شيش طاووق اقتصادى موفر

اسعار الشيش طاووق المشوى جاهز بقت نار – الكيلو ب170ج – عشان كدة قررت ابتكر طريقة لطيفة لعمل شيش طاووق موفرة واقتصادية

اولا بدل ما نشترى شيش طاووق من الفرارجى حنوفر ونشترى فرخة صحيحة – الفراخ البرازيلى والاوكرانى فى مجمعات النيل / فاميلى ماركت وعربيات الجيش الكيلو ب25ج فقط – لو خليناها من العظم حيتبقى عندنا 78.5% من وزنها لحم صدور ووراك – يعنى الكيلو مخلى حيقف ب32ج فقط – فى حين الصدور الفيليه عند الفرارجى ب65ج والشيش ب60ج

حتسألوا طب ازاى نخلى الفراخ ؟ دة حاجة سهلة قوى – حنقطعها 4 ارباع ونسلقها سلق خفيف – ربع ساعة فقط – دة له 3 فوائد – اولا حيبقى سهل جدا لما تبرد اننا نخليها بدون اى مشاكل – ثانيا حتبقى استوت نصف سوا وبالتالى لما نشويها حتبقى طرية زى الملبن بتدوب فى الفم – ثالثا حيبقى عندنا بهريز طعم جدا نقدر نستفيد منه فى حاجات كتير بدل ما نفقد البهريز اللى بينز اثناء الشوى ويتحرق من غير ولا فايدة

المقادير

  • فرخة بأى حجم
  • 3 معالق خل
  • معلقة زيت
  • بصلة
  • فلفلاية رومى
  • قرن فلفل حامى
  • معلقة صلصة او طماطماية
  • نصف معلقة صغيرة روزمارى مطحون
  • 5 ورقات لورا
  • 2 معلقة صغيرة ملح
  • معلقة صغيرة ملح صينى

لاسياخ الشوى :

  • حلقات طماطم وبصل وفلفل رومى

الطريقة

  • فى اليوم السابق للشوى نغسل الفرخة ونقطعها 4 ارباع
  • نقلبها فى حلة مع باقى المقادير ونتركها فى الثلاجة ليلة
  • فى اليوم التالى نضع الحلة مغطاه على نار واطية خالص شمعة ونتركها نصف ساعة ونقلبها على ظهرها حتى تستوى نصف سو وليس سوا كامل
  • نخرج قطع الفراخ فى صينية ونتركها تبرد
  • نقصر البهريز المتبقى فى الحلة بان نتركه على النار بدون غطاء حتى يصبح تقيل
  • بعد الفرخة ماتبرد نخليها كلها من العظم والجلد – ثم نقطعها مكعبات
  • نقلب فى البهريز قطع الفراخ وحلقات بصل وفلفل رومى وطماطم عشان ياخدوا طعم الفراخ
  • نحضر اسياخ شوى ونغرز فيها بالترتيب حلقة بصل وحلقة طماطم وحلقة فلفل ثم مكعب فراخ ونكرر حتى يمتلئ السيخ
  • نحضر صينية مستطيلة ونبطنها بورق فويل او طبق فويل – ونضع قطع فحم على نار البوتاجاز حتى يحمر قليلا ثم نرص الفحم فى الطبق الفويل فى قعر الصينية ونضع الصينية على نار هادية على البوتاجاز
  • نرص الاسياخ فوق حافة الصينية ونهوى على الفحم بقطعة كرتون حتى يتوهج دقيقتين ثم نتركه بضع دقائق ليسوى الاسياخ بدون تهوية – قبل ان نكرر التهوية مرة أخرى وهكذا
  • نلف الاسياخ حتى نشوى كل الاوجه
  • تقدم مع سلطة طحينة
  • نحتفظ بالبهريز المتبقى فى الثلاجة او الفريزر لاى استخدامات مستقبلية
  • ممكن نحمر الجلد لوحده فى طاسة لو الاطفال بيحبوه مقرمش

والف هنا وشفا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *