اسرار تدميس فول دايب زي الزبدة

تحديث

بعد تجارب كثيرة توصلت للطريقة المثالية – وتم تعديل الوصفة بناءا على ذلك


اخيرا اكتشفت اسرار تدميس الفول عشان يبقي دايب زي الزبدة تمام مثل عربيات الفول

  • السر الأول: تدميس الفول بدون نقعه قبلها – كدة يبقى أطعم بكتير – اما نقع الفول ثم التخلص من ماء النقع بيفقد الفول نسبة كبيرة من طعامته
    في المستوقد بيدمسوا الفول بدون نقعه قبلها . بيغلوا الماء ثم يضيفوا الفول الناشف على طول
  • السر الثانى : اضافة الملح للماء قبل تدميس الفول
    الطريقة دى تخلينا نحتاج ملح أقل لان الفول حيتشرب الملح داخله اثناء طهيه – اما لو اضفنا الفول بعد طهيه حنحتاج ضعف كمية الملح
  • السر الثالث : اضافة نصف كوب خل لماء التدميس لكل نصف كيلو فول – الخل حيخلى لونه يفتح ويبقى طعمه خطير فى الاكل
  • السر الرابع : اضافة نصف معلقة صغيرة بيكربونات صوديوم لنصف كيلو الفول – وذلك فى الساعة الاخيرة
    البيكربونات بتخلى الفول يستوى اكثر ويتهري والقشرة تبقي ناعمة جدا ولما نيجي تهرسه يدوب مثل الزبدة وكمان ميته بتتقل جدا نتيجة لذوبان الفول عند هرسه

وعلي فكرة نقع الفول غير ضروري لا صحياً ولا عملياً – الفرق الوحيد ان المنقوع بيستوى اسرع قليلا لكن الفرق بسيط جداً حوالى نصف ساعة فقط – لكن الفرق فى الطعم بيكون كبير لصالح الفول الغير منقوع

المقادير

  • 600جم فول مستورد
  • 2 لتر ماء
  • نصف كوب خل (80جم)
  • 30جم ملح ناعم (3 معالق صغيرين هرم)
  • نصف معلقة صغيرة بيكربونات صوديوم (بيكربوناتو)

الطريقة :

  • نغسل الفول كويس 3 مرات
  • نضعه فى حلة ونضيف له الماء والخل والملح
  • نضعه على نار عالية بضع دقائق وعندما يبدأ فى الغليان نغطيه ونهدى النار شمعة اقل حاجة لعدة ساعات حتى يستوى
  • بعد 5 ساعات من تسوية الفول نضيف البيكربونات ونقلب ثم نغطيه ساعة أخرى
  • لحظة اطفاء النار نرش على وش الفول قليل من الخل حتى لا يسود

بعد تدميس الفول لما نغرف طبق نحط عليه زيت كتير – الزيت الكتير بيخلى طعم الفول يجنن – وياسلام كمان لو نحط عليه شوية طحينة وشوية كمون ونقطع طماطماية فتافيت عليه حتاكلوا احلي وانظف طبق فول

وبالف هنا وشفا


المراجع :

http://www.seriouseats.com/2014/09/soaking-black-beans-faq.html

http://www.epicurious.com/expert-advice/soaking-salting-dried-bean-myths-article

http://www.latimes.com/food/dailydish/la-dd-dont-soak-dried-beans-20140911-story.html

http://www.latimes.com/food/la-fo-calcook-20141018-story.html

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *