تقييم لاب توب لينوفو Lenovo G580

أشتريت منذ أيام لاب توب Lenovo G580 بالمواصفات الآتية

  • Intel i5 3210 processor
  • 4gb ddr3 rams
  • 500gb HDD
  • Geforce 610m 1gb vga

يباع فى كارفور بسعر 3399 جنيه

اللاب توب رائع – لوحة مفاتيح متينة واحساسها فخم ومريح للأصابع وبها باد للأرقام – تتش باد كبيرة بها سكرول – صوت السماعات دولبى مجسم – والصوت عالى جدا ورخيم – بعكس كثير من اللاب توبس اللى بيكون صوتهم واطى ومسرسع – كما يوجد 3 يو اس بى منهم 2 يو اس بى 3 – ووصلة اتش دى ام آى للتوصيل لشاشة ال سى دى كبيرة – رائعة لعرض الأفلام والألعاب بحجم عملاق وصوت مجسم

أدهشنى ان هذا اللاب توب يشغل الألعاب الحديثة بكفاءة عالية جدا بالنسبة للاب توب – طبعا مش زى الكمبيوترات البى سى – لكن ماكنتش متصور انه حيقدر يشغل بقوة وبسرعة عالية العاب زى:

  • Alan Wake
  • Sleeping Dogs
  • Dishonored
  • Fifa 13
  • GTA IV
  • Hitman 5 – Absolution
  • Mass Effect 3
  • Need For Speed 13
  • Torch Light 2

جميع الألعاب المذكورة تعمل بسرعة جميلة من أول مرة بدون الحاجة الى أى تعديل فى ضبط الجرافيك الخاص بكل لعبة – طبعاً الألعاب الجديدة بتضبط نفسها اوتوماتيك حسب الهاردوير اللى حتشتغل عليه – وقد وجدت أن الضبط بيبقى فى الميديوم فى أغلب الألعاب

اللاب توب بيأتى فاضى بدون ويندوز – لكن بعد أن وضعت ويندوز 7 عليه أصبح هايل وسريع جدا

بعد تشغيل اللاب توب لساعات طويلة وجدته مازال باردا وكأنه مطفى – ودة شئ جميل يحافظ على الهاردوير ويطول عمر مكوناته الداخلية

البروسيسور i5 3210 بروسيسور من الجيل الثالث – وهو جيل أقوى وأسرع من الجيل الثانى بحوالى 6% – ويستهلك طاقة تشغيل أقل مما يجعل البطارية تدوم أطول من الجيل الثانى – قرأت أنها تدوم 4 ساعات ونصف – لكنى لم أجرب ذلك بنفسى بعد

بعد أن وضعت البرامج الضرورية والألعاب – وضعت برنامج ديب فريز deep freeze للمحافظة على بارتيشن C الخاص بالويندوز وحمايته من أى فيروس أو أى برامج ضارة – حيث أن أى ضرر يلحق بالويندوز يختفى تماما بعد غلق الجهاز – وعندما نفتح اللاب توب لا يكون هناك وجود لأى تعديلات أو اضافات او حتى ممسوحات حدثت فى كل مرة وأى مرة – وهكذا لا نحتاج الى اى برامج مضادة للفيروسات anti virus – فهى تبطئ من سرعة أى جهاز تعمل عليه بلا أى داعى – طالما استخدمنا ديب فريز – اللى بيخللى اللاب توب بعد مدة طويلة يعمل بنفس السرعة اللى كان عليها يوم شراؤه

بعض العيوب البسيطة

طبعا لا يخلو اى جهاز من بعض العيوب

  • لاحظت فى للاب توب دة الصوت العالى لمشغل الدى فى دى – فعندما يعمل يكون صوته مثل ورشة الأخشاب ويهز سطح المكتب بقوة – مع ان عندى لاب توب سامسونج لا تسمع له صوت تقريبا
  • اليو اس بى 3 كنت متوقع انها حتنقل بسرعة صاروخ لكنى فوجئت انها بتنقل فى الأول بسرعة 100 ميجا فى الثانية وبعدين تقل الى 25 ميجا فقط – يعنى زى اليو اس بى 2 !! مع انى كنت بأنقل من هارد بورتابل يو اس بى 3 والنور بتاعه نور ازرق دليل ان النقل بيتم بين يو اس بى 3 وليس نور ابيض كما يفعل مع اليو اس بى 2
  • الشاشة لامعه – كما هو الحال فى معظم الأجهزة للأسف – وليست مطفية مما يعكس الأشياء عليها – لكن الإضاءة العالية للشاشة تخفى هذا العيب الى حد معقول

لكن تلك العيوب البسيطة لا تؤثر على تقييمى لهذا الجهاز الرائع – وأرشحه لكل من يبحث عن لاب توب رخيص لكن قوى وسريع ويمكنه تشغيل كثير من الألعاب بكفاءة وسرعة مناسبة

 

يتميز لينوفو G580 بلوحة مفاتيح قوية ومريحة واحساسها رائع

303 تعليقات

  1. السلام عليكم ورحمة الله وبركاته
    انا اشتريت نفس الاب توب ده امبارح بس لما سطبت النسخة النهارده وشغلت الاب توب شعرت بذبذبات بحس بيها لما بشغل الجهتز حتى الذبذبات ديه موجوده فى ظهر الشاشة هل ده عيب ولا ده طبيعى ارجو الافاده والرد السريع وشكرا جزيلا اخى العزيز

    • انت سايب سى دى فى الجهاز؟ – لو كدة شيلها واقفل وافتح الجهاز مش حيزن تانى
      الزنة دى فى الغالب من الدى فى دى لإنه من نوع صوته عالى جدا وبيهز اللاب والترابيزة اللى عليه بقوة
      وممكن تخش على البيوز bios وتخللى البوت يبدأ من الهارد مش من الدى فى دى
      للدخول على البيوز اضغط على F2 فى بداية تشغيل اللاب

      اما لو بعد كدة برضه فيه زنة رجع الجهاز واسترد فلوسك او بدله

        • شوفى هل يوجد فى السى دى نوعين من البلوتوث داخل مجلد البلوتوث – لو قيتى اكثر من نوع جربى الانواع التانية وشوفى حيقبل وللا لأ – أما لو نوع واحد يبقى اللاب توب بتاعك مافيهوش بلوتوث – وممكن تأكدى لو عندك كرتونة اللاب توب – حتلاقى على الجنب مواصفاته
          لو معندكيش ماتزعليش – تقدرى تشترى بلوتوث صغيرة اصغر من عقلة صباعك سعرها حوالى 10ج ويمكن تلاقى ارخص – امشاهدة صورتها اضغطى هنا او هنا

          • ميرسي جدااا….بس لابي زمان كان فيه بلوثوث وكنت بقدر استعملو عادي..وبعد ماعملت فرمتة للجهاز مبقاش ف بلوتوث.

  2. انا اشتريت واحد نفسه بالظبط وقعد معايا بالظبط 3 اسابيع وبعد كده ظهرلي مشكلة البطارية ان البطارية مش بتشحن اكثر من 60% ورجعته الضمان تاني واتصلو عليا وقالولي ان البورده محروقه ومش موجود له قطع غيار وهيستدبلوه بواحد تاني بس انا خايف استبدله تطلع المشكله دي في الموديل ده نفسه أرجو الافادة

        • طيب حاولى الخطوات التالية: اضغطى على Start وبعدين دوسى يمين على Computer واختارى Properties
          وبعدين من القائمة الشمال دوسى على Device manager
          وافتحى Network Adapters لو لقيتى بلوتوث دوسى عليه وبعدين دوسى فوق على Driver وبعدين دوسى على Update driver
          واختارى Search automatically وتكونى متصلة بالنت عشان حيبحث لك عن الدرايفر المناسب ويجيبه من على النت
          اما لو مالقيتيش بلوتوث يبقى حتلاقى حاجة تحت Other devises قولى لى اسمها ايه

          • سلام عليكم ياعمو محمد انا عملت الخطوات اللى قولتلى عليها بس مطلعليش بلوتوث ف الجهاز وبالنسبة ل other devices لما بدوس عليه طلعلى unknown device وشكرا …

    • You must install Intel energy management and keep sure you selected this option “Optimised Battery Health” not this option “Maximum Battery Life”, Hence; second option will charge your battery to only 60% and stop charging to keep the long life span for your battery. But the first option will charge the battery to 100%.

  3. الشحن الي 60 بالمائة ليست مشكلة بالبطارية ولا الجهاز لان هناك برنامج اسمة energy mangement بينزل مع التعريفات بيبقي موجود بجانب الساعة او شعار البطارية ماعليك الي الضغط علية ثم اختار battery setting وبعدين نختار battery fully -charged mode بدلا من battey protection mode لكي تشحن البطارية الي 100%

  4. انا اشتريت الجهاز من اسبوعين لاحظت فيه صوت غريب زى تكتكة الساعة بيطلع تقريبا كل خمس دقايق من النحية الشمال فيه بس مش من عند المروحة واستبدلته بواحد تانى بس ملاحظة فيه ان بيعلق منى كتير وبدأ يعمل صوت شبيه بالى كان فالاولانى ياترى دى حاجة عادية فالموديل دا ولا ايه عشان قبل اما اروح استبدل دا كمان ياريت حد يفيدنى

  5. أنا عندي لاب توب LONOVO G550 ..بعد إغلاق الجهاز يبقى ضوء”لمبة” التشغيل ” مرة تشتعل ومرة تنطفئ” حتى أقوم بالضغط مطولاً على زر التشغيل الذي نستعمله في البداية لتشغيل اللاب توب..ما الحل من فضلكم.؟

    • فعلا عندك مخرج واحد وهو للاثنين معا – الهيدفون والمايك – ابحث فى السوق عن هيدفون بمايك لهم جاك واحد – زى سماعة البلاك بيرى وغيره – انت محتاج واحد من النوع دة
      او لو عايز توصل مايك فقط يبقى لازم تشترى ادابتور مثل اللى فى الصورة دى:

    • السلام عليكم عندى جهاز lenovo g560 نزلت نسخة ويندوز سفن 32 بيت كل التعريفات موجودة وبيشتغل عادى وبعدين مرة وحدة الصوت يروح يختفى بس كل حاجة عن الصوت تمام وظاهر الميكرفون على الشاشة شغال بس مفيش صوت . ونزلت ويندوز من الاول نفس النظام . ارجو الافادة

        • شكرا اولا على الاهتمام والرد . بس هو فعلا السماعة اللى بتقول عليها موجودة . هو حضرتك بكون بشوف فيديو عادى والصوت شغال وفجأة الصوت يختفى من الجهاز . مش التعريف . الصوت واروح اشوف الصوت فى كل حتة تمام لازم اعمل ريستارت علشان يرجع الصوت . وممكن الصوت يختفى بعد دقيقة تانى . واعيد الموضوع . ارجو الافادة . وشكرررررررررررا

          • لو الصوت شغال ماعدا الفيديو يبقى المشكلة غالبا فى برنامج تشغيل الفيديو – جرب برنامج تانى مثل KMPlayer او VLC
            ولو تقصد يوتيوب دى مشكلة متكررة – اعمل ريفريش للصفحة حتلاقى الصوت اشتغل

          • جربت برضو وشغلت على مشغل ميديا غيرو نفس النظام الصوت شغال وكله سليم بس مش موجود . انا اقصد اى فيديو مش تحت شرط يوتيوب لا وانا بسمع اغانى او افلام يا دوب ثوانى .لسة حالا مع رسالتك حصلت والميكسر شغال مع الصوت ومفيش صوت وعملت تحديث للصوت .برضو نفس المشكلة . يا ريت لو فى حل . وشكررررا جزيلا . الموضوع بجد مضايقنى

          • هل لو وطيت الصوت ما بيقطعش؟ هل لو سمعت من خلال هيدفون الصوت شغال؟
            عموما لو الصوت بيقطع بعد ثوانى يبقى محتاج صيانة ممكن تكون وصلات السماعات محتاجة تتثبت كويس

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *