طريقة عمل الكشرى

اليكم طريقة سهلة لعمل كشرى مصرى لذيذ وصحى – فمن أجل صحتك وصحة أسرتك الكشرى بتاعى خالى من المحمرات – لإن كل ما هو محمر أو مقلى ضار بالصحة – عشان كدة الكشرى هنا بدون بصل محمر – أو ورد – وبدون شعرية لإنها بتتحمر وتشرب زيت كتير

أرجو انكوا ما تزهقوش من التفاصيل الكتير – اصلى بحب الدقة فى كل الخطوات

أهم شئ فى الكشرى الصلصة والدقة – وأهم شئ فى الصلصة التوابل – عشان كدة حنبدأ بتكوين خلطة خاصة من التوابل اسمها بهارات الكشرى – بعد خلط مكوناتها نشيلها فى برطمان صغير ونأخذ منها 2 ملعقة صغيرة كل مرة نعمل صلصة كشرى

بهارات الكشرى:

  • 2 م ك (ملعقة كبيرة) كزبرة ناشفة مطحونة
  • 2 م ص (ملعقة صغيرة) كمون مطحون
  • 2 م ص كركم
  • 4 م ص ملح صينى (جلوتامات صوديوم)
  • 1 م ص شطة مطحونة
  • 1 م ص جنزبيل مطحون
  • 1 م ص حبهان مطحون
  • 1 م ص كبابة صينى مطحونة
  • نصف م ص بابريكا (فلفل احمر حلو)

نقلب كل التوابل فى برطمان نأخذ منه 2 ملعقة صغيرة ونحفظ الباقى فى الفريزر

صلصة ودقة الكشرى

حنعمل الاثنين فى خطوة واحدة عشان نقلل السوائل فى الكشرى وما يبقاش مبلول

المقادير

  • نصف كيلو طماطم
  • 10-12 جرام ثوم مقشر (2 او 3 فص كبير)
  • 1 م ك صلصة
  • ثلث كوب خل
  • 1 قرن فلفل حامى
  • 1 م ص ملح
  • 1 ورقة لورا
  • 2 م ص بهارات كشرى

الطريقة

  • نضرب الطماطم فى الخلاط مع قرن الفلفل حتى يصبحوا عصير
  • نهرس الثوم ونشوحه فى حلة صغيرة مع ملعقة زيت حتى يصفر لونه
  • نضيف عصير الطماطم والخل والصلصة وورقة لورا والملح
  • نغلى الصلصة 5 دقائق فقط ثم نضيف البهارات ونقلب وبعد دقيقتين نطفى النار

الكشرى

المقادير

  • نصف كيلو حمص شام (منقوع فى ماء من الليلة السابقة) (حنستخدم ربع الكمية والباقى نشيله للمرات القادمة)
  • 2 كوب عدس بجبة
  • 2 كوب ارز
  • نصف كيلو مكرونة كشرى (مرمرية صغيرة)

الطريقة

  • نصفى حمص الشام من ماء النقع ونغسله أكثر من مرة ثم نسلقه فى ماء جديد حتى ينضح – مع اضافة ملعقة صغيرة ملح وذرة من بهارات الكشرى – يحتاج من ساعة الى 3 ساعات حسب نوع الحمص – النوع الصغير الغامق يأخذ وقت أطول من النوع الكبير الفاتح – ثم نصفيه ونأخذ الحب فقط – ونظرا لطول وقت طهيه بنعمل كمية كبيرة – نصف كيلو يكفى لعمل 4 مرات كشرى – ونحفظ المتبقى فى كيس بالفريزر ليكون جاهز فى المرات القادمة توفيرا للوقت – وعند عمل كشرى جديد نخرج الكمية اللى عايزينها ونسخنها فى قليل من الماء
  • نغلى 4 أكواب ماء فى حلة مع 2 ملعقة صغيرة ملح وذرة بهارات كشرى ونصب فيها العدس بعد غسله جيدا وتصفيته من ماء الغسل – وبعد ما الماء يعود للغليان نغطى الحلة ونتركها على أقل نار ممكنة لمدة 15 دقيقة
  • نضيف الأرز الى العدس بعد غسله جيدا وتصفيته – ونقلبهم مع بعض بدون اضافة ماء جديد – وبعد ما الماء يعود للغليان نغطى الحلة ونتركهم على أقل نار ممكنة 20 دقيقة – ثم نطفى النار ونترك الحلة مغطاة ربع ساعة لتكتمل التسوية فى البخار المحبوس داخل الحلة – بعدها نرفع الغطاء ونقلب الارز والعدس ليكون مفلفل ولا يلتصق ببعضه
  • نغلى 5 لتر ماء فى حلة كبيرة ثم نضيف المكرونة ونقلب كل دقيقة ونحك قاع الحلة بقوة باستخدام ملعقة خشب عشان المكرونة ما تلزقش فى القعر – خصوصا لو بتسخدموا حلل ستانلس زيى – لانها أفضل حلل للطهى من الناحية الصحية – وبعد 10 دقائق نصفيها فى مصفاة فى الحوض ونغسلها بماء بارد مع التقليب – ثم نصفيها تماما من الماء ونعيدها للحلة ونضيف لها ملعقة كبيرة زيت بارد وملعقة صغيرة ملح ونقلبها – الزيت يمنع التصاق المكرونة ببعضها
  • لتقليل الحلل نضع العدس والارز بالتدريج مع المكرونة فى الحلة الكبيرة بأن نكشط وش الارز والعدس بشوكة ونصب على المكرونة ونقلبهم مع بعض ثم نكشط كمية أخرى بالشوكة وهكذا حتى يكونوا كلهم على بعض فى حلة واحدة كبيرة لسهولة التقليب مرة واحدة بانسجام وتساوى لجميع المكونات – ثم نغرف الكشرى فى الاطباق متقلب جاهز ونضيف فقط الحمص والصلصة مغلية ومبقللة على وش كل طبق – فعند تقديم الكشرى نحتاج فقط الى أن نغلى الصلصة – ويكفى ان تكون باقى المكونات دافئة أو حتى بحرارة الغرفة – لإن الصلصة الساخنة جداً بعد تقليبها فى الكشرى حتخليه هو كمان يسخن

كشرى صحى ولذيذ – بأقل كمية ممكنة من الدهون – لإن الورد او البصل المحمر والشعرية المحمرة   هما أكثر حاجتين ضارين بالصحة فى كشرى المحلات – اما الكشرى دة فخفيف وصحى – لن تشعر بعد تناوله بأى متاعب فى الهضم باذن الله

وبألف هنا وشفا

شفت مفاجأة النهاردة ؟ اضغط هنا عشان تشوفها (مفاجأة جديدة كل يوم)

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *