Skip to content
 

تجربتى مع منتجات فراخ كوكى

توجد فى الأسواق عشرات الماركات التى تقدم قطع الدجاج سابق الطهى – مثل كوكى – اطياب – ثرى شيفس – المراعى – جاهز

معظم هذه المنتجات مقلب – لأنها ليست لحم دجاج حقيقى وانما مجرد عجينة من النشويات مع طعم صناعى وربما جزء بسيط من الدجاج قد يكون من الجلد او الأجزاء التى لا تؤكل

لكن منتجات كوكى مختلفة تماماً – على الأقل منتجاتهم الجديدة – فقد اشتريت عبوة “كرسبى ستريبس” (Crispy strips) فوجدناها لحم صدور دجاج حقيقى وليس عجينة كالمنتجات الأخرى – وطعمها رائع يفوق الوصف – التتبيلة بتاعتهم تجنن ومختلفة خالص عن أى محاولات بيتى – عيبها الوحيد بس ان القطع مبعجرة مش مبططة – وانا بأحب احمر فى زيت قليل مش بطريقة الغمر – عشان ما استخدمش الزيت تانى – لكن ممكن التغلب على دة باننا نغطى الطاسة ونتركها على نار هادية خالص – وسأجرب عبواتهم الأخرى واكتب لكم عنها هنا قريبا باذن الله

اسعار كوكى معقولة جدا وربما أرخص حتى من الدجاج الطازج – فمثلاً صدور الفيليه وصلت 42 جنيه وقت كتابة هذا الموضوع – بينما عبوة صدور الدجاج البانيه سابق الطهى كوكى وزن كيلو ونصف سعرها 50.50 – يعنى الكيلو بحوالى 34 جنيه فقط – وعليه بطاطس هدية كمان!

وهناك عبوة 8 قطع صدور بانيه ب25 جنيه لكن وزنها مش مكتوب على الكيس

منتجات كوكى نوعين عادى وسبايسى – انا باشترى العادى عشان مش كل افراد الاسرة بيحبوا الشطة

ربما تكون هناك ماركات اخرى تستخدم لحم صدور دجاج حقيقى زى كوكى – لكن بالنسبة لى كوكى عن تجربة مضمون وطعامته خطيييييييييرة

والجميل فى هذه المنتجات اننا فى اى وقت مزنوقين ومفيش اكل فى البيت نطلع عدد القطع اللى احنا محتاجينها من الكيس فى الفريزر – وفى خمس دقائق تكون عندنا وجبة جاهزة كسندوتشات سريعة او مع ارز ابيض – مفيش اسهل ولا اسرع من كدة

تحديث
اشتريت صدور بانيه كوكى عبوة التوفير وزن كيلو ونصف – اكتشفت انها عجينة – بدليل ان كل القطع – وعددهم 31 قطعة – على شكل مثلث بنفس الحجم والابعاد – وطبعا قطع صدور الفراخ الطبيعية لا تكون بهذا الشكل وتكون مختلفة الأبعاد – اما العجينة فيشكلونها فى قوالب لهذا تأتى متماثلة فى الشكل والابعاد

طعم صدور البانيه لم يعجبنى – البانيه البيتى اطعم بكتير

وأيضاً اشتريت كفتة شرقى كوكى – سعر الكيس 12 جنيه مع بطاطس هدية – مكتوب على الكيس ان به 36 قطعة كفتة – لكننى وجدت 31 قطعة فقط – لكن وزن الكفتة سليم نصف كيلو – بس واضح انها قوالب عجينة ايضا من شكلها المنتظم المستطيل وكل القطع بنفس الابعاد ايضا

طعم الكفتة الشرقى سيئ جدا – الكفتة عبارة عن بقسماط بس تقريبا – وهناك شريحة رقيقة جدا من مادة مفرومة المفروض انها لحم فراخ لكن طعمها ابعد ما يكون عن لحم الفراخ او اى لحم الحقيقة! ممكن نقلى بقسماط معجون بماء والطعم حيبقى افضل من كوكى

الخلاصة – بعد تجربة منتجات كوكى – ان المنتج الوحيد الجيد هو الكرسبى ستربس – لانها مكونة من لحم صدور صحيح حقيقى – اما باقى منتجاتهم فعبارة عن عجينة خسارة فيها الفلوس – والريحة اثناء القلى بشعة تخللى الواحد يجيب اللى فى بطنه

بصراحة مفيش احلى ولا اطعم من اكل البيت – بلا كوكى بلا موكى – بس خلاص – توبة

رعاة sponsors











4 Comments

  1. أم عبد الله قال:

    فعلا دجاج كوكي طعمه جنان ولكن ماذا عن مادة أحادى جلوتومات الصوديوم”المسببة لذلك الجنان

    • عمو محمد قال:

      احادى جلوتامات الصوديوم مادة آمنة تماما حسب احدث الدراسات الصحية – وهى مستخلصة من مواد طبيغية – وموجودة فى كل ماهو طعم بطريقة طبيعية – مثل الجبنة الرومى المعتقة وشوربة المحار – انا كنت بأتجنبها تماما لكن دلوقتى بأشتري كيس كيلو – اسمه عند العطارين ملح صينى – وبأحطه على حاجات كتير ليزيدها طعامة بلا اى خوف على صحة الأسرة

  2. ام سيف قال:

    كلامك صح بس كان زمان دلوقتي كلها عجينة وجلد بجد تقرف كله عايز يكسب ويلم حق الإعلانات و مش مهم المستهلك

    • حاج محمد قال:

      اتفق مع حضرتك – المفروض كلنا نقاطع ماركة كوكى وأى ماركة تقدم منتجات سيئة للمستهلكين – لانهم للأسف بيستغلوا ارتفاع اسعار الدواجن فيقدموا اسوأ ما لديهم والمستهلك الغلبان بتغريه اسعار العروض المتدنية مقارنة بالدواجن الحقيقية فيضطر يشترى عشان ولاده ياكلوا والسلام – حتى لو عجينة مدام مرسوم عالكيس فراخ!

أكتب تعليقك على المقال - Leave a Reply

لاضافة صورة او مستند اضغط هنا