مقارنة بين تى اى داتا ولينك دوت نت TeData vs Orange DSL comparison

عروض كل من شركة تى داتا وشركة لينك (اورنج) متقاربة ودايما يكونوا فى نفس المواعيد تقريبا كل سنة – وهى عروض الهدف منها جذب مشتركين جدد فقط – وينسون المشتركين القدامى وكأنهم لا يهمهم الحفاظ عليهم – كلا الشركتين وقت العروض بيقدموا زى بعض 6 شهور بتخفيض 50% زائد راوتر مجانى هدية

راوتر لينك الهدية بيكون ماركة  D-Link موديل DSL-2739U

أما شركة تى داتا الراوتر الهدية اللى بتقدمه للعملاء الجدد راوتر ماركة Huawei H5320n

HG532n-big

كلا الراوترين فيهم واى فاى وايرليس وفيهم 4 مخارج سلكية – لكن راوتر تى داتا افضل قليلاً فى الواى فاى فهو يغطى مساحة اكبر

وبالمقارنة بين سرعة الشركتين ستلاحظ أنهم متقاربتين – إشتراك 512 ك.ب يعطيك سرعة تنزيل فعلية من 50 الى 55 ك.ب فى الثانية – واشتراك 1 ميجا يعطيك سرعة داونلود فى حدود 100 – 110 ك.ب فى الثانية تقريباً

عند الإشتراك لأول مرة الشركتين بيبعتولك مندوب يحصل منك قيمة اشتراك أول شهر – وشركة لينك بتبعت لك كمان العقد لتوقعه فى البيت – اما تى داتا فلازم تروح لأحد فروعهم للتعاقد

شركة تى داتا بتوصل لك السرعة التى دفعت ثمنها بالظبط -بينما ستجد أن السرعة التى تحصل عليها فى لينك دائماً ما تكون أكثر من السرعة التى دفعت ثمنها – فمثلاً عندما تدفع سرعة 512/128 ستحصل على 587/285 أى زيادة  15% فى سرعة التنزيل وزيادة أكثر من الضعف (123% بالضبط) فى سرعة الرفع!

كل من الشركتين لا يطبقون سياسة الاستخدام العادل بالنسبة للاشتراكات الغير محدودة – بمعنى ان المشتركين الجدد والقدامى يتمتعون بميجات غير محدودة

نصيحتى اذا كنت مستخدم كثيف للنت انك تشترك Unlimited – وتبعد عن النظم الجديدة مثل طلقة واوبتيموم وغيرها – فكلها انظمة محدودة وبياخدوا منك فلوس اضافية – سبوبة يعنى عشان يستنزفوا فلوس الناس اللى مش فاهمة ويستغلوهم

لمزيد من الاستفسارات:

شركة تى داتا: ت 19777

شركة لينك: ت 16333

ملحوظة: كتبت لكم ايضا تجربتى مع smart ADSL اللى بتقدمه شركة اتصالات

73 تعليق

    • كلامك حقيقى 100% فعلا شركة لينك بتديلك سعر اكبر من اللى انتة مشترك فيها فبالتالى بتكون احسن من تى اى داتا وبصراحة شركة محترمة جدا وفى عروض بتنزلها للعملاء الحاليين غير تى اى داتا صيت على الفاضى وكمان الضغط فى لينك قليل ومفيهاش مشاكل زى تى اى داتا بس خلاص الواحد اضطر انة يشترك فى تى اى داتا بسبب الكابلات الزفت الفايبر والنت بيقطع فى تى اى داتا انا كنت بقالى سنة مع لينك عمرى ماشتكيت منها خالص غير تى اى داتا بتقطع النت تبقى الافضلية لشركة لينك ولو شركة لينك حصلت على رخصة عمل شركة اتصالات ليها انا هلغى اشراكى فى تى اى داتا وهشترك مع لينك لانها شركة منظمة جدا والموقع بتاعها منظم جدا

    • وليه محتفظ باشتراك لينك طيب؟ ما تلغيه وتعمل الخطين تى اى داتا مادام احسن من لينك
      المهم اللى شغال معاك افضل – وتجربتى مع الشركتين انا كتبتها يمكن تفيد آخرين – ولم اتوقع اتهامات بالتشكيك فى النوايا بصراحة – لو تفرغنا للتشكيك حنفضل محلك سر – فى الدنيا كلها المستخدمين بيكتبوا تجاربهم عشان يفيدوا الآخرين – ليه احنا كدة ودايما شكاكين مش عارف
      لو عايز تفيدنا اكتب مقارنة تفصيلية من فضلك – نعرف من خلالها تى اى داتا احسن فى ايه بالظبط

  1. أنا اشتركت مع الشركتين وطبعا لينك أرقى بمرااااااااااااحل ،،، وبجد انا ئرفت من تى اى داتا دى وبالذات العم الفنى بنى ادمين ما بيفهموش وفعلا الخدة كانت بتنقطع كتير والسرعة دايما مذبذبة

    هائولها نصيحة واجرى على الله ،، وان شاء الله حد بردو يئول انى شغال فى تسويق لينك هههههه

    لو انتا هاتشترك جديد ريح بالك واختار لينك من غير تفكير

    ياراجل كفاية فترة السماح بعد ميعاد تسديدك اللى ممكن توصل 15 يوم

    تى اى داتا كانت بتدينى يومين على الاكثر

  2. لينك دوت نت فاقدين للمصداقية غير ملتزمين بالعقد المبرم مع العميل نصيحتي لاي شخص احذر ان تكون عميل لشركة لينك دوت نت مصر متعاقد معهم بسرعة 2 ميجا ويفترض التحميل سرعته 256 ك ب ث . السرعة للتحميل لدي 64 ك . يعني شركة نصابةوالله على ما اقول شهيد . كذلك يستفيد من عروضهم بنسبة 90 % العميل الجديد اما العميل الحالي لا

    • على كل الامور الاثنين نصبين على الاقل انا الان مشترك فى تى داتا دفعت الاشتراك قبل التجيد 27/9/2014 والخدمة توقفت فى 29/9/2014 وبعد معنا مع الدعم الفنى اكثر من 13 يوم جاى يقولى العيب عندك فى الخط للعلم انة فى اليوم 14 بعد التوقف الخدمة اشتغلت لوحدها يبقى ايو زنب الخط لاالارضى ولما هما بيهتمو بى العميل الجديد يبقى انا كمان اهتم بى الشركة اى تقدم لى عروض افضل وخدمة ممتازة ودة اللى انا لقيتة فى دى لينك

  3. السلام عليكم ..
    طيب احنا دلوقتي في 2014 وانا لحد دلوقتي مش عارف انهي افضل لينك او تي اي داتا او فودافون او اتصالات او انترنت مصر ملقيتش اجماع على حاجة واحدة كل الكلام متناقض دة يقولي حاجة على لينك كويسة والتاني يقولي لا دي وحشة ويقول على تي اي يداتا وواحد تالت يقول لا لا دي ولا دي حلوين وبصراحة دخت انا عايز من الاخر عشان اخد قرار نهائي لو حبيت اشترك في احدى الشركات ياريت الافادة بسرعة وبضمير وبمعلومات يقينية دون اي دعاية او اي انحياز الشركات دي مش ولاد اختنا يعني اكيد ولا حد مننا ليه علاقة بيها فياريت الضمير في الاجابة عشان الدوخة بس والواحد يسيب شركة ويروح للتانية وزهق وملل ودوخة اكيد .. شــــكـــراً

    • انت محسسنى انك حتختار شريك حياتك مش خدمة انترنت – جرب بنفسك وياريت تقول لنا النتيجة – ومن اسهل مايمكن التنقل بين الشركات – محدش حيحبسك عنده – انا عن نفسى جربت تى اى داتا ولينك فقط – ولقيت ان لينك افضل من تى اى داتا فى السرعة والثبات لكن اوحش فى الحسابات والمعاملة – لو اشتركت فى اى عرض غالبا حتتسرق ويدفعوك فلوس بلا وجه حق – اما تى اى داتا فهم حقانيين ولا يحاسبوك على مليم زيادة بس السرعة اقل شوية وساعات تبقى بسرعة السلحفاة وساعات تبقى سريعة – فلو عايز سرعة وثبات افضل اشترك فى لينك بس ابعد عن عروضهم خاااااااااااااالص
      ولا تشترك فى اى نظام غير السرعة الغير محدودة – باقى الانظمة عبارة عن طرق للتحايل على العملاء وتغريمهم فلوس اكتر – واعتقد مفيش شركة بتديلك ميجات غير محدودة بجد غير تى اى داتا ولينك فقط – الباقيين بيطبقوا سياسة الاستخدام العادل!!!

      • انا مجرب الدي سي ال بصراحه ممتازه جدا وفيها مصداقيه بجد انا جربت اتصالات زباله في كل شي ولا تعطي العميل حقه وكمان فودافون دعايه في الاول تمام وبعد الاشتراك ب3 شهور انضمت للاتصالات في الخدمه الزفت انا انصحك تشترك في دي سي ال انا واصحابي جربنا كل الشركات مالاقيني احسن من دي سي ال هي الافضل وبتجيب من الاخر
        ويكفي انها مستقله بذاتها وبتاخذ اشتراكها مقدم وبتعطيكي فتره سماح للسداد 15 يوم والواحد ميجا لو عملت تيست عن طريق البرنامج المرفق مع اعلانها (دكتور لينك ) هتلاقي السرعه مظبوطه وبتزيد وغير مرتبطه بالشبكه والوافاي لواحده يسمح ب5 مشتركين وبه زرار يسمح لو حبيت تضيف كمان 10 مشتركين ويخفض من نسبة اشتراكك
        مافي تفاصيل اكثر الا لما تجرب وتاخذ بالك من وصلة الخط الارضي لان مابين بها السالب من الموجب احسن لك تجرب دي سي ال نصيحه من اخيك المصري

          • منكن تفدونى شباب بعد ازنكم يعني انا عاوز اوصل نت عندى تلفون هوائى و عاوز اوصل نت منو اشترك في تى داتا ولا في اي شركة تانيه و عاوز اعرف كلام الراجل دا مظبوط ولا لا يعني تي تى داتا بتدى اللوتر مجانا ولا انا الي بشترى اللوتر ارجو الرد سريع و شكرن

          • حضرتك لينك بتقدم لحضرتك اختيارين
            باقة سعة التحميل شهر (جنيه) 3 شهور (جنيه) سنة (جنيه)
            512 كيلوبت/ثانية
            غير محدودة
            47.5 142.5 665
            1 ميجابت/ثانية
            غير محدودة
            72.5 217.5 1,015
            2 ميجابت/ثانية
            غير محدودة
            115 345 1,610
            4 ميجابت/ثانية
            غير محدودة
            190 570 2,660

            DSL Plus

            باقة سعة التحميل شهر (جنيه) 3 شهور (جنيه) سنة (جنيه)
            4 ميجابت/ثانية
            15 جيجا
            50 150 700
            4 ميجابت/ثانية
            40 جيجا
            75 225 1,050
            8 ميجابت/ثانية
            200 جيجا
            199.5 598.5 2,793
            12 ميجابت/ثانية
            275 جيجا
            274.5 823.5 3,843
            16 ميجابت/ثانية
            350 جيجا
            349.5 1,048.5 4,893
            24 ميجابت/ثانية
            500 جيجا
            649.5 1,948.5 9,093

          • دى اسعار عرض مؤقت – وبعد كدة بتبقى الضعف
            لينك خلاص راحت عليها وبقت غير قادرة على منافسة تى اى داتا
            دة غير ان اجهزتهم مابتشتغلش مع كابلات الفايبر الجديدة

  4. أنا عايز أشترك فى خط تانى يا رجالة
    عندى خط حالى فى تى داتا ( 2 ميجا غير محدود )
    لكنى إكتشفت إن سيادتهم عاملين حد أقصى للتحميل للسرعات الغير محدودة شهريا ب ( 300 جيجا )

    و الشهر إللى فات إتصدمت إن يوم 31 تم تخفيض السرعة إلى 128 كيلو بايت لمدة 24 ساعة بحجة أن سوء الإستخدام قام بالتأثير على العملاء فى نفس السنترال الذى أتبع له .

    و بالتالى السرعة الغير محدودة فى تى داتا إشتغالة كبرى لأن سرعتك محدودة بحجم الخط و سعة تحميلك محدودة ب 300 جيجا مهما كانت سرعة الخط .
    و بالتالى بعد ما كنت ناوى أرفع سرعة الخط ل 4 ميجا لأن معى جيرانى ( حوالى 20 فرد ) رجعت فى كلامى لأن ال 300 جيجا هيخلصو فى أسبوعين بسرعة 4 ميجا .

    عشان كده أنا طالب نصيحتكم لأنى ناوى أشترك فى تى لينك لكن مقلق من كتر ما بسمع عن مشاكلها خصوصا سرعة التحميل .

    • اول مرة اسمع ان تى داتا بتعمل حد اقصى للسرعات الغير محدودة – لكن بعد تعليقك وللتأكد اتصلت بنفسى بخدمة العملاء دلوقتى واكدوا لى ان السرعات الغير محدودة لا يطبق عليها اى حد اقصى فى جميع سنترالات مصر
      وبالنسبة لشركة لينك فتجربتى معاهم انهم اكثر سرعة واكثر ثبات – بس حرامية لو اشتركت معاهم فى اى عروض حتتسرق لشهور طويلة بعد العرض ويعملوا لك فواتير صاروخية باسعار وهمية – فلو اشتركت معاهم لا تشترك فى اى عرض من عروضهم ابدا

    • انا اتصلت لك وعرفت منهم ان خطوط التليفونات فى هضبة الاهرام – حدائق الاهرام خطوط فايبر – كابلات ارضية فايبر – وهما لسه لم يركبوا اجهزة لخطوط الفايبر – بيركبوا لخطوط النحاس فقط حاليا – وانتوا معندكوش خطوط نحاس – كلم 16333 وبلغهم برقم تليفونك وهما حيبلغوك اول مايبدأوا يخدموا خطوط الفايبر

  5. معلش انا ليا رأي في الموضوع دا شركة تي اي داتا من اقوي الشبكات في الانترنت مقارنة بشركةلينك اللي اصبحت دلوقتي في النازل خالص ومبيعاتها بتقل جداً وعدد مشتركينها بيقل عن الأول بسبب خدمة النت البطيئة والمنعدمه احياناً وبسبب سوء خدمة العملاء في استقبال شكاوي المشتركين واستفساراتهم وده طبعا اللى بيخلي الشركة دي في النازل واحب اقول ان شركة تي اي داتا من واقع تجربتي معاها انها شركة تغطيتها كبيرة جداً جداً في مجال الانترنت وزيادة كفائته وسرعته وتوصيل السرعة المطلوبة بدون زيادة او نقصان …. واترك للجميع القرار في اختيار الشركة اللي تناسب احتياجاتهم وانا حبيت اقول بس من باب المعرفة مش اكتر

    • انا اوافقك على هذا الرأى – فعلا شركة تى اى داتا حاليا بقت افضل من لينك لاسباب كتير – اهمها ان تى اى داتا الاشتراكات اللى بلا حدود unlimited فعلا بلا حدود – بينما لينك والشركات التانية كلها فعلت سياسة الاستخدام العادل – الى هو 20 جيج فقط فى الشهر لسرعة 512
      وكمان لينك حساباتهم بتيقى غلط ولو اشتركت فى اى عرض من عروضهم حيحسبوا عليك فى المستقبل فلوس لا حصر لها – اما تى اى داتا فمش بياخدوا منك مليم زيادة ابدا ابدا – وفعلا خدمة عملاء لينك بقوا زبالة بمعنى الكلمة

  6. انا مجرب لينك ومجرب تى اى داتا
    انا ندمت انى سبت شركة تى اى داتا
    والله ان لينك نصبو عليا واشتكيت فى الجهاز القومى لتنظيم الأتصالات
    وموظفين خدمة العملاء فى لينك كانو يلطعونى عالتليفون بالنص ساعة يسمعونى اغانى
    اضافة الى ان خدمة النت من لينك زبالة
    يعنى باختصار لينك دى ازبل شركة بالعالم

    • فعلا لينك بقت وحشة جدا – وهما معروفين بالنصب – السيستم بتاعهم اصلا متصمم بحيث ينصب اوتوماتيك على المشتركين – مش عارف ازاى متسابين يعملوا كدة فى الناس – وخدمة العملاء متعجرفين ولو مش مبسوطين منك يعاقبوك بالانتظار على الخط لما لا نهاية – دة غير انهم دلوقتى بيحددوا الميجات للسرعات الغير محدودة بالمخالفة للقانون
      لينك دى مفروض تقفل بقى – معظم الناس بيسيبوها اليومين دول

    • والة الاتنين ازبل من بعض يا جماعة احنا فى مصر بنتسرق عينى عينك فى السرعات يعنى بسبب زيادة اعداد المشتركين ساءت الخدمة ومبقتش السرعة بتوصل لك زى مانت متعاقد غير البطئ الملحوظ وانخفاض السرعة اليومى لحد مابقت العملية بتزهق حسبى اللة ونعمة الوكيل

  7. ياجماعة انا اشتراكت في لينك حوالي 10شهور وهتكلم عن كل حاجة في خلال فترة اشتراكي في الشركة علشان تعرفوا
    اول اشتراكي دخلت في عرض عملاه الشركة خصم 50 في المية لمدة 10 شهور
    اول شهر النت كان ممتاز
    وتاني شهر وتالت شهر النت كان بيهنج من الساعة 12 الصباح لحد الساعة 6 المغرب واحيانا لساعة 9 وكنت بكلم الشركة يرد عليا بعد انتظار نص ساعة علي التليفون يقولي السنترال عليه ضغط ومرة يقولي سيب الداونلود شغال لمدة ساعتين وحنا هنعمل كشف علي الخط واقولك العيب فين وكنت بنتظر الساعتين واكلمهم تاني كان يرد عليا واحد تاني ويقولي حجة تانية
    تعالو في شهر اربعة وخمسة النت طول النهار شغل بسرعة 2 ميجا بايت وباليل 4 ميجا بايت للعلم انا كنت مشترك في سرعة 4 ميجا بايت وشهر6و7و8 النت فيهم كان تمام ماكنش في اي مشكلة خالص وحمل وشاهده زي مانتا عايز
    وفي شهر 9و10 الشركة طبقت سياسة الاستخدام العادل والنت عندي بعد 15 يوم بينزل 256
    وللي مش عارف اي هي حشرحها
    الاول الواحد كان يقعد علي النت يحمل افلام واي حاجة هو عاوزها دلوقتي لا
    طب ليه؟ عشان الشركة حددت سعة تحميل للمشتركين عندها حتي علي المشتركين في السرعات الغير محددة زي انا بحد اقصي 80 جيجا بايت علي سرعة4 ميجا الغير محددة
    و60 جيجا بايت علي سرعة2 ميجا الغير محددة
    40 جيجا بايت علي سرعة1 ميجا
    و25 جيجا بايت علي سرعة 512
    يعني السعة بتاعك لما تخلص تنخفض سرعة النت ل 256 والحكاية دي معايا في شهر 9 و10 سنة 2014
    وانا هنهي الاشتراك معهم في 10/10/2014 وهشترك في تي داتا لانها لغت سياسة الاسنخدام العادل عندها وانا لسا مكلم شركة تي داتا النهاردة بتاريخ 7/10/2014 وتاكدت منها وعلي فكرة لو مطبقه هيبقي 300 جيجايايت كدا احسن من لينك واتصالات وفودافون
    انا باشارك بتجربتي علشان افديكم
    دمتم في امان الله والسلام عليكم

    • وعليكم السلام – الف شكر على مشاركتك اللى بالتاكيد حتكون مفيدة لناس كتير من عملاء لينك او اللى بيفكروا يشتركوا فى لينك
      اللى انا مستغرب منه هو ازاى جهاز تنظيم الاتصالات سايب لينك تعمل بمزاجها قوانينها وشروطها الخاصة – والمسئول عن الاتصالات سالوه فى التليفزيون فنصح المشتركين بمنتهى البساطة يتصلوا ويقدموا شكاوى – هو احنا عندنا 100 شركة تايهين فيهم – دول 3 شركات عمى معقولة منتظرين العملاء هما اللى يبلغوا ويعملوا لهم شغلهم؟؟!! فين الرقابة والمتابعة؟

      شهادة حق بس حاقولها – شركة تى داتا صحيح مش نصابة ولا بتسرق العملا زى لينك – لكن سرعة النت عندهم غير ثابتة – ايام تكون سرعة جميلة رهوان – وايام تانية تكون بطيئة كالسلحفاه أو ربما أقل – لدرجة تشلك – والبطء دة ممكن يستمر ايام ويمكن حتى اسبوع او اكتر – وبعدين يرجع تانى سريع – البطء بيكون 24 ساعة يوميا مش بس اوقات الذروة – ودى أوحش حجة فى تى داتا

    • قسما بالله يا استاذ احمد يحيي كلامك صح 100% انا مشترك في شركة لينك من سنة واربع شهور ، والله شفت المر معاهم ، انا مشترك واحد ميجا لوحدي ، وانا بكتب الرسالة دلوقتي سرعة التحميل 25 كيلو بايت في الثانية بقالي حوالي اربعة ايام على كده ، وبالنسبة اخويا مشترك في شركة دي داتا والله السرعة معاه ممتازة ، وان شاء الله ده اخر شهر ليا مع شركة لينك

    • على فكرة اقسم بالله كل كلمة قلتها صحيحة انا كنت ف لينك سنتين و خرجت منها بسبب اللي انت بتقوله دة و اشتركت ف تي اي داتا وربنا يستر بقى مش عارف اية اللي هيحصل بعد اول شهر الللي لحد دلوقتي ماشي فوق الممتاز الحمد لله

  8. انا مشترك فى تى اى داتا من حوالى 5 سنين ولما اشتركت معاهم اياميها مكنش فى راوتر مجانى وكده زى دلوقتى وانا دلوقتى الراوتر بتاعى قدم وعايز اغيره والشركه بتقولى ادفع 250ج علشان نجبلك راوتر جديد وانا شايف ان العملا الجدد بياخدو ببلاش طب انا يا جماعه اعمل ايه واللى شايف حل يقولى عليه والله انا مشترك فى سرعه 1 ميجا وعندى 250جيجا استخدام عادل واللى عايز اثبتله مستعد اديلو صوره معدل التحميل بتاعى من الموقع نفسه وفى الحد الاقصى 250 جيجا بس بفكر الغى اشتراكى معاهم واروح فودافون بيقولو سرعتها كويسه والدعم الفنى بتاعهم ممتاز بس عيبهم الوحيد انهم بيطبقو سياسه الاستخدام العادل حد ينصحنى اعمل ايه دلوقتى

    • كل الشركات للأسف تفضل العميل الجديد وتهمل القديم – العروض والتخفسضات والراوترات المجانية كل حاجة للعميل الجديد وكإنهم استعبدونا – والحل بسيط – الغى معاهم واشترك فى أى شركة تانية – وبعدين ارجع لهم تانى مع أول عرض جديد – حيدولك راوتر جديد وحتستمتع بخصم 50% لمدة ست شهور – بس توقع فترة قد تصل لشهر بدون نت هى وقت الانتقال من شركة للثانية – خلالها ممكن تستخدم فلاشة نت يواس بى مؤقتا
      بس نصيحتى تى اى داتا هى الافضل حاليا لان موبينيل بقت تطبق سياسة الاستخدام العادل اظن 60 جيجا فقط لسرعة 1 ميجا – اما تى اى داتا فهى غير محدودة بالفعل – فودافون واتصالات برضه بتطبق سياسة الاستخدام العادل – فنصيحتى لك كما قلت اطلع من تى داتا شهر وللا اتنين وبعدين اقتنص اى عرض وارجع تانى حيعاملوك ملك – سبحان الله!
      وعلى فكرة غالبا لما تلغى معاهم حتلاقى مكالمة من خدمة العملاء بيتصلوا ويسألوك ليه عايز تسيبهم – قل لهم عشان فيه عرض من شركة كذا بتقدم راوتر هدية وخصم – بس يكون عرض بجد مش تاليف – ساعتها حيعرضوا عليك يدوك نفس المزايا بس تفضل معاهم – فتوافق طبعا بدل اللفة الكبيرة

  9. طيب تمام بس اذا لغيت من عندهم ومدونيش اى عرض انا بفكر اروح لفودافون حضرتك تنصحنى بشركه تانيه ولا اروح لشركه فودافون مع العلم ان استخدامى مش كتير يعنى للنت يعنى مش هعدى ال 40 جيجا تنصحنى اروح فودافون ولا فى من فودافون

    • لينك زبالة عشان بتطق الاستخدام العادل انا لسه عامل كانسل من اسبوعين من لينك
      استخدام العادل في لينك :-
      512=50 gb
      1=100 GB
      2=200 GB
      وكذا يعني فكك منهم عشان نصابين وتي داتا برضو زبالة بس بنسبة ليا افضل عشان الاستخدام العادل

  10. والله انت عسل حج محمد انا مشترك فى فودافون للمره التانيه المره الاولى كان من حوالى 3 سنوات كانت اكثر من رائعه بصراحه لم اجد مشكله واحد فى اى شئ ولا سرعه ولا نصب ولا فلوس ولا اى شئ من الكلام ده بس اشتركت فيها من حوالى 8 شهور و من ساعتها النت لاما يفصل لاما بطئ بشكل مستفز لاما يجيبلك علامة تعجب بشكل مستمر و جربت كل الطرق من اول الرواتر و سلك الانترنت لبرامج و التصليح السوفت وير اليدوى من على الانترنت الشئ الوحيد اللى ما عملتوش ما اتصلتش بخدمة العملاء لانى مش عارف اوصل لرقمهم بتاع ال adsl و كمان انا خط موبايله اتصالات و مش فاضى اروحلهم ربنا ييسر بقى لو حد عند رقم يبقى الله يباركله 🙂

    • للاسف حاولت اجيب لك رقم الدعم الفنى لفودافون دى اس ال فلم اجد أى رقم على موقعهم
      يوجد فقط فورمة وتشات ورقم موبايل من خط فودافون فقط- والاتنين مخصصين لعملاء ،فودافون
      وطبعا لو النت قاطع تبقى طرق الاتصال السابقة عديمة الفائدة
      اعتقد ان عدم وجود ارقام تليفونات للاتصال المباشر بالدعم الفنى سبب كافى للبحث عن شركة اخرى
      يبدو انك طيب زيادة عن اللزوم وبتدفع وخلاص
      لازم تدى فلوسك للى بيقدم لك خدمة – مش للى عايز ياخد فلوسك وخلاص

  11. والله انا بقالى 10 شهور متعاقد مع تى اى داتا ع جهازى بس بسرعه 1 ميجا ربنا مايوريكم الفضايح ولم يكون عندى ضيف بديق انو يستخدم الواى فاى او يقولى نتفرج ع فيلم كسوف كسوف كسوف ولما تيجى تكلم بتوع الدعم الفنى وهما اصلا مايعرفوش حاجه يقولولك العيب فى اجهزتنا فى السنترال وبالنسبه لليل من بدايه الساعه 6 مساء بقفل الجهاز علشان عارف اللى هيجرالى طغطى يرتفع ومابعرفش اعمل حاجه احسنلى انام وللعلم لما كنت مشترك جديد النت كان معايا صاروح اه والله والبينج عندى كان مظبوط لكن دلوقتى انا ناوى والنيه لله افصل منهم بس بعد شهرين علشان التعاقد النصاب يلزمك سنه من العذاب او تدفع حق روتر تمنه 50 جنيه وتدفع 250 جنيه ظلم وفاكر لما كنت مشترك مع لينك فى شبكه جامعيه كان زى الفل والله العظيم حسبى الله ونعم الوكيل الدونلود عندى لا اخر الشهر مابيعديش 40 جيجا وبدفع قبل مالشهر يهل عليا ب 6 ايام فورى ولو اتاخرت عليهم بيفصلوا عليك بعد يومين وحقهم بياخدوه ع داير مليم منهم لله الظبمه الكدبيين اللى تكلمهم يقولولك تابعنا بعد اسبوعيين لما السنه خلصت .. وهنشتكى فين ماتبع المصريه للاتصالات الحرميه .

  12. فودافون شركه كاذبه ولا تلتزم بالسرعه المحدده انا سيبتهم واشتركت فى لينك زى ما الناس قالت لغايه ما العرض ينتهى وهاسيبهم لان ده للاسف اللى موجود فى مصر العميل الجديد بيعملوه كويس لكن الناس القديمه بتتنسى

    • شركه تى اى داتا حسبى الله ونعما الوكيل فيه شركه زباله زباله زباله انا عن نفسى مشترك فى 1 ميجا والسرعه من بعد الساعه 2 العصر زباله زباله زبــــــــــــــــــــــــاله معا العلم انى ما بحملش حاجه انا جايب السرعه علشان لعبه اون لاين وانا زقت من الشركه ديه ونفسى اولع فيه بجاز اوسخ من الوساخه ومش عارف اروح انهى شركه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *