اسهل طريقة لتسخين الاكلات الناشفة وخصوصا الارز

تسخين الارز مشكلة لان قعره دايما بيتحرق عند تسخينه – عندى لكم طريقة سهلة لتسخين مش بس الارز لكن ايضاً المكرونة بالبشاميل – السباجيتى – البوفتيك – البانيه – المشويات وكل الاطعمة الناشفة

الطريقة هى التسخين على البخار

انا عندى حلة بخار الومنيوم من تايلاند هذا هو شكلها

steamer

 

وهى كما ترون حلة من 3 ادوار – فى القعر نضع ماء – وفى الدورين العلويين نضع اطباق الطعام اللى عايزين نسخنها – ثم نضع الحلة على النار – وبعد غلى الماء يتصاعد البخار فيسخن الاطباق بسرعة – خمس دقائق فقط وكل شئ يبقى ساخن من برة ومن جوة – بسبب خاصية التغلغل اللى بيتمتع بها البخار

فى حالة تسخين النواشف مثل البوفتيك والبانيه والمشويات من المفضل لفهم فى ورق فويل حتى لا يتبلوا ببخار الماء المتصاعد

مش عارف ليه النوع دة من الحلل مش متوفر فى مصر – ياترى حد وجدها تباع عندنا؟ ياريت لو حد يعرف مكان بيعها فى مصر يترك تعليق بالعنوان عشام فيه ناس كتير لما بتشوفها عندى بتتمنى تشترى زيها – انا كنت شاريها بحوالى 10 دولار فقط من اكتر من 20 سنة

طبعا الحلة دى مش للتسخين فقط – ممكن نعمل فيها احلى بطاطا وذرة – وممكن نطهى فيها جميع انواع الخضروات – فالطهى على البخار صحى جداً ويحفظ للخضروات كل مكوناتها – بعكس السلق حيث تتسرب الفيتامينات والمعادن فى ماء السلق

وممكن كمان تسخين العيش فيها – بدون اضافة ماء فى القعر – على نار هادية – فالحلة ماشاء الله قوية وتتحمل التسخين وهى ناشفة

وكمان ممكن استخدامها فى تدخين الاطعمة – مثل اللانشون المدخن مثلاً – وعمل سلامى و بيبرونى بيتى بسهولة – الطريقة شرحتها لكم فى موضع منفصل – لقراءته اضغط هنا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *