لا تشتروا ديتول – الماء والصابون افضل

اسعار الديتول بقت نار – لكن مش دى المشكلة – المشكلة ان التنظيف بالماء والصابون افضل صحياً من التنظيف بالديتول

وانا في السوبر ماركت النهاردة ، تحديدا في قسم المنظفات ، لقيت بتاع كدة سعره ميتعداش 3 جنيه ونص ، وصل سعره ل 150 جنيه 😃 ا…

Posted by Fatema Gharib on Thursday, April 20, 2017

 

وانا في السوبر ماركت النهاردة ، تحديدا في قسم المنظفات ، لقيت بتاع كدة سعره ميتعداش 3 جنيه ونص ، وصل سعره ل 150 جنيه 😃 البتاع دة اسمه ديتول 😒 طبعا كل الناس شايفة ديتول دة حاجة واااااو جدا وبيقضي على 99.9% من الجراثيم وجو الإعلانات دة 😂 بس أحب اصدمكوا وأقول ان الديتول دة حاجة كدة ملهاش أي تلاتين لازمة 😒

– أولا كدة ايه اللي بيميز الديتول دة عن أي منظف تاني .. ايه سبب ال وااااااو يعني ؟ 😂

السبب هو مركب اسمه triclosan أو TCS تم اكتشافه في سويسرا .. مركب مضاد للبكتيريا كانوا بيستخدموه في السبعينيات كمبيد حشري ، ومن أول 2014 حتى الآن دخل في صناعة أكثر من 2000 منتج من منتجات العناية الشخصية .

طب البتاع دة بيقتل البكتيريا ازاي ؟؟ 😃

المركب دة بيقاوم البكتيريا أكنه مضاد حيوي بالظبط .. يدخل على الميكروب من دول يهاجم السيتوبلازم بتاعه ويمنع إنزيم ENR انه ينتج الحمض النووي الخاص بتكاثر البكتيريا دي.
بس معلش يعني البكتيريا مش هبلة برضو 😃 دي ربنا ادالها القدرة انها تطور من ال DNA بتاعها عشان تقدر تقاوم ال TCS او المضادات الحيوية فجسمها ينحس 😂

يعني الناس اللي عندها هوس بالديتول ومشتقاته ، ودايما عندهم وسواس نضافة مبني على جهل ، بيعملوا مصيبة وهما مش حاسين 😃
مثلا واحدة مسحت البيت النهاردة بديتول ، وغسلت المواعين بديتول ، وحمت ولادها بديتول ، هي كدة ضميرها مرتاح وفاكرة انها حامي الحمى اللي قضى على البكتيريا من البيت ، ابسلوتلي اقسم بالله 😃 ، دي ممكن تلاقي البكتيريا دي اتحولت لتنانين مجنحة لا نافع معاها مضادات حيوية ولا نيلة 😂وتتفاجئ ولادها بيتعبوا كتير ليه 😒

غير انه بيخلي البكتيريا تقاوم المضادات الحيوية ، كمان من أخطار ال TCS دة ، انه ممكن يأثر على الغدد الصماء فيعمل إضطرابات هرمونية ويعمل خلل في أجهزة الجسم فيتسبب في أورام سرطانية لا قدر الله ، كمان ممكن يعمل إعاقة في عمل العضلات ويأثر على إنقباضها ، دة الأدهى والأمر بقا ، انه بيقتل البكتيريا النافعة اللي ربنا خلقها في جسمنا كمضاد حيوي طبيعي وتعتبر أصلا دعامة الجهاز المناعي ، فممكن الطفل أو الشخص البالغ يصاب بحساسية وإلتهابات جلدية شديدة بسبب الديتول اللي بيقتل حيوية الجلد 😃

مؤخرا ، منظمة الغذاء والدواء FDA أجبرت الشركات اللي بتستخدم المركب دة ومنهم شركة ديتول انها تثبت فعالية منتجاتها بتجارب علمية ، بس الشركات دي للأسف فشلت 😃فقررت المنظمة انها تمنع استخدام ال TCS في منتجات العناية الشخصية وادتهم مهلة لحد سبتمبر 2017 .

غير كدة ان بكتيريا السودوموناس اللي كلنا بنترعب منها ، بتشرب الديتول دة أكنه بيبسي 😂😂

طب هنضف البيت ازاي يعني ؟؟ 😒

بالكلور والله العظيم 😂 الكلور آمن جدا على الأسطح والأرضيات ، بس اوعي تغسلي بيه الحلل والمواعين 😒 أقولك المفاجأة بقا 😄 البيت مش محتاج تعقيم أصلا 😂 انت هتبقي كدة خدمتي العلماء والبشرية كلها وولادك كمان  استخدمي الكلور في تطهير التواليت وكدة تبقي عظمة على عظمة جدااا 😄 وامسحي الأرضيات بالصابون العادي على الاقل ريحته أحلى من الديتول 😷 او الكلور يعني لو عايزة ترضي ضميرك😁

الصابون العادي ممكن برضو يقتل 99.9% من الجراثيم والله 😃 لو اتعلمنا نغسل ايدينا صح ، ونغسلها دقيقتين على الأقل ، كدة انت قتلت فيروس زي الإيدز وال HCV وال HAV وال HBV والسالمونيلا والإيكولاي بجلالة قدره 😁😁

لوحات التقطيع في المطبخ لازم تبقا ملساء ، زجاج يعني ولا خشب ولا بلاستيك  وفصلي لوح تقطيع اللحوم عن لوح الخضراوات والفاكهة 😁

استخدام اي مضاد للبكتيريا سواء على الجلد مباشرة او في الغسالات او الاسطح يبقا في حالة وجود مرض معدي في افراد الأسرة فقططط وإلا هتسببوا لنفسكوا حساسية وإلاتهابات وضعف في المناعة وكمان استخدامها يبقا تحت إشراف الطبيب 😁

الغسيل يتعرض للشمس أحسن ألف مرة من الديتول 😁
بلاش وايبس مضاد للبكتيريا ، الأفضل منه جل فيه كحول وبس 😁
تطهير الجروح يبقا بالبيتادين مش بالديتول ولا الكحول 😁

متشتيريش أي حاجة مكتوب عليها antibacterial 😃
متشتيريش أي حاجة مكتوب عليها antibacterial 😃
متشتيريش أي حاجة مكتوب عليها antibacterial😃

يارب أكون أفادتكم 

تحديث :
الناس اللي بتسأل على مصدر

https://www.washingtonpost.com/amphtml/news/to-your-health/wp/2016/09/02/fda-bans-some-antibacterial-soaps-and-body-washes/

http://www.medicaldaily.com/why-fda-banned-anti-bacterial-soap-what-use-instead-396956

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *