وهمة أكبر – دول مفروض يكونوا نجوم المجتمع والإعلام يحتفى بيهم لإنهم بيربوا أجيال – مش الفنانين والراقصات
      عموما حتى الآن فيه مناهج كتير لسة ناقصة – مش بس أولى ثانوى – وربنا يسهل كلنا فى إنتظارهم

Comments are closed.